უკრაინაში დაღუპული ზაქარია შუბითიძე ლაგოდეხში გადაასვენეს
იგი რუსეთ-საქართველოს 2008 წლის ომის მონაწილეცაა
“უკრაინაში მებრძოლ ქართველებშიც, ერთ- ერთი გამორჩეული ბიჭი იყო”- უკრაინაში დაღუპული ზაქარია შუბითიძე კახეთში, მშობლიურ ლაგოდეხში გადაასვენეს.
გარდაცვლილს ადგილობრივი მოსახლეობა, ახლობლები და მეგობრები დახვდნენ.
ზაქარია შუბითიძის მეგობრები ამბობენ, რომ მამაკაცმა ომის დაწყების დღიდან, ლაგოდეხში სამსახური მიატოვა და უკრაინაში წავიდა.
” უკრაინაში მებრძოლებშიც ერთ-ერთი გამორჩეული იყო. სამაშველო სამსახურში მუშაობდა აქ. ომი როგორც დაიწყო, მიატოვა ყველაფერი და წავიდა. ზაქარია გმირია, გმირებს შორის, ის რუსეთ-საქართველოს 2008 წლის ომის მონაწილეცაა და ჩვენი სამშობლო დგას ასეთ კაცებზე”- ამბობს ერთ-ერთი მეგობარი.
ზაქარია შუბითიძე უკრაინაში, დონეცკის ინტენსიური დაბომბვის დროს დაიჭრა. ექიმებმა მისი გადარჩენა ვერ შეძლეს.
გარდაცვლილს მეუღლე და ორი მცირეწლოვანი შვილი დარჩა.
ზაქარია შუბითიძეს, ხუთშაბათს, 28 სექტემბერს დაკრძალავენ.
