მნიშვნელოვანიმსოფლიოსიახლეები

85 მეხანძრე-მაშველი, როტაციის მიზნით, თურქეთში გაემგზავრა

შინაგან საქმეთა სამინისტროს საგანგებო სიტუაციების მართვის სამსახურის 85 მეხანძრე-მაშველი, როტაციის მიზნით, თურქეთის რესპუბლიკაში, ქალაქ ადიამანში გაემგზავრა.

შს სამინისტროს საგანგებო სიტუაციების მართვის სამსახურის ინფორმაციით, ქართველი მეხანძრე-მაშველების ახალი ჯგუფი იმ მეხანძრე-მაშველებს ჩაანაცვლებს, რომლებიც ამ დრომდე ახორციელებდნენ მიწისძვრის შედეგების სალიკვიდაციო და სამაშველო ღონისძიებებს.

ამასთან, მუშაობას განაგრძობენ ადგილზე მოქმედი შტაბის ხელმძღვანელები და სპეციალიზებული მაშველები.

“ქართული სამაშველო ჯგუფი ქალაქ ადიამანში სამაშველო ოპერაციას ორ სექტორზე ახორციელებს. ადგილზე მოწყობილი საველე შტაბი ქალაქ ადიამანის ოპერატიული მართვის ცენტრთან კოორდინაციით მუშაობს.

ქართველი მაშველების ახალი ჯგუფი დაკომპლექტებულია მიწისძვრის შედეგების სალიკვიდაციო და სამაშველო ღონისძიებების განხორციელების მიმართულებით გადამზადებული მეხანძრე-მაშველებით. სამაშველო ჯგუფი, ასევე აღჭურვილია თანამედროვე აკუსტიკური საშუალებებით, დრონებით, კავშირგაბმულობის მანქანითა და ყველა სახის შესაბამისი სპეციალური სამაშველო მოწყობილობებით.

ქართველი მეხანძრე-მაშველების სამაშველო საქმიანობის კოორდინაციას საგანგებო სიტუაციების მართვის სამსახურის უფროსი – თეიმურაზ მღებრიშვილი პირადად ხელმძღვანელობს.
თურქეთის რესპუბლიკაში მიწისძვრით გამოწვეული შედეგების სალიკვიდაციო და სამაშველო ღონისძიებებში სამაშველო ჯგუფი საქართველოს პრემიერ-მინისტრის გადაწყვეტილებით იმყოფება”, – აღნიშნულია ინფორმაციაში.

საქართველოდან თურქეთში, სტიქიური უბედურების ზონაში 60 მაშველი 6 თებერვალს გაემგზავრა. ისინი დაზიანებულ ქალაქ ადიამანში მუშაობენ. მოგვიანებით მათ კიდევ 40 მეხანძრე-მაშველი შეუერთდა.

თურქეთსა და სირიაში მომხდარი მიწისძვრიდან ერთი კვირის თავზე ნანგრევებიდან ამოტანილია 36 ათასზე მეტი ადამიანის გვამები. მაშველები კვლავ პოულობენ ცოცხლად გადარჩენილებს, თუმცა ამგვარი ცნობები სულ უფრო იკლებს.

თურქეთში საქართველოს ერთი მოქალაქის სამძებრო სამუშაოები გრძელდება.

დადასტურდა საქართველოს ხუთი მოქალაქის დაღუპვის ფაქტი.

მსგავსი პოსტები

Back to top button