თბილისი პრაიდის მონაწილეებს აქვთ უფლება გამოხატონ აზრი -სალომე ზურაბიშვილი
თბილისი პრაიდის მიერ დაგეგმილ ღირსების მარშს საქართველოს პრეზიდენტი, სალომე ზურაბიშვილი ეხმაურება. როგორც მან განცხადა მისთვის მიუღებელია ძალადობის, მუქარის, ზეწოლისა და სიძულვილის ენის გამოყენების ნებისმიერი ფორმა.
“ჩემთვის მიუღებელია ძალადობის, მუქარის, ზეწოლისა და სიძულვილის ენის გამოყენების ყველანაირი ფორმა! მიუღებელია, რადგან ეს ადამიანების კონსტიტუციური უფლებების დარღვევაა. მიუღებელია ჩემთვის, როგორც კონსტიტუციის გარანტისა და დამცველისათვის.
მე ვთვლი, რომ ყველას აქვს უფლება გამოიყენოს სიტყვის თავისუფლება. ეს არის ჩვენი ძირძველი ტოლერანტობა, რომელიც ჩვენი იდენტობის ნაწილია. ამაზე აშენდა ჩვენი ქვეყანა და ამაზე განვითარდება ხვალაც. ამიტომ ასევე მიმაჩნია, რომ ყველას აქვს უფლება გამოსვლის. ასევე, თბილისი პრაიდის მონაწილეებს აქვთ უფლება გამოხატონ თავიანთი აზრი და გამოიყენონ ის უფლება, რომელიც ყველას კონსტიტუციური უფლებაა, კონსტიტუციისა და კანონის მიერ დადგენილ ნორმებში. ეს ჩვენი ქვეყნისა და ჩვენი ერთიანობისთვის მნიშვნელოვანია!”, – წერს სალომე ზურაბიშვილი.
შეგახსენებთ, რომ თბილისი პრაიდის კვირეული 1-დან 5 ივლისის ჩათვლით იქნება, 5 ივლისს კი ღირსების მარში გაიმართება.
