გადაცემა „რეალური სივრცე“ დაიხურა

გადაცემა „რეალური სივრცე“ საზოგადოებრივი მაუწყებლის ეთერში ვეღარ გავა. გუნდის წევრებმა მაუწყებლის შენობის წინ ჟურნალისტებს განუცხადეს, რომ მენეჯმენტმა გადაცემა ფაქტობრივად დახურა რაც გადაცემის წამყვან ნინო ზაუტაშვილთან შრომითი ურთიერთობა შეწყვიტა.

რეპორტიორმა თამარ მშვენიერაძემ წაიკითხა საჯარო განცხადება, რომლის მიხედვითაც, საზოგადოებრივი მაუწყებლის მენეჯმენტმა „რეალური სივრცის“ გუნდს წერილობით აცნობა, რომ რადგან გადაცემის წამყვანსა და სახესთან ნინო ზაუტაშვილთან შრომითი ურთიერთობა შეწყდა, ტოკშოუს გაგრძელება აღარ იგეგმება. გუნდის წევრებს შესთავაზეს, მუშაობა გაეგრძელებინათ რადიოს დილის გადაცემაში, საიტზე, პრომოუშენის დეპარტამენტში, მუსიკალურ გადაცემაში. „აშკარაა მენეჯმენტის განზრახვა, გუნდი დანაწევრდეს და გუნდის ვერცერთმა წევრმა ვერ მოახერხოს იმის გაკეთება, რისი კეთების გამოცდილება და კვალიფიკაცია აქვს, არ აკეთოს გადაცემა, რომელიც, ვფიქრობთ, ახლა განსაკუთრებით სჭირდება საზოგადოებას, რომელიც პირდაპირ პასუხობს მაუწყებლის მთავარ ფუნქციას, ისმოდეს საზოგადოების ხმა საზოგადოებრივ მაუწყებელზე, – განაცხადა თამარ მშვენიერაძემ, – მენეჯმენტის მიერ გამოგზავნილ შეთავაზებაზე ხელის მოწერა ნიშნავს, რომ საკუთარი ნებით მოვაწეროთ ხელი იმ სივრცის დახურვას, რომელიც თქვენთვის შევქმენით, ამიტომ უარს ვამბობთ მენეჯმენტის შემოთავაზებაზე, რომელმაც უკვე გვითხრა, რომ უარი ნიშნავს ჩვენთან შრომითი ხელშეკრულების გაწყვეტას“.

გადაცემა „რეალური სივრცე“ 12 წლის წინ შეიქმნა და ეთერში ყოველთვიურად გადიოდა. ერთი პერიოდი, ის ყოველდღიურიც იყო.

„დღეს ვასილ მაღლაფერიძეს სჭირდება მხოლოდ მისი პოლიტიკის ერთგული კადრები. ეს თუ მას გაუვიდა, მაყურებელი ვერ ნახავს იმ სოციალური თემების სიღრმისეულ განხილვას, რომელსაც წლების განმავლობაში „რეალურ სივრცეში“ უყურებდა… თქვენ შეგექმნებათ შთაბეჭდილება, რომ ყველაფერი არის ძალიან კარგად, როდესაც თქვენს გარშემო მძვინვარებს ქარიშხალი“, – თქვა ვასილ ივანოვ-ჩიქოვანმა, საინფორმაციო გამოშვება „მოამბის“ ყოფილმა წამყვანმა. ჟურნალისტები და ტელეწამყვანები, ვასილ ივანოვ-ჩიქოვანი და ნინო ზაუტაშვილი, რომლებიც აკრიტიკებდნენ საზოგადოებრივი მაუწყებლის მიკერძოებულ სარედაქციო პოლიტიკას „ქართული ოცნებისადმი“ და ღიად გამოხატავდნენ თანადგომას პატიმარი ჟურნალისტის, მზია ამაღლობელის მიმართ, საზოგადოებრივი მაუწყებლიდან 11 აპრილს გაათავისუფლეს.

გადაცემა „რეალური სივრცის“ გუნდი აცხადებს, რომ საზოგადოებრივი მაუწყებლის მენეჯმენტის მიერ გადაცემის დახურვასთან დაკავშირებით გაგზავნილ დოკუმენტს ხელს არ მოაწერენ და შესაბამისად, უარს ამბობენ მაუწყებლის სხვადასხვა არხსა თუ გადაცემაში დასაქმებაზე. ამის შესახებ გადაცემის თანამშრომლების მიერ გავრცელებულ განცხადებაშია ნათქვამი.

როგორც განცხადებაშია აღნიშნული, მენეჯმენტის მიერ გამოგზავნილ შეთავაზებაზე ხელის მოწერა ნიშნავს, რომ „საკუთარი ნებით მოვაწეროთ ხელი ამ გადაცემის დახურვას“.

„30 აპრილს საქართველოს საზოგადოებრივი მაუწყებლის მენეჯმენტმა გადაცემა „რეალური სივრცის“ გუნდს წერილობით აცნობა შემდეგი გადაწყვეტილება:

„იმის გათვალისწინებით, რომ 2025 წლის 11 აპრილს შრომითი ურთიერთობა შეწყდა აღნიშნული ტოქ-შოუს წამყვანთან და სახესთან, ნინო ზაუტაშვილთან ხსენებული თოქ-შოუს საპროექტო ვადის გაგრძელება აღარ იგეგმება“.

ამავე დოკუმენტიდან ირკვევა, რომ „საზმაუს“ მენეჯმენტის სურვილია დაშალოს „რეალური სივრცის“ გუნდი და საკუთარი გადაწყვეტილებით გაანაწილოს მაუწყებლის სხვადასხვა არხსა თუ გადაცემაზე.

ჩვენ შემოგვთავაზეს მუშაობა გავაგრძელოთ საზოგადოებრივი მაუწყებლის რადიოს დილის გადაცემაში, ვებ-გვერდზე, „პრომოუშენის“ დეპარტამენტში, მუსიკალურ გადაცემაზე.

ჩვენ არ ვაკნინებთ მაუწყებლის არცერთ შემოქმედებით რედაქციას ან გადაცემას, მაგრამ აშკარაა მენეჯმენტის განზრახვა, რომ გუნდი დანაწევრდეს და მისმა ვერცერთმა წევრმა ვერ მოახერხოს იმის გაკეთება, რისი კეთების გამოცდილება და კვალიფიკაციაც აქვს; არ აკეთოს გადაცემა, რომელიც ვფიქრობთ, ახლა განსაკუთრებით სჭირდება საზოგადოებას, რომელიც პირდაპირ პასუხობს საზოგადოებრივი მაუწყებლის მთავარ ფუნქციას – ისმოდეს საზოგადოების ხმა საზოგადოებრივ მაუწყებელზე.

„რეალური სივრცე“ 12 წლის წინ შეიქმნა. ამ ხნის განმავლობაში, ჩვენი მიზანი იყო, რომ ადამიანებისა და მათ მიერ დაქირავებულ სახელმწიფო მოხელეებს, პოლიტიკურ ოფიციოზს შორის თანასწორი დისკუსიის შესაძლებლობა და ველი შეგვექმნა.

გადაცემის არსებობის 12 წლის თავზე, შეგვიძლია თამამად და სიამაყით ვთქვათ, რომ თითქმის არ არსებობს მწვავე სოციალური თემა, რომლისთვისაც პირდაპირი ეთერი არ დაგვითმია.

შეიძლება უკლებლივ ყველა მოქალაქეს, ვინც „საზმაუს“ კართან დადგა ვერ დავუთმეთ სივრცე, მაგრამ რაც 12 წლის განმავლობაში ასობით გადაცემამ დაიტია, იმდენი ადამიანის, ადამიანთა ჯგუფის, ქალაქის, სოფლის თუ დაბის პრობლემა მოვისმინეთ ჩვენ და მოვიტანეთ თქვენამდე.

აქვე ერთი, შეიძლება ვინმესთვის უმნიშვნელო დეტალი – ჩვენს სამუშაო ოთახთან მოსასვლელად მოქალაქეს არ სჭირდებოდა საშვი, ამიტომ თითქმის ყოველ დილას ჩვენს კარზე აკაკუნებდა მოქალაქე კითხვით – აქ არის „რეალური სივრცე“?

მენეჯმენტის მიერ გამოგზავნილ შეთავაზებაზე ხელის მოწერა ნიშნავს, რომ საკუთარი ნებით მოვაწეროთ ხელი ამ გადაცემის, ანუ იმ სივრცის დახურვას, რომელიც თქვენთვის შევქმენით.

ამიტომ, ჩვენ უარს ვამბობთ მენეჯმენტის შემოთავაზებაზე, რომელმაც უკვე გვითხრა, რომ უარი ნიშნავს შრომითი ხელშეკრულების გაწყვეტას.

დავარქვათ ყველაფერს თავისი სახელი. საზოგადოებრივი მაუწყებლის დღევანდელმა მენეჯმენტმა, იმ კონკრეტული სახელებით და გვარებით, რომლებსაც შეინახავს ამ არხის საქმის წარმოების დეპარტამენტი, დახურა 12-წლიანი ისტორიის გადაცემა – „რეალური სივრცე“ და უკანონოდ გაუშვა მისი წამყვანი ნინო ზაუტაშვილი.

დასასრულს, მხნეობას და მედგრად ყოფნას ვუსურვებთ ჩვენს კოლეგებს და თანამოაზრეებს იმ გუნდიდან, რომელსაც ჰქვია „საზმაუს“ მცველები, რომლებიც რჩებიან საზოგადოებრივ მაუწყებელში და აგრძელებენ უმნიშვნელოვანეს ბრძოლას „საზმაუს“ იდეის დასაცავად.

ჩვენ ვრჩებით მათ გვერდით და გარედან არ დავაკლებთ ძალისხმევას, რომ საზოგადოებამ ბოლოსდაბოლოს მიიღოს ნამდვილი საზოგადოებრივი მაუწყებელი.

სოლიდარობა და თავისუფლება ჩვენს კოლეგას, მზია ამაღლობელს, რომლის სიტყვებიც – იბრძოლეთ, სანამ გვიანი არ არის – უნდა გვახსოვდეს. ჩვენი ბრძოლის ერთადერთი საშუალება კი სიმართლის თქვენამდე მოტანაა, გადაცემა „რეალური სივრცის“ გუნდს, ამ არხზე, ეს შესაძლებლობა აღარ აქვს.

აქვე, წარმატებას ვუსურვებთ „საზმაუს“ ყველა თანამშრომელს.

ყოველთვის არის შესაძლებლობა თქვენს სამონტაჟოებში, გადაღებისას, ტექსტის წერისას თუ პირდაპირ ეთერში, რომ შეძლოთ ამ პროფესიის ღირსების დაცვა. ჩვენ გვჯერა, რომ, უკვე, როგორც მაყურებლები, ისე გავიგონებთ თქვენს ხმას.

ამის მაგალითიც ჩვენ უკვე გვაჩვენეს ვასილ ივანოვ-ჩიქოვანმა, ნინო ზაუტაშვილმა და „საზმაუს“ უკლებლივ ყველა მცველმა“,- ნათქვამია „რეალური სივრცის“ ჯგუფის განცხადებაში.

გადაცემა “რეალური სივრცე” 12 წლის წინ შეიქმნა და წლების განმავლობაში ასახავდა სოციალურ და საზოგადოებრივ საკითხებს. ყოფილი წამყვანი ვასილ ივანოვ-ჩიქოვანი მიიჩნევს, რომ მაუწყებლის ახალ პოლიტიკას მხოლოდ ერთგული კადრები სჭირდება, ხოლო განსხვავებულ აზრს ეთერში აღარ დაუშვებს.

ჟურნალისტები ნინო ზაუტაშვილი და ვასილ ივანოვ-ჩიქოვანი, რომლებიც ღიად აკრიტიკებდნენ მაუწყებლის მიკერძოებულ სარედაქციო პოლიტიკას და მხარდაჭერას უცხადებდნენ პატიმარ ჟურნალისტ მზია ამაღლობელს, მაუწყებლიდან 11 აპრილს გაათავისუფლეს.