თელავში დაუდგენელმა პირებმა ენერგო-ეფექტური სკამები Wi-Fi მიმღებები და სადენები დააზიანეს -ადგილობრივი ბიუჯეტიდან 330 000 ლარი დაიხარჯა
თელავის მუნიციპალიტეტში ვანდალური ფაქტები დაფიქსირდა.
თელავსა და მუნიციპალიტეტის სოფლებში, ჯერჯერობით დაუდგენელმა პირებმა ენერგო-ეფექტური სკამები, Wi-Fi მიმღებები და სადენები დააზიანეს.
თელავის მუნიციპალიტეტის მერიაში განმარტავენ, რომ დაზიანებული ინფრასტრუქტურის აღდგენა სოლიდურ თანხებთანაა დაკავშირებული.
“ენერგო-ეფექტური სკამები მზის ენერგიით მუშაობს. სკამები აღჭურვილია ტელეფონის დამტენით, “ლაითბოქსით”, სადაც განთავსებულია თელავის ტურისტული რუკა, აქვს Wi-Fi მხარდაჭერა, რომლის გამოყენებაც უფასოდ შეუძლია როგორც ადგილობრივ მოსახლეობას, ასევე უცხოელ ვიზიტორებს. ამის აღდგენა ძალიან ძვირია და ზოგიერთ შემთხვევაში, შეუძლებელიც კი”- განმარტავენ მერიაში.
ქალაქ თელავსა და მუნიციპალიტეტის სოფლებში 30-მდე ენერგოეფექტური სკამია განთავსებული.
პროექტი საპილოტე რეგიონების ინტეგრირებული განვითარების პროგრამის ფარგლებში, ადგილობრივი ბიუჯეტის დაფინანსებით განხორციელდა და სამუშაოებზე 330 000 ლარი დაიხარჯა.
