რუსეთის ნავთობგადამამუშავებელ ქარხნებზე დარტყმები შესაძლოა, უარყოფითად აისახოს მსოფლიო ენერგეტიკულ ბაზარზე-ოსტინი

აშშ-ის თავდაცვის მდივანი ლოიდ ოსტინი უკრაინის მიერ რუსეთის ნავთობგადამამუშავებელ ქარხნებზე იერიშებს გამოეხმაურა.

ამერიკის შეერთებული შტატების თავდაცვის მინისტრი ლოიდ ოსტინი უკრაინას ურჩევს, რუსეთის ნავთობგადამამუშავებელ ქარხნებზე შეტევის ნაცვლად კონცენტრირებული იყოს უშუალოდ საბრძოლო მოქმედებებზე გავლენის მქონე სამხედრო სამიზნეებზე.

სააგენტო Bloomberg-ის ცნობით, 9 აპრილს შეერთებული შტატების სენატის შეიარაღებული ძალების კომიტეტის სხდომაზე გამოსვლისას ოსტინმა თქვა, რომ რუსეთის ნავთობგადამამუშავებელ ქარხნებზე დარტყმები შესაძლოა, უარყოფითად აისახოს მსოფლიო ენერგეტიკულ ბაზარზე. თავდაცვის მინისტრის განცხადებით, უმჯობესი იქნება, უკრაინამ ძალისხმევა მიმართოს ტაქტიკური და ოპერატიული სამიზნეებისკენ.
„ამ დარტყმებმა, შესაძლოა, უარყოფითი გავლენა მოახდინოს გლობალურ ვითარებაზე ენერგორესურსების კუთხით. უკრაინისთვის უმჯობესია, კონცენტრაცია მოახდინოს ტაქტიკურ და ოპერატიულ მიზნებზე, რასაც შეუძლია, უშუალო გავლენა მოახდინოს საბრძოლო მოქმედებების მიმდინარეობაზე“, – განაცხადა ოსტინმა.

რუსეთის ნავთობგადამამუშავებელ ქარხნებზე უკრაინის შეტევებისადმი ლოიდ ოსტინის პოზიცია გააკრიტიკა რესპუბლიკელმა სენატორმა ტომ კოტონმა. მისი განცხადებით, პრეზიდენტ ჯო ბაიდენის ადმინისტრაციას უბრალოდ არ სურს, რომ არჩევნების წელს საწვავი გაძვირდეს. აშშ-ში საპრეზიდენტო არჩევნები 5 ნოემბერს ჩატარდება. 2024 წლის დასაწყისიდან რუსეთის სხვადასხვა რეგიონში უკრაინული უპილოტო საფრენი აპარატებით შეტევა იყო 20-მდე ნავთობგადამამუშავებელ ქარხანაზე.

გამოცემა Financial Times-ი მარტში წერდა, რომ აშშ-ის ხელისუფლებამ უკრაინას მიმართა, შეწყვიტოს თავდასხმები რუსეთის ნავთობგადამამუშავებელ ინფრასტრუქტურაზე.

გამოცემის ინფორმირებულ წყაროთა თანახმად, ვაშინგტონი შიშობს, რომ რუსულ ქარხნებზე უპილოტო საფრენი აპარატებით შეტევებმა შესაძლოა, გამოიწვიოს ნავთობის მსოფლიო ფასების ზრდა და მოსკოვის მხრიდან საპასუხო ზომების პროვოცირება. 9 აპრილს სენატის კომიტეტში გამოსვლისას ამერიკის შეერთებული შტატების თავდაცვის მინისტრმა ლოიდ ოსტინმა კონგრესს მოუწოდა, მხარი დაუჭიროს უკრაინისთვის დამატებით სამხედრო დახმარებას.
როგორც „ბლუმბერგი“ წერს, აშშ ცდილობს, დაბალანსებული მიდგომა შეინარჩუნოს და, ერთი მხრივ, შეამციროს რუსეთის მიერ ენერგორესურსების გასხვისებიდან მიღებული შემოსავალი, რომელიც ომის დაფინანსებას ხმარდება, მეორე მხრივ, მსოფლიო ბაზრებზე ენერგორესურსების საკმარისი რაოდენობა იყოს, რათა გლობალური ეკონომიკის დესტაბილიზაცია არ მოხდეს.

კონგრესის ზედა პალატას, სენატს, უკრაინის მხარდასაჭერად 60-მილიარდიანი პაკეტი უკვე დამტკიცებული აქვს. რესპუბლიკელი კონგრესმენების ნაწილის, მათ შორის სპიკერ მაიკ ჯონსონის წინააღმდეგობის გამო კანონპროექტისთვის კენჭი ამ დრომდე არ უყრია კონგრესის ქვედა, წარმომადგენელთა პალატას.
უკრაინის პრეზიდენტი ვოლოდიმირ ზელენსკი აცხადებს, რომ ამერიკის შეერთებული შტატების შემდგომი სამხედრო დახმარების გარეშე თავდაცვის ძალებს უკან დახევა მოუწევთ.