მნიშვნელოვანიმსოფლიოსაქართველოსიახლეები

ისრაელში დაჭრილებს შორის ქართველიცაა-რას ყვება თელაველი ემიგრანტი

” ეს ორი ღამე კოშმარი იყო, კიბეებზე გავათენეთ, წუხელ სამჯერ ჩაირთო განგაშის სიგნალი”- ისრაელის სახელმწიფოში არსებული ვითარებისა და იქ მცხოვრები ქართველების მდგომარეობის შესახებ, რადიო ჰერეთს, ისრაელში მცხოვრები თელაველი, მაია ქევხიშვილი უყვება.

 

მაია ქევხიშვილი

მაია ოჯახსა და მეგობრებთან ერთად, ხუთი წელია ემიგრაციაში, ქალაქ ორიეჰუდაში ცხოვრობს.
ემიგრანტი ქართველი ყვება, რომ გასული ღამის განმავლობაში განგაშის სიგნალი სამჯერ ჩაირთო და იქ მყოფმა ქართველებმა სახლის კიბეებზე გაათენეს.

” აეროპორტთან ახლოს ვცხოვრობთ, ღამის სამ საათზე, იქ მიიტანეს იერიში. სამჯერ გამოგვყარა სახლებიდან განგაშის სირენებმა. ჩვენ სადაც ვცხოვრობთ, ძველი აშენებული საცხოვრებლებია და სარდაფები არ აქვს, ამიტომ როგორც საელჩომ გვითხრა, კიბეებზე გამოვდივართ და აქ ვათენებთ. ღამით ნამდვილი კოშმარია. აქვე ქალაქი ლოდია, იქაც რთული ვითარებაა. კიდევ კარგი, რომ ანეიტრალებენ, თორემ რასაც იქიდან ისვრიან, არცერთი ცოცხალი აღარ ვიქნებოდით”- ამბობს მაია.

ისრაელში მცხოვრები ქართველი ყვება, რომ იერიშების შედეგად დაჭრილებს შორის, ქართველიც არის.

“ორი დღის წინ იერიშის შედეგად, ქართველი დაიჭრა, ავტობუსს დაეცა. მადლობა ღმერთს, მსუბუქად არის. დღეს სამსახურში გავედი, მაგრამ გვითხრეს 6 საათისათვის ისევ დაბომბვა დაიწყებაო და ჩემი მეუღლეც ადრე გამოუშვეს სამსახურიდან. ბაღები და სკოლები დაკეტილია, მაგრამ ყველაფერს ხომ ვერ გააჩერებენ. ამ წუთში სიმშვიდეა. ვნახოთ, ამაღამ რა მდგომარეობა იქნება. ვინც ახლად აშენებულ სახლებში ცხოვრობს, მათ აქვთ საშუალება სარდაფებს შეაფარონ თავი. ჩვენ კიბეებზე როდემდე გავძლებთ არ ვიცი. ასე თუ გაგრძელდა, არ ვიცი, რა გვეშველება”-გვიყვება თელაველი ემიგრანტი.

ისრაელის სახელმწიფოში, თელავიდან რამდენიმე ოჯახია წასული .საომარი მოქმედებების დაწყების შემდეგ, ჯერჯერობით, საქართველოში არცერთი დაბრუნებულა.

ბოლო მონაცემებით, ისრაელსა და პალესტინას შორის დაპირისპირების შედეგად 40 ადამიანია დაღუპული: 35-ღაზაში, 5 კი ისრაელში.

მსგავსი პოსტები

Back to top button