ვინც უკრაინის წინააღმდეგ ომში ჩაერთვება პუტინი მოქალაქეობას სთავაზობს-პუტინის ახალი კანონი
რუსეთის პრეზიდენტმა ვლადიმირ პუტინმა ხელი მოაწერა განკარგულებას რუსეთის მოქალაქეებად იმ უცხოელების მიღების შესახებ, რომლებიც სპეციალური სამხედრო ოპერაციის დროს (რუსეთი ასე უწოდებს ფართომასშტაბიან ომს უკრაინაში.რედ.) რუსეთის არმიაში ან „სამხედრო ფორმირებებში“ ჩაირიცხებიან.
ამავე დროს, პუტინის განკარგულებაში ხაზგასმულია, რომ რუსეთის მოქალაქეობა მიენიჭებათ მხოლოდ იმ უცხოელებს, რომლებიც ომში მონაწილეობის კონტრაქტს სულ მცირე ერთი წლით მოაწერენ ხელს. ცნობისთვის ამ გადაწყვეტილების მიხედვით, უცხო ქვეყნის მოქალაქეები, რომლებიც უკრაინის წინააღმდეგ ომის დროს რუსეთის შეიარაღებულ ძალებს შეუერთდებიან, მოქალაქეობის მიღებას შეძლებენ.
გარდა ამისა, რუსეთის მოქალაქეობის მისაღებად შესაბამის ორგანოებს შეუძლიათ მიმართონ იმ დაქირავებულებმაც, რომლებიც სამხედრო სამსახურიდან ჯანმრთელობის მდგომარეობის, ზღვრული ასაკის ან ხელშეკრულების ვადის ამოწურვის გამო გათავისუფლდნენ.
იგივე წესი გავრცელდება მათი ოჯახის წევრებზეც. რუსეთის თავდაცვის დეპარტამენტთან ხელშეკრულება მინიმუმ ერთი წლით უნდა გაფორმდეს.
ცნობისთვის პუტინმა ასევე უფლება მისცა უკრაინის, ერაყის, სირიის, ავღანეთისა და იემენის მოქალაქეებს, მიიღონ რუსეთის მოქალაქეობა გამარტივებული წესით.
ახალი წესები არ მოითხოვს რუსული ენის ცოდნას, ისტორიის შესწავლას, კანონმდებლობას და არ მოითხოვს რუსეთში 5 წლიან ცხოვრებას.
2023 წლის მაისში პუტინმა ხელი მოაწერა ბრძანებულებას რუსეთის მოქალაქეობის მიღების გამარტივებული პროცედურის შესახებ იმ უცხოელებისთვის, რომლებმაც ხელი მოაწერეს კონტრაქტს თავდაცვის სამინისტროსთან და იბრძვიან უკრაინის ტერიტორიაზე.
რუსეთში ბოლო რამდენიმე თვის განმავლობაში მიგრანტებზე რეიდები გახშირდა: ადამიანებს იჭერენ ბაზრებში, სამშენებლო ობიექტებზე, საერთო საცხოვრებლებში, მეჩეთებსა და მასობრივი შეკრების სხვა ადგილებში. უსაფრთხოების ძალები აწყობენ რეიდებს სამხედრო კომისარიატების თანამშრომლებთან ერთად, ურიგებენ გამოძახების უწყებებს ადგილზე დაჭერილებს ან დაუყოვნებლივ აწვდიან მათ მონაცემებს სამხედრო კომისარიატებს.
რუსეთში შრომითი მიგრანტების უმრავლესობას ყოფილი საბჭოთა რესპუბლიკების წარმომადგენლები შეადგენენ. ბევრმა მათგანმა უკვე მოახერხა რუსეთის მოქალაქეობის მიღება, რის გამოც ისინი ვალდებული არიან წავიდნენ უკრაინაში მიმდინარე ომში.
