რისი გადამწყვეტია ზელენსკი სალომე ზურაბიშვილთან ერთად-ეს სამიტი არასერიოზულია-ოდიშარია

მშვიდობის სამიტი ნაკლებად ატარებს სერიოზულ სახეს, რადგან გადაწყვეტილების მიმღები მთავარი აქტორები არ მონაწილეობენ, – ამის შესახებ საპარლამენტო უმრავლესობის წევრმა, ბექა ოდიშარიამ საქართველოს პირველ არხს განუცხადა.

მისი შეფასებით, საქართველოს პრემიერ-მინისტრი ირაკლი კობახიძე დაესწრო იმ პლატფორმას, სადაც მართლაც მიიღება გადაწყვეტილებები.

„ჩემი ღრმა პატივისცემა შვეიცარიას, შვეიცარიის ხელისუფლებას, უკრაინელ ხალხს, მაგრამ ეს სამიტი და ეს ფორმატი ნაკლებად ატარებს სერიოზულ სახეს, რადგან არ მონაწილეობენ მთავარი აქტორები, ვინც არის გადაწყვეტილების მიმღები. მათ შორის აშშ-ის ლიდერი, აღარ ვსაუბრობ სხვა იმ გმირებსა თუ ანტიგმირებზე, რომლებიც არიან ამ პროცესის უშუალო მონაწილეები. რისი გადამწყვეტია ზელენსკი ცალმხრივად სალომე ზურაბიშვილთან ერთად, ეს ალბათ საზოგადოებას ღიმილს ჰგვრის.

ირაკლი კობახიძე დაესწრო იმ პლატფორმას, სადაც მართლაც მიიღება გადაწყვეტილებები, პლატფორმას, რომელიც მნიშვნელოვანია უკრაინელი ხალხისათვის, მისი სახელმწიფოებრიობისთვის და ინფრასტრუქტურული ხელშეწყობისათვის, აღდგენის თვალსაზრისით. საქართველოს პრემიერ-მინისტრმა მკაფიოდ განაცხადა, რომ საქართველოს მთავრობა, ხალხი და საზოგადოება მზად არის, დაუდგეს გვერდში თავის მოძმე ერს, უკრაინელ ხალხს და მიიღოს მონაწილეობა ამ ქვეყნის აღდგენაში და მისი ინფრასტრუქტურის მოწესრიგებაში“, – განაცხადა ოდიშარიამ.

საქართველოს პრეზიდენტი სალომე ზურაბიშვილი უკრაინის მშვიდობის სამიტზე დასასწრებად შვეიცარიაში გაემგზავრა. პრეზიდენტის ადმინისტრაციის ცნობით, სალომე ზურაბიშვილი სამიტის გახსნაში მიიღებს მონაწილეობას.

ამასთან, საქართველოს პრემიერ-მინისტრმა, ირაკლი კობახიძემ, მსოფლიო ლიდერებთან ერთად, ბერლინში, 11-12 ივნისს გამართულ უკრაინის აღდგენის კონფერენციაში მიიღო მონაწილეობა, სადაც კიდევ ერთხელ გამოხატა მხარდაჭერა უკრაინის სუვერენიტეტისა და ტერიტორიული მთლიანობისადმი.

პრეზიდენტი უკრაინის მშვიდობის სამიტზე დასასწრებად შვეიცარიაში გაემგზავრა

შვეიცარიაში სამიტი, რომელიც 2 დღე გაგრძელდება დღეს იხსნება და მასში 100 ქვეყნის დელეგაცია მონაწილეობს, მათ შორის 57 სახელმწიფოსა და მთავრობის მეთაური მთელი მსოფლიოდან.

სამიტის მიზანია უკრაინაში სამართლიანი და ხანგრძლივი სამშვიდობო პროცესის წამოწყება და შემდგომი ნაბიჯებისთვის ინიციატივების ჩამოყალიბება.

სამიტზე მიწვეული არაა რუსეთი.

G7-ის სამიტზე პუტინის წინადადებები არ განხილულა, რადგან ყველამ იცის, რომ ეს არასერიოზულია | შოლცი