ბოლო ერთ დღეში უკრაინელებმა 70 თავდასხმა მოიგერიეს
უკრაინის შეიარაღებული ძალების გენერალური შტაბის ცნობით, ბოლო ერთ დღეში უკრაინელებმა ოკუპანტების მიერ გაშვებული შაჰედის 6 დრონი ჩამოაგდეს და 70 თავდასხმა მოიგერიეს.
გენშტაბი წერს, რომ 31 მარტს რუსებმა უკრაინის სამოქალაქო ობიექტებზე მორიგი სარაკეტო თავდასხმა განახორციელეს. საჰაერო იერიშებისთვის გამოიყენეს ირანული წარმოების 6 შაჰედ-136, თუმცა უკრაინელმა დამცველებმა ყველა მათგანი გაანადგურეს.
“მტერი თავისი ძირითადი ძალების კონცენტრირებას აგრძელებს ლიმანის, ბახმუტის, ავდიივკასა და მარინკას მიმართულებით შეტევითი მოქმედებების განსახორციელებლად. გასული დღის განმავლობაში, უკრაინის თავდაცვის ძალების დანაყოფების ორგანიზებული და კოორდინირებული მოქმედებების, ასევე, თითოეული დამცველის ინდივიდუალური სიმამაცის წყალობით, აღნიშნული მიმართულებებით მტრის 70 თავდასხმა მოვიგერიეთ”, – აღნიშნავენ გენშტაბში.
უწყების ცნობითვე, ბრძოლები გრძელდება ბილოგორივკას, ბახმუტის, ავდიივკასა და მარინკას დასახლებების მიმართულებით. მათივე განცხადებით, ბოლო 24 საათის განმავლობაში რუსებმა 5 სარაკეტო და 16 საჰაერო დარტყმა განახორციელეს, ასევე, დაბომბეს ბარანივკას, ჩერნიჰივის ოლქის დასახლებები.
შეიარაღებული ძალების გენერალური შტაბი რუსი ოკუპანტების სამხედრო დანაკარგის შესახებ განახლებულ ინფორმაციას ავრცელებს. უკრაინის შეიარაღებული ძალების გენერალური შტაბის ცნობით, ომის დაწყებიდან დღემდე, რუსეთმა უკრაინაში 173 990 ჯარისკაცი დაკარგა. მონაცემები მოიცავს 2022 წლის 24 თებერვლიდან ამ წლის 1 აპრილამდე პერიოდს.
გენშტაბის თქმით, უკრაინულმა მხარემ სხვადასხვა რუსული სამხედრო ტექნიკა გაანადგურა.
ტანკი – 3616
ჯავშანტექნიკა – 6981
საარტილერიო სისტემა – 2683
ზალპური ცეცხლის სარაკეტო სისტემა – 527
საჰაერო თავდაცვის სისტემა – 279
თვითმფრინავი – 306
ვერტმფრენი – 291
ოპერატიულ-ტაქტიკური უპილოტო საფრენი აპარატი – 2248
ფრთოსანი რაკეტა – 911
გემი/ნავი – 18
სატრანსპორტო საშუალება და საწვავის ავზი – 5528
სპეცტექნიკა – 296
რუსეთი უკრაინაში 2022 წლის 24 თებერვალს შეიჭრა. რუსულ სამხედრო ძალებს ათასობით მშვიდობიანი მოქალაქის სიცოცხლე ემსხვერპლა. ლტოლვილად და იძულებით გადაადგილებულ პირად 10 მილიონზე მეტი ადამიანი იქცა.
