მნიშვნელოვანისიახლეები

კომუნიკაციების კომისიამ „ობიექტივი“ რუსულენოვანი გადაცემებისთვის დააჯარიმა

კომუნიკაციების კომისიამ „არასამეწარმეო მედია-კავშირი ობიექტივი“ ეთერში არასახელმწიფო ენაზე გასული გადაცემების გამო, 5000 ლარით დააჯარიმა და რუსულ ენაზე განთავსებული პროგრამის სამაუწყებლო ბადიდან დაუყოვნებლივ ამოღება დაავალდებულა.

საქმე ეხება საზოგადოებრივ-პოლიტიკურ გადაცემას „ყველას გასაგონად“, რომელიც „ობიექტივის“ ეთერში რუსულ ენაზე გავიდა. აღნიშნული გადაცემა სამაუწყებლო ბადეში კომუნიკაციების კომისიის დადგენილებით დასაშვები ხანგრძლივობის გადაჭარბებით და ასევე, სახელმწიფო ენაზე სუბტიტრების გარეშე განთავსდა.

მოქმედი კანონმდებლობის მიხედვით, საქართველოში ავტორიზებულ საერთო ეროვნულ ტელემაუწყებელს უფლება აქვს, სამაუწყებლო ბადეში არასახელმწიფო ენაზე არსებული გადაცემები მხოლოდ იმ მოცულობით გაუშვას, რაც მისი დღიური მაუწყებლობის ხანგრძლივობის 10%-ს არ აღემატება. ასევე დადგენილია, რომ საუკეთესო დროს არასახელმწიფო ენაზე განთავსებული პროგრამების ხანგრძლივობა არ უნდა აღემატებოდეს საუკეთესო დროის 10%-ს. მაუწყებელი აგრეთვე ვალდებულია, პროგრამა სამაუწყებლო ბადეში განათავსოს საქართველოს სახელმწიფო ენაზე სუბტიტრებით.

დღესვე გახდა ცნობილი კომუნიკაციების კიდევ ერთი გადაწყვეტილების შესახებ. კომისიამ ტელეკომპანია „ფორმულას“ წინააღმდეგ საზოგადოებრივი მაუწყებლის საჩივარი არ დააკმაყოფილა. საქმე ეხება ფორმულას გადაცემას „ფსკერი“, რომელმაც იუმორისტულ სკეტჩში საზოგადოებრივი მაუწყებლისა და გადაცემა „ახალი დღის“ ლოგოები და ვიზუალური შეფუთვა უცვლელი სახით გამოიყენა. პირველი არხი მიიჩნევდა, რომ „ფორმულამ“ საავტორო უფლებები დაარღვია და მარეგულირებელი კომისიისგან დაუყოვნებელ რეაგირებას მოითხოვდა.

კომუნიკაციების კომისიის განმარტებით, „ფორმულამ“ საზოგადოებრივი მაუწყებლის ვიზუალური კომპონენტები საკუთარ ორიგინალურ კონტენტს პაროდიის მიზნით დაადო და აღნიშნული ლოგოები მაუწყებლის გაშარჟებისთვის გამოიყენა. მათი თქმით, „ფორმულას“ მოტივაცია არ ყოფილა საზოგადოებრივი მაუწყებლისა ლოგოების საკუთარი გადაცემის ამოსაცნობ ნიშნებად გამოყენება. შესაბამისად, პაროდიულ-იუმორისტული მიზნით განთავსებული გადაცემა საავტორო უფლებების დარღვევად არ ჩათვალა და საზოგადოებრივ მაუწყებელს საჩივარი არ დაუკმაყოფილა.

 

მსგავსი პოსტები

Back to top button