გარდაცვლილების ცხედრები რუსთავში გადაასვენეს

ექსპერტიზის ეროვნული ბიუროდან 3 დაღუპულის ცხედარი რუსთავში გადაასვენეს. დაზიანებების გამო ცხედრების იდენტიფიცირება ვერ მოხერხდა, ამიტომ დნმ-ის ანალიზი ცხედრებს რუსთავში ჩაუტარდებათ – იუწყება აჭარის ტელევიზია.

ბათუმის ექსპერტიზის ბიუროდან ქობულეთის სასტუმროში დაღუპული ბავშვების ცხედრების გამოსვენებისას ინციდენტი მოხდა. დაღუპულების მშობლები და ახლობლები გარდაცვლილთა ცხედრების ნახვას ითხოვდნენ. ისინი ექსპერტიზის ბიუროდან გამოსულ 112-ის ავტომობილს წინ გადაუდგნენ.

ერთ-ერთი გარდაცვლილი ბავშვის მამამ და მამიდამ ავტომობილის საბურავებში ჩავარდნა სცადეს. დაცვის პოლიციის თანამშრომლებმა სასწრაფო დახმარების მანქანა ადგილიდან გაიყვანეს.

ხანძარი ქობულეთში მდებარე სასტუმრო “არმაზში” 10 მაისს, დილის 5 საათზე გაჩნდა. ხანძარმა  სასტუმრო მთლიანად გაანადგურა.  ხანძრის შედეგად სამი ბავშვი დაიღუპა. პოლიციელებმა, მაშველებმა და მეხანძრეებმა 45 ადამიანის გადარჩენა შეძლეს.

მასალაში გამოყენებულია გაზეთ “ბათუმელების” ფოტო

მსგავსი პოსტები

Back to top button