ოპოზიციის მტიკიცებით ქვეყანა რევოლუციის ზღვარზეა
ოპოზიცია მეხუთე რაუნდის მოლოდინშია, მმართველი გუნდის ოპონენტები კიდევ ერთხელ ამახვილებენ ყურადღებას მოლაპარაკების მნიშვნელობაზე და ამბობენ, რომ მათ კომპრომისული წინადადებები უკვე წარადგინეს და ახლა ჯერი “ქართულ ოცნებაზეა”.
პარტიის ლიდერების მტკიცებით, მხარეებს შორის დიალოგი თუ არ შედგა ,პოლიტიკური კრიზისის განმუხტვის ალტერნატივად რევოლუცია რჩება , რასაც ოპოზიცია ეწინააღმდეგება
“ჩვენ გვაქვს შესაძლებლობა, ამ პროცესიდან გამოვიტანოთ ძალიან კარგი შეთანხმება. შეთანხმება, რომელიც იქნება წინგადადგმული ნაბიჯი ჩვენი ქვეყნისთვის. ვისაც არ უნდა ეს პროცესი ასე დასრულდეს, ვისაც არ უნდა, რომ პოლიტიკური კრიზისი განიმუხტოს მოლაპარაკების გზით, მაშინ ამის ალტერნატივად რჩება სახალხო მღელვარება და რევოლუცია, რასაც ჩვენ სასტიკად ვეწინააღმდეგებით,”- აცხადებს პარტია ”მოქალაქეების” გენერალურ მდივანი ლევან იოსელიანი
ოპოზიციურ პარტიებში ამტკიცებენ, რომ “ქართული ოცნება” ცდილობს სიტუაცია ისე წარმოაჩინოს, თითქოს ოპოზიციაში განხეთქილებაა, რაც სიმართლეს არ წარმოადგენს.
“ქართული ოცნების” პროპაგანდა ცდილობს, რომ ისე წარმოაჩინოს, რომ დიდი განხეთქილებაა ოპოზიციის და ა.შ. ეს ყველაფერი ჩვენთვის მნიშვნელოვანი არ არის, ჩვენთვის მნიშვნელოვანი არის ის, რომ თუ ქართული ოცნების მხრიდან იქნება მზადყოფნა კონკრეტული წინადადება რაიმე გონივრულობის ფარგლებში, რაც შეეხება ახალა არჩევნებს, მაშინ, რა თქმა უნდა, რაუნდი შედგება,” – აცხადებს სერგი კაპანაძე.
პარტიის “ლელო საქართველოსთვის” პოლიტიკური საბჭოს წევრი ამბობს, რომ გრიგოლ ვაშაძის მიერ, “ნაციონალური მოძრაობიდან” წასვლას არავითარი კავშირი არ აქვს მეხუთე რაუნდის ბედთან.
“გრიგოლ ვაშაძის თანამდებობის დატოვების განაცხადს არავითარი კავშირი არ აქვს მეხუთე რაუნდის ბედთან. იმიტომ რომ მე-5 რაუნდის მოლოდინშია სრულიად ოპოზიციური სპექტრი, მათ შორის ნაციონალური მოძრაობა, რომელსაც შესაძლოა ამ მოლაპარაკებებში წარმომადგენელი შეეცვალოს, ეს მათი შიდა პარტიული საქმეა,” – განაცხადა ფიქრია ჩიხრაძემ.
მოლაპარაკების მე-5 რაუნდში მონაწილეობის მიღებას აპირებს პარტია “სტრატეგია აღმაშენებელი”. ისინი ქართული ოცნების მხრიდან გონივრულ შემხვედრ წინადადებებს ელოდებიან.
შეგახსენებთ, ოპოზიციური პარტიები 31 ოქტომბრის საპარლამენტო არჩევნებს გაყალბებულად მიიჩნევენ და რიგგარეშე არჩევნების ჩატარებას ითხოვენ, მანამდე კი ბოიკოტის რეჟიმში არიან.
ოპოზიციამ ხელისუფლებას რამდენიმე მოთხოვნა წაუყენა: ახალი საარჩევნო ადმინისტრაციის პირობებში ხელახალი არჩევნების ჩატარება და პოლიტიკური პატიმრების გათავისუფლება. მმართველ გუნდს რიგგარეშე არჩევნების შესახებ პლებისციტის ჩატარებაც შესთვაზეს.
მიუხედავად ხელისუფლებას და ოპოზიციას შორის მოლაპარაკებებისა, რომელსაც ფასილიტაციას დასავლელი პარტნიორები უწევენ, შეთანხმება ვერ მოხერხდა, ქართული ოცნება მხოლოდ საარჩევნო რეფორმის ჩატარებას თანხმდება.
11 დეკემბერს გაიმართა ახალი, მეათე მოწვევის პარლამენტის პირველი სხდომა, რომელსაც მხოლოდ “ქართული ოცნებიდან” არჩეული დეპუტატები ესწრებოდნენ.
