რუსეთი საკუთარი სასაზღვრო რეგიონებს რომლებიც უკრაინის მხრიდან ხშირად იბომბება დაიცავს

რუსეთის პრეზიდენტის, ვლადიმერ პუტინის განცხადებით, რუსეთი საკუთარი სასაზღვრო რეგიონების, რომლებიც უკრაინის მხრიდან ხშირად იბომბება, უსაფრთხოებას უზრუნველყოფს.
რუსეთის პრეზიდენტმა კრემლში მხარდამჭერებთან შეხვედრისას განაცხადა, რომ რუსეთს აქვს საკუთარი გეგმები, როგორ უპასუხოს უკრაინის მხრიდან განხორციელებულ დარტყმებს.
„უპირველესი ამოცანა უსაფრთხოების უზრუნველყოფაა. არსებობს სხვადასხვა გზა, ადვილი არ არის, მაგრამ ჩვენ ამას გავაკეთებთ. რა თქმა უნდა, ჩვენ შეგვიძლია, ვუპასუხოთ ზუსტად ანალოგიური დარტყმით სამოქალაქო ინფრასტრუქტურასა და ყველა მსგავს სამიზნეზე, რასაც მტერი ურტყამს. ამის შესახებ გვაქვს შეხედულებები, საკუთარი გეგმები, ჩვენ მათ მივყვებით“, – აღნიშნა პუტინმა მხარდამჭერებთან შეხვედრისას.

რუსებმა ხერსონის ცენტრი დაბომბეს, შედეგად ერთი ადამიანი დაშავდა. ამის შესახებ ინფორმაციას ხერსონის ხელმძღვანელი რომან მროჩკო ავრცელებს.
“რუსეთის საოკუპაციო ძალების მიერ ბოლო დროს ხერსონის ცენტრალური ნაწილის დაბომბვის შედეგად 51 წლის ქალი დაშავდა,” – ნათქვამია განცხადებაში.
დაშავებულს სამედიცინო დახმარება უკვე აღმოუჩინეს. ქალმა ჰოსპიტალიზაციაზე უარი თქვა.
Ukrinform-ის ცნობით, რუსები ასევე, ხერსონის თემში თავს დაესხნენ მანქანებს, სადაც მშვიდობიანი მოსახლეობა იმყოფებოდა, შედეგად ორი კაცი დაიღუპა.

რუსმა ოკუპანტებმა დღეს ხარკოვზე მორიგი იერიში მიიტანეს. ქალაქის მერის, იგორ ტერეხოვის ინფორმაციით, არიან დაღუპულები და დაშავებულები. ამ დროისათვის არსებული ცნობით, გარდაცვლილია სამი ადამიანი.
ტერეხოვის თქმით, დაბომბვის ადგილას ძლიერი ხანძარი გაჩნდა და ტერიტორიაზე ყველა შესაბამისი სამსახური მუშაობს. მისივე თქმით, რუსებმა სამოქალაქო სამრეწველო საწარმოს დაარტყეს.
“სამწუხაროდ, არიან გარდაცვლილები. საგანგებო სიტუაციების სახელმწიფო სამსახურის ინფორმაციით, სამი. ნანგრევების ქვეშ ჯერ კიდევ არიან ადამიანები, რომლებთან მიახლოება ხანძრის გამო ამ დრომდე შეუძლებელია”, – განაცხადა მან.
მერის განმარტებით, დაშავებულია ხუთი ადამიანი, რომლებიც საავადმყოფოში გადაიყვანეს.