“თარგმანში დაკარგულს ჰგავს ხოლმე”

„ევროპული საქართველოს“ ერთ-ერთი ლიდერი გიგა ბოკერია გერმანიის ელჩს, ჰუბერტ ქნირშს გიორგი რურუაზე გაკეთებული განცხადების გამო აკრიტიკებს.

გერმანიის ელჩმა საქართველოში, ჰუბერტ ქნირშმა 26 ივნისს განაცხადა, რომ გიორგი რურუა, რომელსაც ოპოზიციის ნაწილი პოლიტპატიმარს უწოდებს და რომლის გამოშვების გარეშეც, საკონსტიტუციო ცვლილებების მისაღებ კენჭისყრაში არ მონაწილეობას, 8 მარტის შეთანხმებაში ნახსენები არ არის.

“ბატონი რურუა არ არის ნახსენები ამ შეთანხმებაში. ეს ძალიან ცხადია და [შეთანხმების ტექსტი] ყველას შეუძლია წაიკითხოს. ცოტათი გაკვირვებული ვარ, რომ მიმდინარეობს დისკუსია პოლიტიკურ პარტიებს შორის, სადაც ისინი ცდილობენ, რომ შესაძლო ჩაგდების გამო პასუხისმგებლობა დააკისრონ [ერთმანეთს].” – განაცხადა ჰუბერტ ქნირშმა.

გიგა ბოკერიამ იმავე დღეს, პარლამენტში, ჟურნალისტებთან საუბრისას, გერმანიის ელჩის ამ განცხადებასთან დაკავშირებით თქვა:

„თანავუგრძნობ მას. არ ვიცი, მერამდენედ უნდა გაეხვიოს ასეთ შარში. თარგმანში დაკარგულს ჰგავს ხოლმე და შემდეგ ბოდიშის მოხდა უწევს… ჩვენს პარტიას ბოდიში მოუხადა, შეცდომაში შეგვიყვანეს 20 ივნისზეო. ზოგჯერ დიპლომატებს გამოცდილება არ ჰყოფნით ხოლმე, შარში ეხვევიან და თანავუგრძნობ მას, რომ შარში გაეხვია და სხვა ელჩებიც გახვია. ახლა, რაღაცნაირად, ამ მდგომარეობიდან უნდა გამოვიდეს…”