ისრაელის მიერ დამასკოში სარაკეტო იერიშის შედეგად ირანის ისლამური რევოლუციის გუშაგთა კორპუსის წევრები დაიღუპნენ
ირანის ისლამური რევოლუციის გუშაგთა კორპუსის ოთხი წევრი დაიღუპა ისრაელის მიერ სირიის დედაქალაქ დამასკში, საცხოვრებელ სახლზე განხორციელებული დარტყმის შედეგად. ამის შესახებ Reuters-ი იტყობინება. სააგენტოს თანახმად, შენობა სრულიად განადგურებულია. მას იყენებდნენ ირანელი მრჩევლები, რომლებიც სირიის მთავრობას უჭერენ მხარს.
რადიო თავისუფლების ირანული სამსახური ხუთი დაღუპულის შესახებ იტყობინება.
სირიის სახელმწიფო საინფორმაციო სააგენტო SANA-მ მომხდარს „ისრაელის აგრესიის აქტი“ უწოდა.
ირანის მედია წერს, რომ ავიადარტყმის შედეგად დაიღუპნენ სირიაში გუშაგთა კორპუსის დაზვერვის ქვედანაყოფის მეთაური, იუსეფ ომიდზადე და მისი მოადგილე.
ისრაელის მედია იტყობინება, რომ რაიონში, სადაც მოხდა აფეთქება, ცხოვრობენ მსოფლიოს მრავალ ქვეყანაში ტერორისტულ ორგანიზაციად აღიარებული პალესტინური დაჯგუფება „ისლამური ჯიჰადის“ ლიდერი ზიად ალ-ნახალა და აკრამ ალაჯური, რომელიც ორგანიზაციის მთელი სამხედრო საქმიანობისთვის არის პასუხისმგებელი.
„ისლამური ჯიჰადის“ წარმომადგენელმა განაცხადა, რომ ალ-ნახალა არ დაშავებულა.
ადამიანის უფლებების სირიული ცენტრის თანახმად, რომელსაც დიდ ბრიტანეთში უდევს ბინა, შენობაში, რომელზეც განხორციელდა დარტყმა, ირანის მხარდამჭერ ლიდერთა შეხვედრა მიმდინარეობდა. ორგანიზაცა მათ ვინაობას არ აკონკრეტებს.
ამასთან, რევოლუციის გუშაგთა კორპუსი შურისძიებით იმუქრება და აცხადებს, რომ ფაქტს უპასუხოდ არ დატოვებს.
სირიის დედაქალაქში სარაკეტო დარტყმა გუშინ განხორციელდა. ვრცელდება ინფორმაცია, რომ მსხვერპლია მშვიდობიან მოსახლეობაშიც.
