საქართველოს ოლიმპიური ნაკრები პარიზის ზაფხულის ოლიმპიადაზე მიემგზავრება
![](https://heretifm.com/wp-content/uploads/2024/07/OLIMPIADA-SAQ-780x470.png)
საქართველოს ოლიმპიური ნაკრები პარიზის ოლიმპიადაზე მიემგზავრება. თამაშები 26 ივლისს დაიწყება და 11 აგვისტოს დასრულდება.ქართველმა ოლიმპიელებმა ფიცი დადეს. ცერემონიების სასახლეში სპორტსმენების გაცილების ცერემონია გაიმართა, რომელიც ტრადიციულად თამაშებზე გამგზავრების წინ ტარდება. წელს საქართველოს ყველაზე ნაკლები, 28 სპორტსმენი წარმოადგენს. ოლიმპიელები სპორტის ათ სახეობაში იასპარეზებენ. გარდა ამისა, ისტორიაში პირველად ოლიმპიურ თამაშებზე საქართველოს ძიუდოისტთა შერეული ნაკრები გუნდურ პირველობაშიც იასპარეზებს. პარიზის თამაშების წინ არ შეცვლილა ჩვენი დევიზი – უკეთ, ვიდრე წინა ოლიმპიადაზე.
ღონისძიება საქართველოს ეროვნული ოლიმპიური კომიტეტის პრეზიდენტმა, ლერი ხაბელოვმა გახსნა, რომელმაც შეგვახსენა, რომ, ზოგიერთი სხვა ქვეყნისგან განსხვავებით, საქართველოს ბევრი წარმომადგენელი არ ჰყავს, მაგრამ ჩვენი სპორტსმენები ოლიმპიურ თამაშებზე ყოველთვის მაღალ შედეგებს აღწევდნენ. პარიზის თამაშების წინ არ შეცვლილა ჩვენი დევიზი – უკეთ, ვიდრე წინა ოლიმპიადაზე.
პარიზი 2024-ის გახსნის ცერემონიაზე საქართველოს მედროშეები იქნებიან ორგზის ოლიმპიური ჩემპიონი ლაშა ტალახაძე და ოლიმპიადების ათგზის მონაწილე, სეული 1988-ის გამარჯვებული ნინო სალუქვაძე.
ფიცის დადების ცერემონიას ესწრებოდნენ მთავრობის წარმომადგენლები, რომლებმაც სპორტსმენებს წარმატება და გამარჯვება უსურვეს.
სახელმწიფო ოლიმპიურ ჩემპიონებს მილიონ ლარს, ვერცხლის მედალოსნებს ნახევარ მილიონს, ხოლო ბრინჯაოს პრიზიორებს 250 ათას ლარს გადასცემს.
პარიზის ოლიმპიადის ლიცენზიანტთა სია:
1. ნინო სალუქვაძე (ტყვიის სროლა)
2. ლაშა გურული (კრივი)
3. გიორგი ყუშიტაშვილი (კრივი)
4. გოდერძი ძებისაშვილი (თავისუფალი ჭიდაობა, 65 კგ.)
5. ვლადიმერ გამყრელიძე (თავისუფალი ჭიდაობა, 86 კგ.)
6. გივი მაჭარაშვილი (თავისუფალი ჭიდაობა, 97 კგ.)
7. გენო პეტრიაშვილი (თავისუფალი ჭიდაობა, 125 კგ.)
8. რამაზ ზოიძე (ბერძნულ-რომაული ჭიდაობა, 67 კგ.)
9. რობერტ კობლიაშვილი (ბერძნულ-რომაული ჭიდაობა, 97 კგ.)
10. ლაშა გობაძე (ბერძნულ-რომაული ჭიდაობა, 87 კგ.)
11. სანდრო ბაზაძე (ფარიკაობა)
12. ლუბა გოლოვინა (ბატუტზე ხტომა)
13. შოთა მიშველიძე (ძალოსნობა, 61 კგ.)
14. ირაკლი ჩხეიძე (ძალოსნობა, 102 კგ.)
15. ლაშა ტალახაძე (ძალოსნობა, + 109 კგ.)
16. გიორგი სარდალაშვილი (ძიუდო, -60კგ.)
17. ვაჟა მარგველაშვილი (ძიუდო, -66 კგ.)
18.ლაშა შავდათუაშვილი (ძიუდო, -73 კგ.)
19. ტატო გრიგალაშვილი (ძიუდო, -81 კგ.)
20. ლაშა ბექაური (ძიუდო, -90 კგ.)
21. ილია სულამანიძე (ძიუდო, -100 კგ.)
22. გურამ თუშიშვილი (ძიუდო, +100 კგ.)
23. ეთერ ლიპარტელიანი (ძიუდო, -57 კგ).
24. ეთერ ასკილაშვილი (ძიუდო, -63 კგ.)
25. სოფიო სომხიშვილი (ძიუდო, +73 კგ.)
26. ლიკა ხარჩილავა (მძლეოსნობა – რბენა, 100 მ.)
27. ანა ნიჟარაძე (ცურვა, ბატერფლაი, 100 მ)
28. ნოე ფანცხავა (გულაღმა ცურვა, 100 მ)
ძიუდოს ქალთა და კაცთა შერეული ნაკრები გუნდი.
პარიზის 2024 წლის ოლიმპიური თამაშების ლიცენზია ოფიციალურად 28 ქართველმა სპორტსმენმა მოიპოვა. ამას გარდა, ისტორიაში პირველად ოლიმპიურ თამაშებზე საქართველოს ძიუდოისტთა შერეული ნაკრები გუნდურ პირველობაშიც იასპარეზებს.
1996 წლის ატლანტის ოლიმპიადიდან დღემდე, საქართველომ ოლიმპიურ თამაშებზე 10 ოქროს, 12 ვერცხლის და 18 ბრინჯაოს მედალი მოიპოვა. მედლების რაოდენობით ყველაზე წარმატებული იყო 2020 წლის ტოკიოს ოლიმპიადა, როცა საქართველომ 8 მედალი ( 2 ოქრო, 5 ვერცხლი, 1 ბრინჯაო მოიპოვა).
ოლიმპიადა პარიზში 26 ივლისს გაიხსნება და 11 აგვისტოს დასრულდება.