უკრაინისა და ჩინეთის პრეზიდენტებმა უკრაინაში ომის დაწყების შემდეგ ტელეფონით პირველად ისაუბრეს
უკრაინის პრეზიდენტ ვოლოდიმირ ზელენსკისა და ჩინეთის სახალხო რესპუბლიკის ლიდერ სი ძინპინს შორის უკრაინაში ომის დაწყების შემდეგ პირველი სატელეფონო საუბარი შედგა. საუბრის შესახებ ვოლოდიმირ ზელენსკიმ ტვიტერზე დაწერა. სააგენტო „სინხუას“ ცნობით კი პეკინი კიევში სპეციალურ წარმომადგენელს გაგზავნის, რომელიც ომში მყოფ მხარეებთან მოლაპარაკებებს აწარმოებს.
ზელენსკიმ სი ძინპინთან საუბარს „ხანგრძლივი და შინაარსიანი“ უწოდა. მისმა პრესმდივანმა დააზუსტა, რომ საუბარი თითქმის ერთ საათს გაგრძელდა. „მჯერა, რომ ეს ზარი და ასევე ჩინეთის სახალხო რესპუბლიკაში უკრაინის ელჩის დანიშვნა ძლიერ ბიძგს მისცემს ჩვენი ორმხრივი ურთიერთობების განვითარებას“, – განაცხადა უკრაინის ლიდერმა.
განცხადებიდან მალევე გამოქვეყნდა უკრაინის პრეზიდენტის ბრძანება ჩინეთში ელჩის დანიშვნის შესახებ – ვოლოდიმირ ზელენსკიმ ჩინეთის სახალხო რესპუბლიკაში უკრაინის ელჩად პავლო რიაბიკინი დანიშნა. 20 მარტამდე რიაბიკინს უკრაინის მრეწველობის სტრატეგიული სფეროების საკითხებში მინისტრის პოსტი ეკავა.
პრეზიდენტის ოფისში პირობას დებენ, რომ დიალოგის დეტალებს მოგვიანებით გაახმაურებენ , – წერს „უკრაინსკაია პრავდა“.
მარტში სი ძინპინი ვიზიტით მოსკოვში იმყოფებოდა, გაზეთი Wall Street Journal-ი წერდა რომ, ჩინეთის სახალხო რესპუბლიკის მეთაური ზელენსკისთან საუბარს გეგმავდა. აღსანიშნავია, რომ ოფიციალური პეკინი ნეიტრალიტეტს ემხრობა და ღიად არ განიხილავს რუსეთ-უკრაინის ომს, ამასთან მის ვიზიტს გამოეხმაურნენ ამერიკელი და უკრაინელი მაღალჩინოსნები, რომლებმაც ჩინეთს მოუწოდეს, გამოიყენოს საკუთარი გავლენა რუსეთზე, რათა შეწყდეს ომი.
გამოცემა აღნიშნავდა, რომ საუბარს სამშვიდობო მოლაპარაკებების პროცესში პეკინის როლის გაძლიერება უნდა წარმოეჩინა. ჩინეთმა უკრაინაში რუსეთის არმიის ფართომასშტაბიანი შეჭრის წლისთავზე, 2023 წლის 24 თებერვალს გამოაქვეყნა 12-პუნქტიანი პოზიცია „უკრაინის კრიზისის“ პოლიტიკური გადაწყვეტის შესახებ. პეკინი სთავაზობდა ცეცხლის შეწყვეტას, სამშვიდობო მოლაპარაკებების დაწყებას და ჰუმანიტარული კრიზისის აღმოფხვრას – კრიტიკოსებმა აღნიშნეს, რომ დოკუმენტი ზოგადი ფრაზებისგან შედგება და არ სთავაზობს მათი განხორციელების გზას.
