რუსეთს არ დაუწყია საომარი მოქმედებები უკრაინაში

რუსეთს არ დაუწყია საომარი მოქმედებები უკრაინაში, მაგრამ ცდილობს დაასრულოს. რუსული მედიის ინფორმაციით, ამის შესახებ რუსეთის პრეზიდენტმა ვლადიმერ პუტინმა უკრაინაში მიმდინარე ომთან დაკავშირებით, საავიაციო ინდუსტრიის წარმომადგენლებთან შეხვედრაზე განაცხადა.

პუტინის მტკიცებით, საომარი მოქმედებები უკრიანაში „ნაციონალისტებმა“ დაიწყეს.

„კიდევ ერთხელ მინდა ვთქვა: ჩვენ არ დაგვიწყია საომარი მოქმედებები, ჩვენ ვცდილობთ დავასრულოთ ისინი. ეს საომარი მოქმედებები წამოიწყეს ნაციონალისტებმა უკრაინაში და მათ, ვინც მხარი დაუჭირა 2014 წელს, როდესაც სახელმწიფო გადატრიალება განხორციელდა, აქედან დაიწყო ყველაფერი. ამას მოჰყვა მოვლენები ყირიმსა და დონბასში“ , – განაცხადა პუტინმა.

ვლადიმერ პუტინმა განაცხადა, რომ ქვეყნიდან დასავლური ბიზნესების გასვლა რუსეთს სარგებელს მოუტანს და ამ კომპანიებს “დაემშვიდობა”.

პუტინის თქმით, ეს კომპანიები რუსეთს მათი ხელისუფლებებისგან წნეხის გამო ტოვებენ, რუსეთში კი იმავე პროდუქტების წარმოებას ადგილობრივი კომპანიები წარმატებით აგრძელებენ.

“დღეს მათი [დასავლური კომპანიების] დიდი ნაწილი, საკუთარი ხელისუფლებებისგან წნეხის ქვეშ არიან, ტოვებენ ჩვენს ბაზარს. ყველაფერი საუკეთესო მათ… რუსეთში არაფერი ჩამონგრეულა და არაფერი იშლება. ჩვენი კომპანიები და მწარმოებლები იღებენ ამ წარმოებას და მთლიან სექტორებსაც კი და აგრძელებენ ამ საქმეს ძალიან წარმატებულად“ – განაცხადა პუტინმა და დამშვიდობების ნიშნად ხელი დაუქნია.

დასავლური კომპანიების ნაწილმა რუსეთი გასულ წელს უკრაინაში შეჭრის შემდეგ დატოვა, როცა დასავლეთმა რუსეთს უპრეცედენტო სანქციები დაუწესა.

რუსეთის ხელისუფლებამ და ცენტრალურმა ბანკმა თავდაპირველად აღიარეს ბიზნესების გასვლასთან დაკავშირებული “სირთულეები”, თუმცა ახლა კრემლი აცხადებს, რომ რუსეთის ეკონომიკა ძლიერია და სანქციების შედეგად თავად დასავლეთი ზიანდება.

ასევე დღეს რუსეთის პრეზიდენტმა განაცხადა, რომ რუსეთმა უნდა ააშენოს დრონების გაუმჯობესების სისტემა და მისი მიზანი უნდა იყოს, რომ გახდეს “ტექნოლოგიებისა და კომპეტენტურობის წყარო”.

რუსეთი უკრაინის წინააღმდეგ ომში ხშირად იყენებს დრონებს, რომელთა ნაწილსაც ირანისგან ყიდულობს.