„ბროლში“ სპეცრაზმი შევიდა
ლილოს დასახლებაში, კომპანია „ბროლის“ ტერიტორიაზე საგამოძიებო მოქმედებები მიმდინარეობს. ადგილზე დიდი რაოდენობით სამართალდამცველები არიან მობილიზებული.
როგორც კომპანიის წარმომადგენლები აცხადებენ, ადილზე დილით მისულებს გენერალური პროკურატურის წარმომადგენლები და ფინანსური პოლიციის სპეციალური დანიშნულების რაზმის წევრები დახვდნენ და როგორც განუმარტეს, დოკუმენტების ამოღების მიზნით.
„არ ვიცი, რა ტენდენციები მიდის, მაგრამ „ქართული ოცნება“ პროკურატურის და ფინანსური პოლიციის დახმარებით მასობრივად შედის თითქმის ყველა ბიზნესში. სავარაუდოდ, ეს ბიუჯეტის სერიოზული დეფიციტია და ასე, უკანონო გზებით სურთ ფინანსების ამოღება. როდესაც ბიზნესთან მიდიხარ, შეგიძლია, სასამართლოს გადაწყვტილება, გადაუდებელი აუცილებლობის მოთხოვნა წარადგინო, მაგრამ ის, რომ საბუთრბის ამოღებას 100 სპეცრაზმელი არ სჭირდება, ეს ყველასთვის ნათელია. ეს ბიზნესის პირდაპირი ტერორია. ეს არის იმ ბიზნესმენების ტერორი, რომლებიც „ქართული ოცნების“ შემომწირველები არ არიან“,– აცხადებენ კომპანიის წარმომადგენლები და დასძენენ, რომ „სადღაც, კალაძის, ან რომელიმე ბიზნესის ინტერესი გადაიკვეთა და სასწრაფოდ შემოვიდა 100–კაციანი სპეცრაზმი, რომ ბიზნესი გააჩერონ. პირდაპირ ვიტყვი, ეს ბიზნესზე წინასაარჩევნო ზეწოლაა“.
გამომძიებელი აცხადებს, რომ საქმე ეხება ტრანსნაციონალური ხასიათის, ათეულობით მილიონი სხვადასხვა ვალუტის თანხების შესაძლო გათეთრებას.
“საქართველოს გენერალური პროკურატურის საგამოძიებო ნაწილში მიმდინარეობს გამოძიება სისხლის სამართლის საქმეზე, ჯგუფურად განხორციელებული უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობის შემოსავლის მიღება, საქართველოს სისხლის სამართლის კოდექსის 194-ე მუხლის მეორე ნაწილის „ა“ და ამავე მუხლის მესამე ნაწილის ,,გ“ ქვეპუნქტებით გათვალისწინებული დანაშაულის ნიშნებით. საქმე ეხება ტრანსნაციონალური ხასიათის, ათეულობით მილიონი სხვადასხვა ვალუტის თანხების შესაძლო გათეთრებას. აღნიშნულ სისხლის სამართლის საქმეზე, გამოძიებისთვის მნიშვნელოვანი დოკუმენტაციის და ელექტრონული ინფორმაციის მატარებელი მოწყობილობების, ასევე დანაშაულებრივი გზით მოპოვებული თანხების მოძიება-ამოღების მიზნით, 2020 წლის 13 ოქტომბერს, თბილისის საქალაქო სასამართლოს მოსამართლის განჩინების საფუძველზე, თბილისში მდებარე რამოდენიმე ობიექტში ჩატარდა საგამოძიებო მოქმედება – ჩხრეკა, რა დროსაც გამოძიებისთვის მნიშვნელოვან დოკუმენტაციასთან ერთად ამოღებული იქნა განსაკუთრებით დიდი ოდენობით თანხები. საგამოძიებო მოქმედებების შედეგად ამოღებული ფასეულობების უსაფრთხო ტრანსპორტირების უზრუნველყოფის მიზნით, გამოყენებული იქნა სპეციალური დანიშნულების რაზმის თანამშრომლები. საქმეზე გრძელდება გამოძიება. საჯარო ინტერესის გათვალისწინებით, საქართველოს პროკურატურა პერიოდულად მოახდენს საზოგადოების ინფორმირებას გამოძიების შედეგების თაობაზე”, – ნათქვამია პროკურატურის განცხადებაში.
