ტრამპის მთავრობამ შეინარჩუნა წინა ადმინისტრაციის კრიტიკული ტონი „ქართული ოცნების“ ხელისუფლების მიმართ

შეერთებული შტატების სახელმწიფო დეპარტამენტმა 2 აპრილს პირველი კომენტარი გააკეთა საქართველოსთან დაკავშირებით – ახალმა ადმინისტრაციამ შეინარჩუნა წინა ადმინისტრაციის კრიტიკული ტონი „ქართული ოცნების“ ხელისუფლების მიმართ.

ინფორმაციას ავრცელებს გამოცემა globalnews.ge – მისმა ჟურნალისტმა, რუსა შელიამ სახელმწიფო დეპარტამენტის პრესსპიკერს, ტემი ბრიუსს ჯერ კიდევ 28 მარტს სახელმწიფო დეპარტამენტის ბრიფინგების ოთახში პირდაპირ ეთერში დაუსვა კითხვა საქართველოს შესახებ, თუმცა მაშინ პასუხი ვერ მიიღო.

„მინდა, რომ მაგაზე გიპასუხოთ, და ამ კითხვას მოვინიშნავთ და მოგვიანებით დაგიბრუნდებით“, – თქვა მაშინ ტემი ბრიუსმა.
სახელმწიფო დეპარტამენტისგან მიღებულ ოფიციალურ პასუხს უცვლელად გთავაზობთ:

“ჩვენ განვაგრძობთ ჩვენი მიდგომის შეფასებას საქართველოს მიმართ ამერიკული ინტერესების წინსვლისთვის. აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებისთვის. რაც შეეხება “ქართული ოცნების” მთავრობის მიერ განხორციელებულ განგრძობით ანტიდემოკრატიულ ქმედებებს – როგორც ვიცე პრეზიდენტმა ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულებელყოფით, თუ ვინ უნდა გახდეს ჩვენი საერთო საზოგადოების ნაწილი. შეერთებული შტატები, 33 წლის განმავლობაში, საქართველოსა და ქართველი ხალხის პარტნიორია და ამ ხნის განმავლობაში ძლიერი მხარდამჭერი საქართველოს დამოუკიდებლობის, სუვერენიტეტისა და ტერიტორიული მთლიანობის საკითხებში” – აცხადებენ სახელმწიფო დეპარტამენტში.
ტემი ბრიუსისათვის ბრიფინგზე დასმული შეკითხვა კი ასეთი იყო:

„გქონდათ თუ არა რაიმე კომუნიკაცია საქართველოში მმართველ პარტიასთან? და თუ ასეა, შეგიძლიათ გაგვიზიაროთ, რა ტიპის კომუნიკაცია არსებობს ახლა თქვენ შორის? როგორც იცით, საქართველოში ძალიან მძიმე ვითარებაა, ქართველი ხალხი და საერთაშორისო საზოგადოება არჩევნების შედეგებს არ აღიარებს. დაკავებულები არიან აქციების მშვიდობიანი მონაწილეები, ასევე, ამჟამად ციხეში დამოუკიდებელი ჟურნალისტი იმყოფება. სწორედ ამ გარემოებების გათვალისწინებით, როგორია თქვენი ხედვა საქართველოში არსებულ ვითარებასთან დაკავშირებით?“

2025 წლის 15 მარტს საქართველოში ამერიკის შეერთებული შტატების ელჩი რობინ დანიგანი „ქართული ოცნების“ მთავრობის საგარეო საქმეთა მინისტრს, მაკა ბოჭორიშვილს საგარეო საქმეთა სამინისტროს შენობაში შეხვდა.

საელჩოს ცნობით, ელჩმა მაკა ბოჭორიშვილს „გააცნო პრეზიდენტ ტრამპისა და სახელმწიფო მდივან რუბიოს მთავარი პრიორიტეტები, ასევე, ის ნაბიჯები, რომლებიც საქართველოს შეუძლია გადადგას, რათა აჩვენოს ამერიკის შეერთებულ შტატებთან ურთიერთობის გაუმჯობესებისადმი სერიოზული დამოკიდებულება“.