უკრაინიდან რუსეთში იძულებით 33 000 ადამიანი გაიყვანეს

რუსებმა უკრაინის ქალაქ მარიუპოლიდან რუსეთში იძულებით 33 000 ადამიანი გაიყვანეს.

ამ ინფორმაციას უკრაინის სახალხო დამცველი ლუდმილა დენოსივა ავრცელებს.

„დღეს მდგომარეობით, რუსეთის ფედერაციასა და დონეცკის ოლქის დროებით ოკუპირებულ ტერიტორიებზე იძულებით დეპორტირებული 33 000 მოქალაქის მონაცემები დადასტურდა. მოწმეები აცხადებენ, რომ „რაშისტები“ და „კადიროველები“ ადგილობრივებს უკანონოს აპატიმრებენ, აწამებენ და სჯიან პრო-უკრაინული პოზიციის ნებისმიერი გამოვლინებისთვის. რუსული არმიის ქმედებები მარიუპოლში არის უკრაინელი ხალხის წინააღმდეგ ჩადენილი გენოციდი.”, – განაცხადა მან.

რუსეთი არ შეაჩერებს უკრაინაში მის „სამხედრო ოპერაციას“ სამშვიდობო მოლაპარაკებების შემდეგი რაუნდის გამართვამდე, – ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა.

ლავროვმა განმარტა, რომ რუსეთის პრეზიდენტმა ვლადიმერ პუტინმა სამხედრო მოქმედებების შეჩერების ბრძანება მოლაპარაკებების პირველი რაუნდის მიმდინარეობისას გასცა, თუმცა რუსეთის პირველი დიპლომატის თქმით, მას შემდეგ მოსკოვის პოზიცია შეიცვალა.

საგარეო საქმეთა მინისტრის განცხადებით, ის ვერ ხედავს მიზეზს, რატომ არ უნდა გაგრძელდეს მოლაპარაკებები, თუმცა მტკიცედ დგას პოზიციაზე, რომ მოსკოვმა არ უნდა შეაჩეროს ოპერაციის მიმდინარეობა, როცა მხარეები კვლავ შეიკრიბებიან.

„მას შემდეგ, რაც დავრწმუნდით, რომ უკრაინელები არ გეგმავდნენ საპასუხო ქმედებას, მივიღეთ გადაწყვეტილება, რომ მოლაპარაკებების შემდეგი რაუნდის განმავლობაში არ იქნებოდა პაუზა, სანამ საბოლოო შეთანხმება არ იქნება მიღწეული”, – განაცხადა ლავროვმა.

რუსეთი უკრაინაში 24 თებერვალს შეიჭრა და ამ ყველაფერს პუტინმა “სპეცოპერაცია” დაარქვა.