მნიშვნელოვანირეგიონისიახლეები

ქადაგიშვილი მეორე ტურისთვის, ბოტკოველი კი მორიგი პროტესტისთვის ემზადება

რადიო ჰერეთის ინფორმაციით, “ქართული ოცნების” კანდიდატი ირაკლი ქადაგიშვილი, რომელსაც არჩევნებამდე კორონავირუსი დაუდასტურდა, თანაპარტიელებს, ხვალ 11 ნოემბერს შეხვდება. სავარაუდოდ ქადაგიშვილი ხვალ გააკეთებს განცხადებას მედიასთანაც.

“ქართული ოცნების” კახეთის შტაბში არჩევნების მეორე ტურისთვის მზადება მიმდინარეობს.

“ყველა ვართ მზადყოფნაში, იმისათვის, რომ ჩვენი გამარჯვება იყოს დამაჯერებელი. ვისაც არ სურს მეორე ტურში მონაწილეობის მიღება, ეს მისი გადაწყვეტილებაა და ვერავის ვუკარნახებთ, რა გააკეთოს. არჩევნებში ხმის მიცემა ვერ შეძლო. იცით, რომ ჩვენი კანდიდატი, კორონავირუსით დაინფიცირდა, არჩევნებში ხმის მიცემა ვერ შეძლო და რამდენიმე დღით არდე შწყვიტა კამპანიაც. ამ დროისათვის, ის გამოჯანმრთელდა, გვექნება შეხვედრის საშუალება და რა ფორმით გაგრძელდება საარჩევნო კამპანია, ხვალ გვეცოდინება”, – ამის შესახებ, რადიო ჰერეთს, შტაბის ხელმძღვანელმა, პლატონ კალმახელიძემ განუცხადა.

საკუთარი პოზიცია, არჩევნების შედეგებთან დაკავშირებით, გიორგი ბოტკოველმა, სოციალურ ქსელში, 1 ნოემბერს გამოაქვეყნა და განაცხადა, რომ მეორე ტურში მონაწილეობას არ მიიღებს.

“ქართული ოცნების” წარმომადგენლის, კონკურენტის გარეშე დარჩენის თაობაზე, ერთიანი ნაციონალური მოძრაობის კანდიდატმა, განმარტება აღარ გააკეთა.

თელავის N17 საოლქო საარჩევნო კომისიის თავმჯდომარე, რევაზ გაიპარაშვილი, რადიო ჰერეთთან განმარტავს, რომ პოზიციის მიუხედავად, კანდიდატები საარჩევნო ბიულეტენში მაინც რჩებიან.

“ადრე იყო კანდიდატურის მოხსნის შესაძლებლობა. ახლა, უარი, სამართლებრივად არაფერს ცვლის, კანდიდატი ბიულეტენში მაინც წერია. ოპოზიციამ კომისიებიდან წევრები გაიწვია და შეუძლია არც საარჩევნო კამპანია აწარმოოს. თუმცა, კანდიდატი ბიულეტენში რჩება და ალბათ, გარკვეული რაოდენობის ხმებსაც”-  მიიღებს განაცხადა გაიპარაშვილმა.

საარჩევნო კოდექსის126-ე მუხლის, მეორე პუნქტის თანახმად, “არჩევნების მეორე ტურში არჩეულად ჩაითვლება კანდიდატი, რომელიც მეტ ხმას მიიღებს. თუ კანდიდატებმა ხმათა ერთნაირი რაოდენობა მიიღეს, არჩეულად ჩაითვლება ის კანდიდატი, რომელმაც პირველ ტურში ხმათა მეტი რაოდენობა მიიღო.”

31 ოქტომბრის არჩევნების შედეგის მიხედვით, ახმეტა-თელავი_ყვარელი-ლაგოდეხის გაერთიანებულ ოლქში, ირაკლი ქადაგიშვილის კონკურენტი მეორე ტურში ერთიანი ნაციონალური მოძრაობის კანდიდატი, გიორგი ბოტკოველია.

საბოლოო მონაცემებით, ქადაგიშვილმა ამომრჩეველთა ხმების 47, 26%(41 662 ხმა), ხოლო ბოტკოველმა 40, 43%(35 665 ხმა) მიიღო.

არჩევნების პირველ ტურშივე გამარჯვებისათვის საჭირო ხმების რაოდენობა ვერცერთმა კანდიდატმა ვერ მოაგროვა და საარჩევნო კანონმდებლობის თანახმად, ცენტრალურმა საარჩევნო კომისიამ, ოლქში მეორე ტური დანიშნა.

არჩევნების მეორე ტური, სადაც “ქართული ოცნების” წარმომადგენლებს ჯერ-ჯერობით კონკურენტები არ ჰყავთ, მთელი საქართველოს მასშტაბით, სავარაუდოდ 21 ნოემბერს ჩატარდება.

მსგავსი პოსტები

Back to top button