ზოგიერთი რუსული ქვედანაყოფი, უარს ამბობს უმაღლესი სარდლობის ბრძანებების შესრულებაზე
რუსებმა უკვე გააცნობიერეს, რომ მასიური თავდასხმები არ არის ის შედეგი, რასაც ელოდნენ
უკრაინის თავდაცვის მინისტრის მოადგილის, ანა მალიარის განცხადებით, რუსეთის საოკუპაციო ძალები კვლავ განიცდიან მძიმე დანაკარგებს ზოგიერთი ქვედანაყოფი მათ შორის დონეცკის ოლქის უგლედარის მახლობლად, რუსეთის სარდლობის ბრძანებების შესრულებაზე უარს ამბობს.
“რუსული საოკუპაციო ჯარები კვლავ დიდ დანაკარგებს განიცდიან. ზოგიერთი ქვედანაყოფი [რუსეთის] სარდლობის ბრძანებების შესრულებაზე უარს ამბობს, მათ შორის დონეცკის ოლქის ვუჰლედარის მახლობლად. მოხალისეთა რაზმი, რომელსაც დაევალა რუსეთის ფედერაციის წყნარი ოკეანის ფლოტის 155-ე ცალკეული საზღვაო ბრიგადის გაძლიერება, უარს ამბობს მონაწილეობა მიიღოს შეტევაში და შეასრულოს არაკომპეტენტური სარდლობის ბრძანებები. ეს ტენდენცია შეინიშნება მტრის სხვა დანაყოფებშიც რუსების რეალური დანაკარგების შესახებ ინფორმაცია სწრაფად ვრცელდება სამხედროებს შორის და მტრის პერსონალის დემორალიზებას იწვევს”, – თქვა უკრაინის თავდაცვის მინისტრის მოადგილემ.
თავდაცვის სამინისტროს ცნობით, ქვედანაყოფების აჯანყებასთან დაკავშირებით, საოკუპაციო ძალების სარდლობამ გააძლიერა იძულებითი და სადამსჯელო ღონისძიებების განხორციელება, ცდილობდა სამხედრო დისციპლინის მდგომარეობის გაუმჯობესებას.
ვუჰლედართან რუსული არმიის უზარმაზარი დანაკარგები ბრიტანულმა დაზვერვამაც დაადასტურა. ანალიტიკოსების თქმით, რუსული ძალები თავდასხმების დროს დღეში 150-დან 300-მდე ოკუპანტს კარგავდნენ.
უკრაინის სამხრეთის შეიარაღებული ძალების პრესცენტრის ხელმძღვანელის, ნატალია ჰუმენიუკის განცხადებით, რუსებმა უკვე გააცნობიერეს, რომ მასიური თავდასხმები არ არის ის შედეგი, რასაც ელოდნენ.
“რუსეთმა, შესაძლოა, უკრაინაზე მიზანმიმართული სარაკეტო დარტყმები განახორციელოს. რა იქნება – ეს უკვე დამოკიდებულია იმაზე, თუ რა ტაქტიკას აირჩევს მტრის სარდლობა. მათ უკვე გააცნობიერეს, რომ მასიური თავდასხმები არ არის ის შედეგი, რასაც ელოდნენ”, – თქვა უკრაინის სამხრეთის შეიარაღებული ძალების პრესცენტრის ხელმძღვანელმა.
1 მარტს ჰუმენიუკმა განაცხადა, რომ უკრაინაზე რუსული სარაკეტო თავდასხმის საფრთხე კვლავ ძალიან მაღალია. მისი თქმით, რუსები ახალ ტაქტიკას ეძებენ საჰაერო თავდაცვის გვერდის ავლით.
მიკოლაივის რეგიონული სამხედრო ადმინისტრაციის ხელმძღვანელის თქმით, უკრაინელები ამ დღეებში ყველაფრისთვის მზად უნდა იყვნენ, რადგან რუსები მასიური თავდასხმისთვის ემზადებიან.
