სუმის ოლქი რუსი დამპყრობლებისგან მთლიანად თავისუფალია
სუმის ოლქი რუსი დამპყრობლებისგან მთლიანად თავისუფალია- ამის შესახებ რეგიონული სამხედრო ადმინისტრაციის ხელმძღვანელმა დიმიტრი ჟივიცკიმ განაცხადა.
„რეგიონის ტერიტორია თავისუფალია ორკებისგან, ამიტომ თუ გესმით აფეთქებები (და ძალიან ბევრი იყო ბოლო დღეებში), ეს მაშველები და ტექნიკოსები მუშაობენ. ისინი ანეიტრალებენ რუსი სამხედროების მიერ დატოვებულ საბრძოლო მასალას“-განაცხადა მან.
რეგიონული სამხედრო ადმინისტრაციის ხელმძღვანელმა მოსახლეობას მოუწოდა, განსაკუთრებული სიფრთხილე გამოიჩინონ, რადგან სუმის ოლქის ტერიტორიის დიდი ნაწილი, შესაძლოა, დანაღმული იყოს.
„არ გადახვიდეთ გზის პირას და არ გამოიყენოთ ტყის გზები. ნუ მიუახლოვდებით განადგურებულ აღჭურვილობას ან ორკების ბანაკებს! მე ვიცი, რომ იქ ყველაფერი საშინელებაა, მაგრამ ჯერ არ არის გაწმენდის დრო“ – მიმართა მან რეგიონის მოსახლეობას.
ცნობისთვის, რუსი დამპყრობლებისგან მთლიანად გათავისუფლდა კიევის, ჟიტომირისა და ჩერნიგოვის ოლქები.
ამასთან რუსულმა ჯარებმა ახლა სრულად დატოვეს ჩრდილოეთ უკრაინა და დაბრუნდნენ ჩრდილოეთ ბელარუსსა და რუსეთში. ამის შესახებ გაერთიანებული სამეფოს თავდაცვის სამინისტროს განცხადებაშია აღნიშნული.
უწყების ცნობით, ამ დანაყოფების ნაწილი აღმოსავლეთ უკრაინაში გადაინაცვლებს, დონბასში საბრძოლველად, მაგრამ მათ განლაგებამდე მარაგების “მნიშვნელოვანი შევსება” დასჭირდებათ.
“ჩრდილოეთიდან ნებისმიერ მასობრივ გადანაწილებას, სავარაუდოდ, მინიმუმ ერთი კვირა დასჭირდება”, – აღნიშნა სამინისტრომ ბრიფინგზე.
ბრიტანეთი ამბობს, რომ რუსეთის შეტევა უკრაინის აღმოსავლეთით და სამხრეთით გრძელდება და რუსული ჯარები სტრატეგიულად მნიშვნელოვანი ქალაქის, იზიუმის სამხრეთით დაწინაურდნენ.
