ცესკო-ს განცხადებით, 26 ოქტომბრის საქართველოს პარლამენტის არჩევნებში მონაწილე პოლიტიკური პარტიების რეგისტრაცია დასრულდა.
ცენტრალური საარჩევნო კომისიის განცხადებით, 26 ოქტომბრის საქართველოს პარლამენტის არჩევნებში მონაწილე პოლიტიკური პარტიების რეგისტრაცია დასრულდა.
ცესკოს ცნობით, კანონით განსაზღვრული ვადა 30 აგვისტოს ამოიწურა, სადაც 27 პარტიაა დარეგისტრირებული.
ცენტრალური საარჩევნო კომისიის განმარტებით, წელს არჩევნებში მონაწილეობის უფლებისთვის ცესკოსთვის მომართვის ვადა განსხვავებული იყო.
“პოლიტიკური პარტიების ნაწილისთვის, რომლებსაც არჩევნების დანიშვნის დროისთვის არ ჰყავდათ მათი წარდგენით არჩეული პარლამენტის წევრები და კანონი რეგისტრაციისთვის 25 000 მხარდამჭერის ხელმოწერის წარმოდგენას ავალდებულებდა, ცესკოსთვის მომართვის ვადა 15 ივლისს ამოიწურა. მათგან ცესკოს რეგისტრაციისთვის 30-მა პოლიტიკურმა პარტიამ მომართა. მომართვების შედეგად, 30 პოლიტიკური პარტიიდან არ განხილულა 2-ის განაცხადი (ერთ შემთხვევაში საჯარო რეესტრის გადაწყვეტილებით პარტიის რეგისტრაციის გაუქმების გამო, მეორე შემთხვევაში – ხელმძღვანელის უფლებამოსილების შეწყვეტის გამო). ხოლო დარჩენილი 28 პარტიიდან რეგისტრაცია გაიარა 17-მა და უარი ეთქვა რეგისტრაციაზე 11-ს” – წერია განცხადებაში.
რაც შეეხება იმ პოლიტიკური პარტიებს, რომელთაც არჩევნების დანიშვნის დროისთვის ჰყავდათ მათი წარდგენით არჩეული პარლამენტის წევრები, მათგან ცესკოს 10-მა პარტიამ მიმართა და გაიარა რეგისტრაცია.
პოლიტიკური პარტიებისთვის შემდეგი ეტაპი პარტიული სიების წარდგენაა, რისთვისაც 26 სექტემბრამდეა ვადა. კანონმდებლობის მიხედვით, საარჩევნო სუბიექტი პარტიულ სიას ცესკოს თავმჯდომარეს არჩევნების დღემდე არაუგვიანეს 30-ე დღის წარუდგენს. თითოეულ პარტიის უფლებაა თითო პარტიული სიის წარდგენა.
პარტიულ სიაში პარლამენტის წევრობის კანდიდატების რიცხვი 30-ზე ნაკლები და 200-ზე მეტი არ უნდა იყოს. ერთი და იმავე მოქალაქის შეყვანა სხვადასხვა პარტიულ სიაში დაუშვებელია. პარტიული სიების წარდგენის შემდეგ კი წარმოდგენილი დოკუმენტაციის შემოწმება და რეგისტრაცია დაიწყება.
გარდა ამისა საოლქო საარჩევნო კომისიების მიერ საუბნო საარჩევნო კომისიების ხელმძღვანელი პირებისა და წევრების შესარჩევი კონკურსი გამოცხადდა. 3 030 საარჩევნო უბანზე ამომრჩევლებს სულ 51 510 კომისიის წევრი მოემსახურება, მათგან საოლქო საარჩევნო კომისიებმა უნდა აირჩიონ 9 090 ხელმძღვანელი პირი და 15 150 წევრი. დანარჩენ 27 270 წევრს კი უფლებამოსილი 9 პოლიტიკური პარტია დანიშნავს.
ცენტრალური საარჩევნო კომისია (ცესკო) გაცნობებთ, რომ კონკურსში მონაწილეობის მსურველებმა განცხადებით უნდა მიმართონ შესაბამის საოლქო საარჩევნო კომისიას 2-დან 5 სექტემბრის ჩათვლით 10:00-დან 18.00 საათამდე. ასევე, განმცხადებელმა საკონკურსო დოკუმენტაცია შესაძლებელია წარადგინოს სპეციალური ელექტრონული პლატფორმის (Konkursi.cec.gov.ge) საშუალებით.
პროცედურების გამარტივების მიზნით, ცესკომ მსურველთათვის შეიმუშავა განცხადების სარეკომენდაციო ფორმა, რომელიც ასევე ხელმისაწვდომია საოლქო საარჩევნო კომისიებში.
აღსანიშნავია, რომ კანონის მოთხოვნის შესაბამისად, წელს პირველად საოლქო საარჩევნო კომისია სერტიფიცირებულ საუბნო საარჩევნო კომისიის წევრებს აირჩევს. კანონმდებლობაში შესული ცვლილებების შესაბამისად, საოლქო საარჩევნო კომისიების მიერ არჩეული საუბნო საარჩევნო კომისიების წევრებისთვის სერტიფიკატის ფლობა სავალდებულო გახდა. სერტიფიკატის აღების მსურველებისთვის მაქსიმალური ხელშეწყობის მიზნით საარჩევნო ადმინისტრაციამ მთელი ქვეყნის მასშტაბით რამდენჯერმე გაუწია ორგანიზება სერტიფიცირების გამოცდებს. გამოცდები 2023 წლის სექტემბრიდან 2024 წლის ივლისის ჩათვლით ჯამურად სულ 9-ჯერ ჩატარდა. 5 გამოცდა – საუბნო საარჩევნო კომისიის ხელმძღვანელი პირებისთვის (მათ შორის, 2 გამოცდა ჩატარდა ეთნიკური უმცირესობების ენებზე ნათარგმნი ტესტების გამოყენებით), ხოლო 4 გამოცდა – საუბნო საარჩევნო კომისიის წევრებისთვის (მათ შორის, 2 გამოცდა ჩატარდა ეთნიკური უმცირესობების ენებზე ნათარგმნი ტესტების გამოყენებით). საერთო ჯამში სერტიფიცირებულია 34 000-მდე პირი. ამასთან, საარჩევნო ადმინისტრაციამ, ბოლო წელიწადნახევრის განმავლობაში, არაერთი საგანმანათლებლო და სასწავლო პროექტი განახორციელა, რომელიც მიზნად ისახავდა პოტენციური წევრების ინფორმირებასა და შესაძლებლობების განვითარებას.
აქვე გვინდა აღვნიშნოთ, რომ არსებული გამოცდილებიდან გამომდინარე, არ გამოვრიცხავთ დაინტერესებული მხარეების მხრიდან საუბნო საარჩევნო კომისიების წევრების შერჩევის პროცესის დისკრედიტაციის მცდელობას. ხაზგასმით ვაცხადებთ, რომ საარჩევნო ადმინისტრაცია თავის საქმიანობას კანონმდებლობის სრული დაცვითა და საერთაშორისო სტანდარტების შესაბამისად ახორციელებს და მოვუწოდებთ ჩართულ მხარეებს, უსაფუძვლო და მანიპულაციური განცხადებებით ნუ დააზიანებენ საარჩევნო პროცესის ისეთ მნიშვნელოვან ეტაპს, როგორიცაა საუბნო საარჩევნო კომისიების დაკომპლექტება.
