რუსეთის ელჩი აშშ-ისგან ლავროვის დელეგაციისთვის, გაერო-ს სხდომაზე დასასწრებად ვიზებს ითხოვს
რუსეთის ელჩი ვაშინგტონში, ანატოლი ანტონოვი ამერიკის შეერთებულ შტატებს მოუწოდებს, გასცეს ვიზები რუსეთის დელეგაციის წევრებისთვის, რომლებმაც, საგარეო საქმეთა მინისტრის, სერგეი ლავროვის ხელმძღვანელობით, რამდენიმე დღეში გაეროს უშიშროების საბჭოს სხდომაში მონაწილეობა უნდა მიიღონ.
„მოვუწოდებთ ვაშინგტონს, არ გადადოს ვიზების გაცემა ჩვენი დელეგაციისთვის, მათ შორის ჩვენი ჟურნალისტებისთვის. ვიზების არგაცემა არღვევს შეერთებული შტატების, როგორც გაერო-ს შტაბ-ბინის მასპინძელი ქვეყნის ვალდებულებებს, რაც აფერხებს მსოფლიო ორგანიზაციის გამართულ, სრულფასოვან ფუნქციონირებას“, – განაცხადა ანტონოვმა.
ელჩის თქმით, ვიზების არგაცემა შეერთებული შტატების, როგორც გაეროს შტაბ-ბინის მასპინძელი ქვეყნის ვალდებულებებს არღვევს და ხელს უშლის მსოფლიო ორგანიზაციის სრულფასოვან ფუნქციონირებას. მისივე განცხადებით, აშშ-ის ხელისუფლება რუსეთის დელეგაციის თვითმფრინავის აშშ-ის საჰაერო სივრცეში შესვლას არ თანხმდება.
„ველით, რომ ამერიკელები სასწრაფოდ გასცემენ ნებართვას თვითმფრინავზე (აშშ-ის საჰაერო სივრცეში შესვლისთვის) ყოველგვარი პირობებისა და შეზღუდვების გარეშე“, – აღნიშნა ანტონოვმა.
შეგახსენებთ, აპრილში რუსეთი გაერო-ს უშიშროების საბჭოს თავმჯდომარე ქვეყანა გახდა, რაც იმას ნიშნავს, რომ სერგეი ლავროვი ნიუ-იორკში, მიმდინარე თვეში გაერო-ს უშიშროების საბჭოს სხდომას უნდა გაუძღვეს.
