“რუსეთმა ბუშისგან წაიღო საქართველო, ყირიმი – ობამასგან, ბაიდენთან მთელი უკრაინის წაღება სურდათ ვინ არის, ვისგანაც რუსეთმა ვერაფერი წაიღო? – ტრამპი

გახსოვდეთ, რუსეთმა ბუშისგან წაიღო საქართველო, წაიღეს ყირიმი კაცისგან სახელად ობამა, სცადეს, მთელი ტერიტორია წაეღოთ ბაიდენისგან, ვინ არის, ვისგანაც რუსეთმა ვერაფერი წაიღო? – ტრამპი, – ამის შესახებ აშშ-ის პრეზიდენტმა, დონალდ ტრამპმა განაცხადა.

ჟურნალისტის კითხვაზე, რისი გაკეთება შეიძლება რუსეთზე ზეწოლის მხრივ, ტრამპმა უპასუხა, რომ შესაძლებელია ზეწოლა ფინანსურად, თუმცა, იმედი აქვს, რომ ეს საჭირო არ იქნება.

„შეგვიძლია, მაგრამ იმედი მაქვს, რომ ეს საჭირო არ იქნება. რა თქმა უნდა, შეგვიძლია ზეწოლა. შეგვიძლია ეს გავაკეთოთ რუსეთთან. გახსოვდეთ, რუსეთმა ბუშისგან წაიღო საქართველო, ხომ? მათ წაიღეს ყირიმი, კაცისგან სახელად ობამა, ხომ? მათ სცადეს მთელი ტერიტორია წაეღოთ ბაიდენისგან. ვინ არის ერთადერთი, ვისგანაც რუსეთმა ვერაფერი წაიღო? – ტრამპი.

სინამდვილეში, მე ვარ ის, ვინც შეაჩერა „ნორდ სტრიმი 2“, მსოფლიოში ყველაზე დიდი მილსადენი. ის შეჩერებული იყო და შემდეგ ბაიდენი მოვიდა და დაამტკიცა. არავინ ახსენებს ამას. რაც მე რუსეთს გავუკეთე, ძალიან მკაცრი იყო, მე ვიყავი ყველაზე მკაცრი. თუმცა მათ ჩემგან არაფერი წაუღიათ. მათ წაიღეს ობამასგან და ბუშისგან და წაიღეს მძინარე ჯო ბაიდენისგან. ბაიდენისგან მათ უნდოდათ აეღოთ მთელი ქვეყანა, მაგრამ მე ვფიქრობ, რომ შევაჩერე ეს, მაგრამ ვნახავთ. თუმცა დიახ, არის საქმეები, რომლებიც შეგვიძლია გავაკეთოთ, რომელიც არ იქნება სასიამოვნო ფინანსური აზრით. შემიძლია გავაკეთო რაღაცები ფინანსურად, რაც ცუდი იქნება რუსეთისთვის. არ მინდა ამის გაკეთება, რადგან მე მინდა მშვიდობა. მე მინდა ვიხილო მშვიდობა. დიახ, შეგვიძლია გავაკეთოთ ძალიან ცუდი რაღაცები რუსეთისთვის, ეს იქნება დამანგრეველი, მაგრამ არ მინდა ამის გაკეთება, რადგან მინდა ვიხილო მშვიდობა“, – განაცხადა ტრამპმა.

აშშ-ის პრეზიდენტმა დონალდ ტრამპმა განაცხადა, რომ თუკი რუსეთი გადაწყვეტს, გააგრძელოს ომი, მის წინააღმდეგ შეიძლება გამოყენებულ იქნეს „დამანგრეველი“ სანქციები.

„არსებობს რაღაცები, რის გაკეთებაც შემიძლია და რაც არც ისე სასიამოვნოა ფინანსური თვალსაზრისით,“ თქვა ტრამპმა.

„ეს ძალიან ცუდი იქნება რუსეთისთვის. არ მინდა ამის გაკეთება, ვინაიდან მშვიდობის მიღწევა მსურს,“ თქვა აშშ-ის პრეზიდენტმა და დასძინა, რომ „ფინანსური ზომები“ შეიძლება „დამანგრეველი“ იყოს მოსკოვისთვის.

მან აღნიშნა, რომ ახლოს ვართ უკრაინასთან დაკავშირებით რაღაცის მიღწევასთან.

მისი სიტყვებით, უკრაინის ერთ დროს „რთულმა“ მხარემ აზროვნება შეცვალა.

„ჩემთან იყო ადამიანი [ზელენსკი], რომელსაც თითქოს არ სურდა მშვიდობა. ახლა ის მშვიდობაზე დათანხმდა. ასე რომ, ვნახოთ,“ თქვა ტრამპმა.

როგორც BBC-ის კორესპონდენტი იტყობინება თეთრი სახლიდან, აშშ-ის პრეზიდენტმა არ ისურვა, შეეფასებინა შეთანხმების მიღწევის ალბათობა, მაგრამ თქვა, რომ, მისი აზრით, „მას რუსეთისთვის აზრი აქვს“.