საბა ბუაძის შემდეგ დეა მეტრეველმაც „ლელოს“ პოლიტსაბჭო და აღმასრულებელი მდივნის პოზიცია დატოვა
„ლელო – ძლიერი საქართველოს“ წევრი დეა მეტრეველი პარტიის პოლიტსაბჭოს და აღმასრულებელი მდივნის პოზიციას ტოვებს.
მისი თქმით, საერთო მიზნამდე მიმავალ გზაზე, რაც ახალი სამართლიანი საპარლამენტო არჩევნები და პოლიტპატიმრების გათავისუფლებაა, არ არის მიზანშეწონილი ოპოზიციური პარტიების ნაწილის არჩევნებში მონაწილეობა, ხოლო ნაწილის ბოიკოტში დარჩენა.
აღნიშნულის შესახებ მეტრეველი „ფეისბუქზე“ წერს.
ის არ აკონკრეტებს, რჩება თუ არა პარტიის რიგით წევრად, თუმცა ამბობს, რომ რჩება „იმ საერთო ბრძოლაში, რომელიც ყველას გვაერთიანებს“.
„ჩემთვის, როგორც პარტია „ლელოს“ დამფუძნებლისთვის, მისი პოლიტსაბჭოს წევრისთვის და აღმასრულებელი მდივნისთვის, უზომოდ მნიშვნელოვანი იყო და არის პარტიის ნებისმიერ გადაწყვეტილებაში ვყოფილიყავით დიდი ეროვნული მოძრაობის ნაწილი. ეს წლები ჩვენი გუნდი სწორედ ამ გზის და ამ ღირებულებების ერთგულია, რადგანაც რეჟიმთან ბრძოლის ერთადერთი ეფექტური გზა ერთიანობაა.
სამწუხაროა, რომ ე.წ. ადგილობრივ არჩევნებთან დაკავშირებით, ვერ მოხდა საზოგადოების და ოპოზიციური პოლიტიკური პარტიების გაერთიანება ერთიანი გეგმის გარშემო. შესაბამისად, საერთო მიზნამდე მიმავალ გზაზე, რაც ახალი სამართლიანი საპარლამენტო არჩევნები და პოლიტპატიმრების გათავისუფლებაა, არ მიმაჩნია მიზანშეწონილად ოპოზიციურ პარტიების ნაწილის არჩევნებში მონაწილეობა, ხოლო ნაწილის ბოიკოტში დარჩენა.
ვფიქრობ, „ძლიერი საქართველოს“ მიერ დღეს გაცხადებული გადაწყვეტილება, არსებული ვითარების გათვალისწინებით, არ არის თანმიმდევრული გზა ჩვენი საერთო ბრძოლისთვის, მით უფრო მამუკა ხაზარაძის და ბადრი ჯაფარიძის უაღრესად პრინციპული და ღირსეული ნაბიჯის ფონზე თავისუფლების აღკვეთის ფასად დარჩენილიყვნენ საერთო ბრძოლის ერთგულები.
შესაბამისად, მივიღე გადაწყვეტილება დავტოვო პარტიის პოლიტსაბჭო და აღმასრულებელი მდივნის პოზიცია. ამავდროულად, ვრჩები იმ საერთო ბრძოლაში, რომელიც ყველას გვაერთიანებს – საქართველოს გათავისუფლება და მისი ევროპული მომავალი. თავისუფლება ყველა პოლიტიკურ პატიმარს! ბრძოლა გამარჯვებამდე!“, – წერს დეა მეტრეველი.
საბა ბუაძე ლელოს თბილისის ორგანიზაციის თავმჯდომარის თანამდებობას და პარტიის პოლიტსაბჭოს ტოვებს
როგორ დღეს გახდა ცნობილი, კოალიცია „ლელო – ძლიერი საქართველო“ თვითმმართველობის არჩევნებში მონაწილეობას მიიღებს.
„ლელოს“ თბილისის ორგანიზაციის თავმჯდომარის და პოლიტსაბჭოს წევრის პოზიცია საბა ბუაძემ დატოვა.
„ლელო“, დიდი მადლობა ჩვენი შვილების დაკიდებისთვის!, -ანრო ჭიჭინაძის დედა
