ამერიკა უკრაინას საბრძოლველად კასეტურ ბომბებს გადასცემს
ამერიკის შეერთებული შტატების პრეზიდენტის, ჯო ბაიდენის განცხადებით, უკრაინისთვის კასეტური საბრძოლო მასალის გადაცემის გადაწყვეტილება რთულად მიიღო, მაგრამ პრეზიდენტის თქმით, დღეს ეს იარაღი კიევს სჭირდება.
CNN-ისთვის მიცემულ ინტერვიუში ჯო ბაიდენმა თქვა, რომ გადაწყვეტილების მიღებამდე მან კონსულტაციები გაიარა მოკავშირეებსა და პარტნიორებთან, ასევე კონგრესის წევრებთან.
„ეს ძალიან რთული გადაწყვეტილება იყო. ამ საკითხზე ვიმსჯელეთ ჩვენს მოკავშირეებთან, ჩვენს მეგობრებთან. უკრაინას ისევ სასტიკად უტევენ ამ კასეტური იარაღით, რაც მათი მოსახლეობისთვის სახიფათოა. ეს ის ომია, რომელიც დაკავშირებულია საბრძოლო მასალასთან. მათ კი ეწურებათ ეს საბრძოლო მასალა. ის ჩვენც ცოტა გვაქვს, ამიტომ, მე გავითვალისწინე თავდაცვის უწყების რეკომენდაცია, რომ – არა მუდმივად, მაგრამ სწორედ ამ გარდამავალ პერიოდში მიგვეცა ეს იარაღი უკრაინელებისთვის“, – თქვა ბაიდენმა.
უკრაინამ აშშ-ს კასეტური საბრძოლო მასალის გადაცემა რამდენიმე თვის წინ სთხოვა. ვაშინგტონს ამ საკითხის გადასაწყვეტად დრო დასჭირდა.
ეროვნული უსაფრთხოების საკითხებში თეთრი სახლის მრჩეველმა ჯეიკ სალივანმა 7 ივლისს განაცხადა, რომ აშშ მიაწოდებს უკრაინას კასეტურ საბრძოლო მასალებს, რათა შეასრულოს მხოლოდ თავისი ტერიტორიის დაცვის მიზნით გამოყენებისთვის იარაღის მიწოდების თხოვნა.
სალივანმა დასძინა, რომ უკრაინამ არ უნდა გამოიყენოს ეს იარაღი სხვა ქვეყნის ტერიტორიაზე, არამედ მხოლოდ საკუთარი ტერიტორიის დასაცავად.
აშშ-ის თავდაცვის დეპარტამენტი უკრაინისთვის კასეტური ბომბების გადაცემას ადასტურებს.
ამის შესახებ აშშ-ის თავდაცვის მდივნის პოლიტიკურ საკითხებში მოადგილემ კოლინ კალმა ბრიფინგზე განაცხადა.
მისი თქმით, სამხედრო დახმარების პაკეტში, რომელიც უკრაინას აშშ-ის არმიის მარაგებიდან გადაეცემა, შედის კასეტური ბომბები, 155 მმ კალიბრის საბრძოლო მასალა (ორმაგი დანიშნულების DPICM საბრძოლო მასალა), 105 მმ ჭურვები, ასევე საბრძოლო მასალა Patriot და HIMARS სისტემებისთვის.
ამას გარდა, აშშ კიევს დამატებით Bradley და Stryker ჯავშანტექნიკას, მაღალი სიზუსტის საავიაციო ჭურვებს, ასევე რემონტისთვის და მომსახურებისთვის ნაწილებს გადასცემს.
კალის თქმით, სამხედრო დახმარების ახალი პაკეტი შესაძლებელს გახდის უკრაინას “საბრძოლო მასალის ასობით ათასი ერთეული დაუყონებლივ” გადაეცეს.
კასეტური იარაღის გამოყენება აკრძალულია საერთაშორისო კონვენციით (CCM), რომელშიც 2008 წლის მაისის შემდეგ გაერთიანებულია ასზე მეტი ქვეყანა. აშშ, ასევე რუსეთი და უკრაინა, არ არიან კასეტური იარაღის აკრძალვის კონვენციის მონაწილეები.
