რუსეთში ნოვოჩერკასკის ელექტროსადგურზე დრონებით თავდასხმა განხორციელდა
რუსეთის როსტოვის ოლქში, ნოვოჩერკასკის სახელმწიფო რაიონული ელექტროსადგურის სატრანსფორმატორო ქვესადგურში ხანძარი გაჩნდა, რის შედეგადაც ელექტროსადგურის ორი ენერგობლოკი დროებით მწყობრიდან გამოვიდა, – ამის შესახებ როსტოვის ოლქის გუბერნატორი ვასილი გოლუბევი და „ტელეგრამ“ არხები იუწყებიან.
გავრცელებული ინფორმაციით, ერთ-ერთი ყველაზე დიდ თბოელექტროსადგურზე, სავარაუდოდ, დრონებით თავდასხმა განხორციელდა.
დრონებით შეტევის შედეგად როსტოვის ოლქის დასახლებების ნაწილი ელექტროენერგიის გარეშე დარჩა.
ადგილობრივები აცხადებენ, რომ დრონების ფრენის ხმა ისმოდა,მათივე თქმით, სულ მცირე, 10 აფეთქების შესახებ ავრცელებენ ცნობებს.
რის შემდეგაც ნოვოჩერკასკის სახელმწიფო რაიონული ელექტროსადგურის ტერიტორიაზე აფეთქებების ხმები გაისმა. მწყობრიდან გამოვიდა სადგურის ორი ტრანსფორმატორი.
ხანძრის გამო ავტომატურად გაითიშა 330 კვ-იანი მაღალი ძაბვის ხაზები – ტიხორეცკაია და როსტოვსკაია. რუსეთის თავდაცვის სამინისტროს მტკიცებით, როსტოვის ოლქში 11 უკრაინული დრონი ჩამოაგდეს.
მოსკოვში, პიროგოვის სახელობის ეროვნული სამედიცინო და ქირურგიული ცენტრიდან პაციენტებისა და მედპერსონალის ევაკუაცია მოხდა. ინფორმაციას სახელისუფლებო მედია რიანოვოსტი ცენტრის დირექტორზე, ოლეგ კარპოვზე დაყრდნობით ავრცელებს.
მისივე თქმით, ადმინისტრაციამ მიიღო წერილი, რომელშიც ნათქვამი იყო, რომ შენობაში ხელნაკეთი ასაფეთქებელი მოწყობილობა იყო დამონტაჟებული.
კარპოვი ამბობს, რომ ადგილზე კინოლოგები მუშაობენ, ხოლო შენობაში მყოფი მოქალაქეები უსაფრთხო დისტანციაზე გაიყვანეს. სულ ცენტრიდან დაახლოებით 700 ადამიანი გამოიყვანეს.
სხვადასხვა მედია საშუალება წერდა, რომ ხსეებულ ცენტრში კროკუს სითი ჰოლში მომხდარი ტერაქტის შედეგად დაშავებული მოქალაქეები მკურნალობდნენ, თუმცა ცენტრის დირექტორის თქმით, ისინი კლინიკის სხვა კორპუსში აგრძელებენ მკურნალობას. ევაკუაცია ცენტრის იმ ნაწილიდან განხორციელდა, რომელშიც მწოლიარე პაციენტები არ მკურნალობენ. ადგილზე სასწრაფო დახმარების ჯგუფებიც არიან მობილიზებული.
