გასული 24 საათის განმავლობაში COVID-19-ით გარდაცვალების შემთხვევები გაიზარდა აშშ-სა და ევროპის ოთხ ქვეყანაში, რომლებიც დაავადების გავრცელების მასშტაბით მსოფლიოში პირველ ხუთეულში არიან. ამასთან, საერთაშორისო ჯგუფის worldometers-ის მონაცემებით, ზოგიერთ ქვეყანაში შემცირდა ინფიცირების ახალი შემთხვევები.
24 საათში ყველაზე დიდი მატებაა საფრანგეთში, სადაც 5 აპრილს დაავადების 2886 შემთხვევა იყო, ხოლო 6 აპრილს – 5171. 5 აპრილს გარდაიცვალა 518 ადამიანი, ხოლო 6 აპრილს 833 ლეტალური შედეგი დადგა.
აშშ-ში 5 აპრილს დაფიქსირდა გარდაცვალების 1165 შემთხვევა, ხოლო 6 აპრილს 1255. აშშ-ში 5 აპრილს დაავადების 25 316 ახალი შემთხვევა იყო, ხოლო 6 აპრილს 30 331.
ესპანეთში 5478-დან 5029-მდე შემცირდა ინფიცირების დღიური მაჩვენებელი, გარდაცვალების კი, მცირედით გაიზარდა. 5 აპრილს 694 ადამიანი გარდაიცვალა, ხოლო 6 აპრილს 700.
დაავადების ახალი შემთხვევების დღიურმა მაჩვენებელმა იკლო იტალიაშიც. 5 აპრილს დაფიქსირდა 4316 ახალი შემთხვევა, ხოლო 6 აპრილს 3599. ამასთან, გაიზარდა გარდაცვალების მაჩვენებელი. 5 აპრილს 525 ლეტალური შედეგი დადგა, ხოლო 6 აპრილს 636.
სიკვდილიანობის მაჩვენებელმა მოიმატა გერმანიაშიც, სადაც 5 აპრილს გარდაიცვალა 140 ადამიანი და 6-ში 226. შემცირებულია დაავადების ახალი შემთხვევები. 5 აპრილს დადასტურდა 4031, ხოლო 6 აპრილს 3253.
გასული კვირის ბოლო დღეებში ამ ქვეყნებში როგორც დაავადების, ასევე გარდაცვალების ახალი შემთხვევების კლება ფიქსირდებოდა.
