პროკურატურამ თამარ ბაჩალიაშვილის საქმის ერთ-ერთი ფიგურანტი დააკავა

პროკურატურამ თამარ ბაჩალიაშვილის საქმის ერთ-ერთი ფიგურანტი დააკავა.

საქმე ეხება დავით ფურცხვანიძეს, რომელმაც აჩალიაშვილის ოჯახის უფლებადამცველ მიხეილ რამიშვილს სატელიტური ფოტოები მიაწოდა.

პროკურატურის ინფორმაციით, მას ბრალად მტკიცებულების ფალსიფიკაციის და პირადი მოტივით მართლმსაჯულებისთვის ხელის შეშლის მიზნით ცრუ ინფორმაციის გავრცელება ედება.

“აღნიშნული საქმე თამარ ბაჩალიაშვილის გარდაცვალების საქმის გამოძიებიდან ცალკე გამოიყო. ამოღებულია დაკავებული დავით ფურცხვანიძის და მისი შვილის ტექნიკა და მობილური ტელეფონები. აღნიშნული ქმედება შეიცავდა შესაძლო დანაშაულის ნიშნებს, საჭიროებდა დამატებით საგამოძიებო მოქმედებების ჩატარებას, მათ შორის თამარ ბაჩალიაშვილის ოჯახის ადვოკატების მონაწილეობით. ვინაიდან ადვოკატების მოწმის სახით გამოკითხვა თამარ ბაჩალიაშვილის გარდაცვალების საქმეზე გამოძიების პროცესში გამოიწვევდა მოცემულ საქმეზე შემდგომი საადვოკატო საქმინობისგან მათ ჩამოშორებას, პროკურატურაში გადაწყვეტილება იქნა მიღებული და მოცემული საქმიდან ცალკე წარმოებად გამოიყო საქმე მტკიცებულებების ფალსიფიკაციის და კომპიუტერულ ტექნიკაში უნებართვოდ შეღწევის საქმე“,- განაცხადეს პროკურატურაში გამართულ ბრიფინგზე.

პროკურორ დავით გუმბერიძის განცხადებით, ფურცხვანიძე საზღვარგარეთ გამგზავრებას მოსალოდნელი პასუხისმგებლობისთვის თავის არიდების მიზნით აპირებდა.

“გამოძიებით დადგენილი გვაქვს, რომ ფურცხვანიძე აპირებდა საზღვარგარეთ წასვლას, მას უკვე ჰქონდა ბილეთები. რაც შეეხება იმას, რის ჩამოტანას აპირებდა, არ გავაკეთებთ განმარტებას. ჩვენ გვაქვს დასაბუთებული ვარაუდი, რომ იგი საზღვარგარეთ მიემგზავრებოდა იმ მიზნით, რომ თავი აერიდებინა მოსალოდნელი პასუხისმგებლობისთვის, რაც ეკისრება წაყენებული ბრალდებით. ეს ითვალისწინებს 6 წლით თავისუფლების აღკვეთას “,- განაცხადა გუმბერიძემ.

ბაჩალიაშვილის ოჯახის ადვოკატი, მიხეილ რამიშვილი, ფურცხვანიძის დაკავებას, გამოძებაში, პროკურატურაზე ზემდგომი პირების ჩართულობას უკავშირებს და მიიჩნევს, რომ მალე მასაც დააკავებენ.

“ნათლად ჩანს, რომ არათუ პროკურატურა, პროკურატურაზე ზემდგომი პირები არიან ჩართულები დანაშაულში. საქმეში, დანაშაულებრივი ჯგუფის მფარველობა მიმდინარეობს. დავით ფურცხვანაძის დაკავება პირდაპირ მიუთითებს, რომ არ უნდათ ის ამერიკის შეერთებულ შტატებში წავიდეს და ჩამოიტანოს დამატებითი მასალები, რომ ავტომობილი იქ არ იდგა, სადაც აღმოაჩინეს 18-დან 22 ივლისამდე. მფარველობა მიდის იმ დანაშაულებრივი ჯგუფის, რომელმაც ეს დანაშაული ჩაიდინა. ბატონი დავითის დაკავების შემდეგ, მეც დამაკავებენ. როგორ შეიძლება წყარო დააკავო, რა შუაშია?! ეს მე გადმომიგზავნა მასალები და მე გავასაჯაროვე, მტკიცებულებად რომ შეაფასეს. თუ გაყალბებაზეა საუბარი, რა გაყალბდა?! რაში მედავებიან?! ჩემამდე არ დადის, მე ეს სატელიტის ფოტოები არა მტკიცებულებად, არამედ ინფორმაციად მოვიტანე. გამოდის, რომ მალე მეც დამაკავებენ და საქმესაც ჩამომაშორებენ. აქ უკვე ნათლად ჩანს, რომ არათუ პროკურატურა, პროკურატურაზე ზემდგომი პირები არიან ჩართულები ამ დანაშაულში, რომლებიც ნათლად, პირდაპირ მიუთითებენ მფარველობაზე. პირდაპირ არის მითითება, რომ მკვლელობაა ჩადენილი ბაჩალიაშვილის მიმართ, თორემ ამხელა მფარველობა, ამხელა ჩართულობა ამ პატარა საქმის მიმართ, რაც დაკავშირებულია დავით ფურცხვანიძის დაკავებასთან და ახლა ჩემი მისამართით გადასვლა… წყაროს დაკავება რომელ საუკუნეში, რომელ ქვეყანაში მომხდარა? ამგვარი რამ წარმოუდგენელია”, – განაცხადა რამიშვილმა.

შეგახსენებთ, რომ დავით ფურცხვანიძემ თამარ ბაჩალიაშვილის ოჯახის ადვოკატს იმ ადგილის სატელიტური ფოტოები გადასცა, სადაც გარდაცვლილი პროგრამისტი იპოვეს. ფოტოების მიხედვით, ბაჩალიაშვილის მანქანა რამდენიმე დღის განმავლობაში არ იდგა იქ, სადაც იპოვეს.

ფურცხვანიძე მიიჩნევს, რომ თამარ ბაჩალიაშვილს მნიშვნელოვან ინფორმაციაზე მიუწვდებოდა ხელი.

„თამარი იყო ის სპეციალისტი, რომელსაც ხელი მიუწვდებოდა ძალიან მნიშვნელოვან და სერიოზულ ინფორმაციაზე, თვითონაც იყო ინფორმაციის მატარებელი. ამის გარდა ძალიან კარგი სისტემატიკოსი იყო. მაქვს ანალიტიკური სააგენტო, რომელიც აკეთებს გარკვეულ მოკვლევებს, იძიებს ამა თუ იმ კანონდარღვევით მიმდინარე პროცესებს, საერთაშორისო ფორმატში ძირითადად. ეს არის ნაწილი იმ საქმისა, რომელიც ეხებოდა ძირითადად მსხვილ ფინანსურ აფიორას რაღაც კუთხით და თამარი იყო იმ ქვესტრუქტურაში შემავალი“,- მიიჩნევს ფურცხვანიძე.

ცნობისთვის, 23 წლის თამარ ბაჩალიაშვილი 18 ივლისის დილით ფონიჭალიდან, სახლიდან საკუთარი ავტომობილით გავიდა და მას შემდეგ აღარ გამოჩენილა. დედის თქმით, დაახლოებით დღის პირველი საათისთვს მას ტელეფონი უკვე გამორთული ჰქონდა. თამარ ბაჩალიაშვილის ავტომობილი კამერებმა თეთრიწყაროს მუნიციპალიტეტის სოფელ ხაიშში შესვლის დროს დააფიქსირეს. ოჯახისთვის გაუგებარია, რატომ წავიდა თამარი ამ მიმართულებით, რადგან ხაიშში არც ნათესავები ჰყავს და არც მეგობრები. 5 დღის ძიების შემდეგ, ბაჩალიაშვილი ტყეში, მანქანაში გარდაცვლილი იპოვეს.

პროკურატურა, ექსპერტიზის დასკვნის საფუძველზე, მისი გარდაცვალების მიზეზად, მედიკამენტოზურ ინტოქსიკაციას ასახელებს, ოჯახი კი თვითმკვლელობას გამორიცხავს.