თბილისში შენობის ნგრევას 4 ადამიანის სიცოცხლე ემსხვერპლა
თბილისში, აფაქიძის ქუჩაზე მომხდარ ტრაგედიას 4 ერთმანეთის ნათესავი ემსხვერპლა. სამი ადამიანი ადგილზე დაიღუპა, ერთი კი – საავადმყოფოში.
მათ შორისაა 17 წლის მოზარდი, რომელიც ბიძის სანახავად იყო მისული.კიდევ სამი დაღუპული მამაკაცის ასაკი საშუალოდ 35-40 წელია.
ამ წუთებში, ლევან სამხარაულის სახელობის ექსპერტიზის ბიუროში ცხედრების ინენტიფიცირება მიმდინარეობს, სადაც გარდაცვილების ნათესავებიც იმყოფებიან.
აფაქიძის N 13-ში მდებარე “გამოთვლითი მათემატიკის” ყოფილი ცენტრის შენობა კომპანია “ტიფლის ბიზნეს ცენტრს” ეკუთვნის.
ტრაგედიასთან დაკავშირებით თბილისის მერიამ საგანგებო განცხადება გაავრცელა:
“აღნიშნულ ტერიტორიაზე კომპანია “კონსტრაქშენ გრუპი” შენობის დემონტაჟის სამუშაოებს აწარმოებდა. ბიძინა კვერნაძის ქ. N10-ში შპს “ტიფლის ბიზნეს ცენტრის” კუთვნილ მიწის ნაკვეთზე არსებული შენობა-ნაგებობის რეკონსტრუქციის ნებართვა თბილისის არქიტექტურის სამსახურმა 2014 წლის 29 აგვისტოს გასცა. იმის გამო, რომ ჩასატარებელი სამუშაოები მიეკუთვნებოდა IVკლასს, თბილისის არქიტექტურის სამსახურმა სამუშაოების დაწყებამდე კომპანიას დაავალა, წარმოედგინა საინჟინრო-გეოლოგიური კვლევა, კონსტრუქციული პროექტი, რომელიც შედგება შენობა-ნაგებობის ძირითადი კონსტრუქციული სისტემის დეტალური პროექტისაგან (მათ შორის, ფუძე-საძირკვლისაგან), “მშენებლობის გაცემის წესისა და სანებართვო პირობების შესახებ” საქართველოს მთავრობის N57-ე დადგენილებით გათვალისწინებული შენობა-ნაგებობებისა და მიწის ნაკვეთის კვლევა, აგრეთვე, მშენებლობის ორგანიზაციის პროექტი და სავალდებულო საექსპერტო შეფასება, რომელსაც, ასევე, საქართველოს მთავრობის N57-ე დადგენილება ითვალისწინებს”, – ნათქვამია განცხადებაში.
თბილისის მერიის ინფორმაციით, კომპანიის მიერ წარმოდგენილ იქნა ყველა მოთხოვნილი დოკუმენტაცია და მიმდინარე წლის ივნისის ბოლოს მან შენობა-ნაგებობის რეკონსტრუქციის სამუშაოები დაიწყო.
“ამასთან, კომპანია ვალდებული იყო, რეკონსტრუქციის სამუშაოები სამშენებლო რეგლამენტის მოთხოვნათა სრული დაცვით და შეთანხმებული დოკუმენტის დარღვევის გარეშე ეწარმოებინა”, – ნათქვამია მერიის განცხადებაში.
მომხდარ ფაქტთან დაკავშირებით გამოძიება უკვე დაწყებულია. თბილისის მერია იმედოვნებს, რომ გამოძიება უახლოეს პერიოდში დაადგენს შენობის ჩამონგრევის მიზეზს და დამნაშავე პირები კანონის შესაბამისად დაისჯებიან.
