NATO-მ ბირთვული იარაღის გამოყენების წვრთნები დაიწყო
დღეიდან, 14 ოქტომბრიდან, ნატომ დაიწყო ყოველწლიური ბირთვული სწავლება Steadfast Noon-ი.
ორკვირიან წვრთნებში მონაწილეობს ალიანსის წევრი სახელმწიფოების 2000 სამხედრო და სხვადასხვა ტიპის 60-ზე მეტი თვითმფრინავი, მათ შორის რეაქტიული თვითმფრინავები ბირთვული ქობინებით, ბომბდამშენები და თანმხლები გამანადგურებლები მათ შორის, თანამედროვე ავია გამანადგურებლები, რომელთაც ატომური ბომბის გადატანა შეუძლიათ. “მდგრადი შუადღე” – ასეთი სახელწოდებით იმართება ყოველწლიური წვრთნები.
წვრთნები ძირითადად ჩატარდება ბელგიის და ნიდერლანდის საჰაერო სივრცეში. ასევე – დანიაში, დიდ ბრიტანეთსა და ჩრდილოეთის ზღვის თავზე.
სწავლებაში ჩართულია ნატოს 13 სახელმწიფოს სამხედრო-საჰაერო ძალების თვითმფრინავები.
NATO-ს ოფიციალურ განცხადებაში ვკითხულობთ, რომ სწავლება არ წარმოადგენს, უკრაინაზე განხორციელებული რუსული აგრესიის პასუხს, თუმცა წვრთნების დაწყების წინ, ორგანიზაციის გენერალურმა მდივანმა მარკ რუტემ განაცხადა, რომ Steadfast Noon-ი მკაფიო სიგნალია ნებისმიერი მოწინააღმდეგისთვის, რომ ნატო ყველა მოკავშირეს დაიცავს.
2024 წლის გაზაფხულსა და ზაფხულში რუსეთმა ჩაატარა არასტრატეგიული (ტაქტიკური) ბირთვული ძალების წვრთნები.
თავდაცვის სამინისტროს განცხადებით, ეს სწავლება მიმართული იყო „რუსეთის ტერიტორიული მთლიანობის და სუვერენიტეტის უპირობო უზრუნველყოფისკენ რუსეთის ფედერაციის მიმართ დასავლეთის ცალკეული ოფიციალური პირების პროვოკაციული განცხადებების და მუქარის პასუხად“. ვის და რომელ განცხადებებს გულისხმობდნენ, დაკონკრეტებული არ ყოფილა.
