Tik-Tok-ი აშშ-ში მისი ამკრძალავი კანონის ამოქმედებამდე რამდენიმე საათით ადრე გაითიშა
ამერიკის შეერთებულ შტატებში, 2025 წლის 19 იანვარს, ოფიციალურად ამოქმედდა კანონი, რომელიც კრძალავს პოპულარული სოციალური მედიის პლატფორმა TikTok-ის გამოყენებას. პლატფორმა აკრძალვის ძალაში შესვლამდე რამდენიმე საათით ადრე გაითიშა.
კანონის შესაბამისად, TikTok-ის აპლიკაცია ამოღებულია Apple-ისა და Google-ის აპლიკაციების მაღაზიებიდან, ხოლო მომხმარებლებს, რომლებიც აპლიკაციას ხსნიან, შემდეგი შეტყობინება ხვდებათ:
„ბოდიში, TikTok ამჟამად არ არის ხელმისაწვდომი. აშშ-ში ამოქმედდა კანონი, რომელიც კრძალავს TikTok-ს. სამწუხაროდ, ეს ნიშნავს, რომ თქვენ ვერ გამოიყენებთ TikTok-ს. ჩვენ გაგვიმართლა, რომ პრეზიდენტმა ტრამპმა მიუთითა, რომ ის ჩვენთან ერთად იმუშავებს TikTok-ის აღდგენის გადაწყვეტაზე, როგორც კი ის თანამდებობას დაიკავებს. გთხოვთ დარჩით ხაზზე“.
ამერიკელი ოფიციალური პირები აცხადებენ, რომ TikTok-ის მფლობელი ჩინური კომპანია ByteDance პეკინს ამერიკელების შესახებ მონაცემების შეგროვების და საზოგადოებრივ აზრზე გავლენის მოხდენის შესაძლებლობას აძლევს.
ამ მიზეზით, 2024 წლის აპრილში აშშ-ის კონგრესმა მიიღო კანონი, რომელიც ByteDance-ს ავალდებულებს, პლატფორმა ამერიკულ კომპანიას მიჰყიდოს, წინააღმდეგ შემთხვევაში, 2025 წლის 19 იანვრიდან აშშ-ში სოციალური ქსელი აიკრძალება. კომპანიამ განაცხადა, რომ პლატფორმას არ გაყიდის.
არჩეულმა პრეზიდენტმა ტრამპმა შაბათს, NBC News-თან სატელეფონო ინტერვიუში განაცხადა, რომ ის „დიდი ალბათობით 90 დღეს მისცემს TikTok-ს, რათა თავიდან აიცილოს აკრძალვა აშშ-ს მასშტაბით“, თუმცა საბოლოო გადაწყვეტილება ჯერ არ მიუღია.
შეგახსენებთ, ჯო ბაიდენმა აპრილში ხელი მოაწერა კანონს, რომლის თანახმადაც TikTok-ის მფლობელ ჩინურ კომპანია ByteDance-ს პლატფორმა არაჩინური კომპანიისთვის უნდა მიეყიდა, ან აპლიკაცია აშშ-ში 2025 წლის დასაწყისიდან უნდა აკრძალულიყო. გადაწყვეტილების მიზეზი იყო ამერიკელი კანონმდებლების შეშფოთება იმასთან დაკავშირებით, რომ ByteDance-ი ეროვნულ უსაფრთხოებას საფრთხეს უქმნიდა. კერძოდ, კონგრესმენები შიშობდნენ, რომ ByteDance-ს მომხმარებლის მონაცემები, შესაძლოა, ჩინეთის მთავრობისთვის გაეზიარებინა.
