პრეზიდენტის განცხადებით ხვალ ნაძვის ხის ანთება კალაძის მხრიდან ,, უაზრო პროვოკაცია,,

საქართველოს პრეზიდენტი სალომე ზურაბიშვილი აცხადებს, რომ რუსთაველის გამზირზე 14 დეკემბერს თბილისის მერის მიერ მთავარი ნაძვის ხის ანთება – მაშინ, როდესაც 2 კვირაზე მეტია, იქ საპროტესტო დემონსტრაციები იმართება, – „პროვოკაციაა“.

პრეზიდენტი კახა კალაძეს მოუწოდებს, ორბელიანის მოედანზე „მოაწყოს ის ღონისძიება, რასაც პარლამენტთან აპირებდა“. 14 დეკემბერსვე გეგმავს „ქართული ოცნება“ ახალი პრეზიდენტის არჩევას.
მისივე განმარტებით, თუ რაიმე პროვოკაციას ექნება ადგილი პარლამენტთან, პასუხისმგებლობა სწორედ დედაქალაქის მერს დაეკისრება.

თბილისის მერმა კახა კალაძემ 12 დეკემბერს განაცხადა, რომ დედაქალაქის მთავარი ნაძვის ხე 14 დეკემბერს, საღამოს შვიდ საათზე აინთება.

ეს ნაძვის ხე რუსთაველის გამზირზე, პარლამენტის შენობის წინ დგას – ამ ადგილზე ბოლო 15 დღეა, ათასობით ადამიანი იკრიბება „ქართულ ოცნებაში“ მიღებული გადაწყვეტილების გასაპროტესტებლად და ახალ არჩევნებს ითხოვს.

“დავიწყებ ხვალინდელი დღით და იმ უაზრო პროვოკაციით, რომელსაც გვიწყობს ქალაქის ე.წ. მერი, რომელმაც დაგეგმა ხვალ, 19:00 საათზე ვითომდა ნაძვის ხის ანთება ბავშვებთან ერთად. ეს აშკარა პროვოკაციაა, რამეთუ ორი კვირაა უკვე, იმ ადგილას, იმ დროს უწყვეტად არის გამოხატული პროტესტი და რადგანაც ხვალ პარლამენტში იმართება პაროდია, იმ დღეს უთუოდ იქნება ძალიან დიდი პროტესტი. იმ ადგილას მოწყობა ამ ღონისძიების, სწორედ ხვალ, სწორედ 19:00 საათზე, სწორედ პარლამენტის წინ – ყველას კარგად გვესმის, ეს რას ნიშნავს, რატომ არის გაკეთებული და რას ემსახურება. იმ ადგილას, სხვათა შორის, სადაც თავად ექიმები ამბობენ, რომ გაზით არის გაჟღენთილი ხეებიც და ალბათ, სასურველი არ არის იქ ბავშვების მოყვანა. მე მინდა გავაფრთხილო ქალაქის მერი, რომ მისი პროვოკაცია ალბათ არაფერს გამოიწვევს, იმიტომ, რომ ეს პროტესტი, რომელიც გაშლილი არის ქალაქში და ხვალაც იქნება და ზეგაც, არის ძალიან მშვიდობიანი და თავად მოახერხებენ ამ პროვოკაციის თავიდან აცილებას, მაგრამ, მე მინდა მაინც ვუთხრა ქალაქის მერს, რომ თუ ეს პროვოკაცია არ არის, რაღა ხვალ, მოდის ბარბარობა, რომელიც ბევრად უფრო ბუნებრივია, გადაიტანოს და მე ვთავაზობ ორბელიანის წინ, სადაც დააყენა თვითონ რაღაც ბარაკები და ბავშვებისთვის ვითომ სათამაშოები, აქ მოიყვანოს ბავშვები და ორბელიანების სასახლის წინ მოაწყოს ის ღონისძიება, რომელსაც აპირებდა პარლამენტის წინ. მაგრამ, რაც არ უნდა მოხდეს, თუ რამე მოხდა, პასუხისმგებლობა მთლიანად და მხოლოდ პირადად მასზე იქნება”, -განაცხადა 13 დეკემბერს სალომე ზურაბიშვილმა ბრიფინგზე.

პრეზიდენტის თანახმად, „ექიმები ამბობენ, რომ რუსთაველზე შენობების ფასადები და ხეები გაზითაა გაჟღენთილი და სასურველი არ არის ბავშვების მოყვანა“.
„მინდა გავაფრთხილო ქალაქის მერი, რომ მისი ეს პროვოკაცია არაფერს არ გამოიწვევს, რადგან ქალაქში პროტესტი ხვალაც იქნება და იქნება მშვიდობიანი“, – განაცხადა პრეზიდენტმა.

მან მოვლენების შესაძლო განვითარებაზე პასუხისმგებლობა კახა კალაძეს დააკისრა:

„თუ ეს პროვოკაცია არაა, რაღა ხვალ? მოდის ბარბარობა [17 დეკემბერს], როდესაც ბევრად უფრო ბუნებრივია [ნაძვის ხის ანთება] და გადაიტანოს. მე ვთავაზობ აქ, ორბელიანის მოედანზე, – სადაც თავად „ბარაკები“ დააყენა, მოიყვანოს ბავშვები და ორბელიანების სასახლის წინ მოაწყოს ის ღონისძიება, რასაც პარლამენტის წინ აპირებდა… მაგრამ რაც უნდა მოხდეს, პასუხისმგებლობა მთლიანად მასზე პირადად მასზე იქნება“, – განაცხადა პრეზიდენტმა ზურაბიშვილმა.

მე-16 დღეა, რუსთაველის გამზირსა და თბილისის ქუჩებში საპროტესტო დემონსტრაციები იმართება, რაც ირაკლი კობახიძის განცხადებას მოჰყვა ევროკავშირთან 2028 წლამდე მოლაპარაკებების გახსნის საკითხის დღის წესრიგში არდაყენებასთან დაკავშირებით.

აქცია დაგეგმილია შაბათ საღამოსაც.

თბილისის მერის კახა კალაძის განცხადებით, ქვეყნის მთავარი ნაძვის ხე 14 დეკემბერს, 19:00 საათზე აინთება, აქცია-მანიფესტაცია კი რუსთაველის გამზირზე დილის საათებშია დაგეგმილი.

ამის შესახებ მან შესაბამისი შეკითხვის საპასუხოდ განაცხადა და აღნიშნა, რომ საახალწლო განწყობის შექმნას განსაკუთრებით პატარები ელოდებიან.

“არაერთი განმარტება გავაკეთეთ ახალ წელთან დაკავშირებით, რომელსაც ჩვენი პატარები განსაკუთრებით ელოდებიან. მნიშვნელოვანია, დედაქალაქის მერიამ ყველაფერი გააკეთოს იმისთვის, რომ შექმნას შესაბამისი განწყობა. ხვალ დილით დაგეგმილია ოპოზიციის მხრიდან შეკრება-მანიფესტაცია, რაც შეეხება ნაძვის ხის ანთებას, ამას დილით არავინ გეგმავს. ღონისძიება დავაანონსეთ 19:00 საათზე და მოვუწოდეთ ყველას, მობრძანდნენ შვილებით, შვილიშვილებით, ერთად ავანთოთ ნაძვის ხე და ჩავიფიქროთ სურვილები”, – განაცხადა კახა კალაძემ.

რაც შეეხება “საახალწლო სოფელს”, თბილისის მერის თქმით, მისი გახსნის შესახებ ზუსტ ინფორმაციას საზოგადოებას უახლოეს დღეებში მიაწვდის.

“საახალწლო სოფელი” ცოტა მოგვიანებით გაიხსნება. ხვალ განათდება დედაქალაქი, აინთება მთავარი ნაძვის ხე, “საახალწლო სოფელთან” დაკავშირებით კი ინფორმაციას საზოგადოებას ცოტა მოგვიანებით მივაწვდით”, – აღნიშნა დედაქალაქის მერმა.