რეგიონებში ზარალის დათვლა მიმდინარეობს
რეგიონებში სტიქიის სალიკვიდაციო სამუშაოები და ზარალის დათვლა მიმდინარეობს.
ძლიერმა წვიმამ აჭარა, იმერეთი, სამეგრელო და გურია დააზარალა. დაზიანებულია საცხოვრებელი სახლები, სასოფლო სამეურნეო სავარგულები, დახოცილია ფრინველი, განადგურებულია ინფრასტრუქტურა, წაღებულია ხიდები და რამდენიმე სოფელი ამ დრომდე რაიონულ ცენტრსაა მოწყვეტილი.
პრემიერ-მინისტრი, სტიქიით დაზარალებულ სამეგრელოს რეგიონში ჩავიდა. გიორგი კვირიკაშვილი ძლიერი წვიმის გამო შექმნილ პრობლემებს მარტვილის რაიონის სოფელ თამაკონში გაეცნო.
პრემიერ-მინისტრის განცხადებით, დასავლეთ საქართველოში სტიქიისგან მიყენებული ზარალის დათვლა მოკლე დროში მოხდება.
მან აღნიშნა, რომ სტიქია საკმაოდ მასშტაბური იყო და მას ინფრასტრუქტურული თვალსაზრისით საკამოდ მძიმე შედეგებიც აქვს.
ნალექმა მარტვილში 200-მდე ოჯახი დააზარალა. წყალმა დატბორა საცხოვრებლების პირველი სართულები, სახნავ-სათესი მიწები, განადგურდა მოსავალი. რთული ვითარებაა აბაშაშიც. წყალმა სიმინდისა და სოიოს ყანები განადგურდა. წაღებულია სოფლებს შორის დამაკავშირებელი ხიდებიც.
სამდღიანი სამძებრო სამუშაოები დასრულდა. მარტვილის რაიონის სოფელ ბანძაში, მდინარე აბაშისწყალში წყალქვეშ ყვინთვის ნაციონალური ფედერაციის უფროსის ცხედარი იპოვეს. ის ქუთაისში, სასამართლო ექსპერტიზის ბიუროში გადაასვენეს. ელგუჯა ჯამრიშვილი 16 წლის ადგილობრივი მოზარდის სამაშველო ოპერაციის დროს დაიღუპა. ჯამრიშვილი მდინარე აბაშისწყალში ხიდიდან გადახტა და ვეღარ გამოცურა. მომხადრის გამო მწუხარება გამოთქვა და დაღუპულთა ოჯახებს მიუსამძიმრა პრემიერმა.
