სტიქია შოვში- საქართველოს მეგობარი ქვეყნები სამძიმარს უცხადებენ

სლოვაკეთის საგარეო საქმეთა სამინისტრო სამძიმარს უცხადებს შოვში გამანადგურებელი მიწისძვრის შედეგად დაღუპულთა ოჯახებს.
„გულწრფელად ვუსამძიმრებთ შოვში გამანადგურებელი მეწყერის შედეგად ტრაგიკულად დაღუპულთა ოჯახებს. ჩვენ ფიქრით საქართველოს ხალხთან ვართ და წარმატებული სამაშველო ძალისხმევის იმედი გვაქვს“, – ნათქვამია სლოვაკეთის საგარეო უწყების განცხადებაში.

აქართველოში თურქეთის საელჩო შოვში სტიქიის დროს დაღუპულთა ოჯახის წევრებს უსამძიმრებს.
„დიდი მწუხარებით შევიტყვეთ შოვში ჩამოწოლილი მეწყრის შედეგად დაკარგული პირების შესახებ. გულწრფელ სამძიმარს ვუცხადებთ დაღუპულთა ოჯახებს, ხოლო დაშავებულ პირებს ვუსურვებთ მალე გამოჯანმრთელებას. თანაგიგრძნობთ, საქართველო“, – აღნიშნულია საელჩოს განცხადებაში.

საქართველოში უკრაინის საელჩო რაჭაში, შოვში მომხდარ სტიქიასთან დაკავშირებით განცხადებას ავრცელებს.
“უკრაინის საელჩო საქართველოში უსამძიმრებს მოძმე ქართველს ხალხს და გულწრფელ მწუხარებას გამოთქვამს რაჭის მთიან რეგიონში, კურორტ შოვში მეწყერის ჩამოწოლის შედეგად ადამიანების ტრაგიკულად დაღუპვის გამო. სამძიმარს ვუცხადებთ დაღუპულთა ოჯახებს. მწუხარებით თავს ვიხრით მათ წინაშე”, – წერს უკრაინის საელჩო საქართველოში.

კურორტ შოვში მომხდარ სტიქიასთან დაკავშირებით საქართველოს სამძიმარს უცხადებს სომხეთის პრეზიდენტი ვაჰაგნ ხაჩატურიანი.
„ჩემი უღრმესი და გულწრფელი სამძიმარი საქართველოს დასავლეთ ონის მუნიციპალიტეტში მომხდარი ტრაგიკული კატასტროფის გამო, რომელმაც უდანაშაულო სიცოცხლეები შეიწირა და არსებითი დაზიანება გამოიწვია. ჩემი მტკიცე სოლიდარობა და თანაგრძნობა საქართველოს მოძმე ხალხს და ხელმძღვანელობას ამ ღრმა მწუხარების მომენტში. სრული იმედით, რომ უგზო-უკვლოდ დაკარგულები, რომლებიც კვლავ სტიქიის ზონაში არიან, შეძლებენ უსაფრთხოდ დაბრუნდნენ სახლში“, – განაცხადა სომხეთის პრეზიდენტმა.

საქართველოში გერმანიის ელჩი პეტერ ფიშერი შოვში, სტიქიის ზონაში დაღუპულთა ოჯახებს სამძიმარს უცხადებს. ამის შესახებ პეტერ ფიშერი სოციალურ ქსელში წერს.
„გერმანიის სახელით, თანაგრძნობას ვუცხადებ რაჭაში, შოვში ჩამოწოლილი მეწყრის დროს დაზარალებულებს. ვფიქრობთ და ვლოცულობთ დაღუპულთა ოჯახებისთვის, დაშავებულებისა და სამაშველო სამუშაოებში მონაწილე ადამიანებისთვის“, – წერს პეტერ ფიშერი.

აზერბაიჯანი მზად არის, საქართველოს გაუწიოს ყველანაირი დახმარება სამაშველო ღონისძიებებსა და სტიქიის შედეგების აღმოფხვრაში, – ამის შესახებ ნათქვამია აზერბაიჯანის საგარეო საქმეთა სამინისტროს მიერ ჯეიჰუნ ბაირამოვის ქართველ კოლეგა ილია დარჩიაშვილთან სატელეფონო საუბრის შემდეგ გამოქვეყნებულ განცხადებაში.
აზერბაიჯანის საგარეო საქმეთა მინისტრმა ღრმა სამძიმარი გამოუცხადა მძიმე სტიქიის დროს დაღუპულთა ოჯახებსა და ახლობლებს, მოძმე საქართველოს მთავრობას და ხალხს, ხოლო დაშავებულებს გამოჯანმრთელება უსურვა. ჯეიჰუნ ბაირამოვმა იმედი გამოთქვა, რომ დაკარგულებს მალე იპოვიან.
„მინისტრმა ბაირამოვმა ხაზგასმით აღნიშნა, რომ აზერბაიჯანი ყოველთვის საქართველოს გვერდითაა და მზად არის, გაუწიოს ყველანაირი დახმარება სამაშველო ღონისძიებებისა და სტიქიის შედეგების აღმოფხვრის კუთხით. მინისტრმა ილია დარჩიაშვილმა მას მადლობა გადაუხადა გამოხატული სოლიდარობისა და მხარდაჭერისთვის“, – ნათქვამია აზერბაიჯანის საგარეო უწყების განცხადებაში.

შვედეთი სოლიდარობას უცხადებს საქართველოს გლოვის დროს და უსამძიმრებს შოვში დაღუპულთა ოჯახებს, – ამის შესახებ ნათქვამია საქართველოში შვედეთის საელჩოს განცხადებაში.
„შვედეთი სოლიდარობას უცხადებს საქართველოს გლოვის დროს და გულწრფელად უსამძიმრებს რაჭაში, შოვში მომხდარი ტრაგედიის მსხვერპლთა ოჯახებსა და მეგობრებს. ჩვენ ვადევნებთ თვალს მიმდინარე სამაშველო და საევაკუაციო ოპერაციას. ვიმედოვნებთ, რომ სტიქიის ზონაში დაკარგული და ჩარჩენილი ადამიანები უვნებლად დაბრუნდებიან სახლებში“, – ნათქვამია დიპლომატიური წარმომადგენლობის განცხადებაში.

კურორტ შოვში სტიქიის დროს დაღუპულთა გამო სამძიმარი ქართულ ენაზე გამოაქვეყნა სომხეთის საგარეო საქმეთა მინისტრმა არარატ მირზოიანმა.
„ღრმა მწუხარებით შევიტყვე რაჭის რეგიონში მომხდარი სტიქიის შესახებ, რომელმაც ადამიანების სიცოცხლე შეიწირა. ვუსამძიმრებ მოძმე ქართველ ხალხს და საქართველოს ხელისუფლებას ამ მძიმე წუთებში, ხოლო დაღუპულთა ნათესავებს გამძლეობას და მოთმინებას ვუსურვებ”, – დაწერა „ტვიტერის” ანგარიშზე მირზოიანმა.
რაჭაში, ონის მუნიციპალიტეტის კურორტ შოვში, სასტუმრო „სანსეტ შოვის“ მახლობლად მეწყერი 3 აგვისტოს ჩამოწვა.

დანიის ელჩი საქართველოში, ანე ტოფტ სორენსენი განცხადებას ავრცელებს და შოვში, მეწყრის შედეგად დარუპულთა გამო ღრმა მწუხარებას გამოითქვამს.
“ნება მომეცით საქართველოში დანიის საელჩოს სახელით გამოვხატო ღრმა მწუხარება ამ საშინელი ტრაგედიის ფონზე. გულწრფელად ვიმედოვნებთ, რომ ყველა, ვინც დაკარგულად ითვლება, მალე იპოვიან და უსაფრთხოდ იქნებიან”, – წერს დანიის ელჩი საქართველოში.

ლიეტუვას საგარეო საქმეთა სამინისტრო განცხადებას ავრცელებს და შოვში, მეწყრის შედეგად დაღუპულთა გამო მწუხარებას გამოთქვამს.
“ჩვენ გულწრფელ მწუხარებას გამოვთქვამთ შოვში მომხდარი მეწყრის შედეგად დაღუპულთა გამო. დაშავებულებს სწრაფ გამოჯანმრთელებას ვუსურვებთ და ვიმედოვნებთ, რომ წარმატებით დასრულდება სამაშველო სამუშაოები”, – ნათქვამია განცხადებაში.

აშშ-ის საელჩო საქართველოში განცხადებას ავრცელებს და შოვში სტიქიის შედეგად დაღუპულთა ოჯახის წევრებს სამძიმარს უცხადებს.
“ღრმა მწუხარებით ვუსამძიმრებთ შოვში გარდაცვლილთა ოჯახებსა და მეგობრებს და ვლოცულობთ დაკარგულთა დროულად პოვნისათვის. ამ მძიმე წუთებში მაშველების თავდადება და ტრაგედიის პირისპირ ქართველი ხალხის გულწრფელი მხარდაჭერის სურვილით აღსავსე ერთიანობა შთამაგონებელია”- ნათქვამია განცხადებაში.

ევროკავშირის წარმომადგენლობა საქართველოში შოვში განვითარებულ სტიქიას ეხმაურება და დაღუპულთა ოჯახის წევრებს უსამძიმრებს.
“ევროკავშირის წარმომადგენლობა საქართველოში გულწრფელად უსამძიმრებს შოვში დამანგრეველი მეწყერის გამო ტრაგიკულად დაღუპულთა ოჯახებსა და მეგობრებს. ევროკავშირის წარმომადგენლობა ყურადღებით თვალს ადევნებს მიმდინარე სამაშველო და ევაკუაციის ოპერაციებს, რომლებსაც შესაბამისი უწყებები, მედიკოსები და იქ მყოფი ადამიანები ატარებენ და იმედოვნებს, რომ სტიქიის ზონაში ყველა დარჩენილი და უგზო-უკვლოდ დაკარგული სახლებში უსაფრთხოდ დაბრუნებას შეძლებს”- ნათქვამია განცხადებაში.

საქართველოში ირანის ისლამური რესპუბლიკის საელჩო შოვში მომხდარის გამო საქართველოს მთავრობასა და ხალხს უსამძიმრებს.
„ირანის ისლამური რესპუბლიკის საელჩო საქართველოში ღრმა მწუხარებას გამოთქვამს 2023 წლის 3 აგვისტოს შოვში მომხდარი დამანგრეველი მეწყრის გამო. სამძიმარს ვუცხადებთ ტრაგედიის შედეგად დაღუპულთა ოჯახებს, საქართველოს მთავრობას და ხალხს. ამასთან, მადლობას ვუხდით მაშველებს, რომლებმაც დაახლოებით 210 მოქალაქის სიცოცხლე გადაარჩინეს და დაზარალებულებს დახმარება აღმოუჩინეს. ირანელი ხალხი სოლიდარობას უცხადებს ქართველ ხალხს.
ჩვენ გთავაზობთ ყოველგვარ შესაძლო მხარდაჭერას როგორც კატასტროფის შედეგების ლიკვიდაციაში, ასევე გრძელვადიანი რეაბილიტაციის პროცესში. ვიცით, რომ რეაბილიტაციის პროცესი გრძელი და რთული იქნება, მაგრამ დარწმუნებული ვართ, რომ ქართველი ხალხი ამ ტრაგედიიდან კიდევ უფრო ძლიერი გამოვა“, – აღნიშნულია განცხადებაში.

ლატვიის საგარეო საქმეთა სამინისტრო შოვში, მეწყრის შედეგად დაღუპულთა და დაკარგულ ოჯახებს თანაგრძნობას უცხადებს.
“თანაგრძნობას ვუცხადებთ შოვში, მეწყრის შედეგად დაღუპულთა და დაკარგულ ოჯახებს. ჩვენ ქართველი ხალხის გვერდით ვდგავართ და იმედი გვაქვს, დაკარგული ადამიანები უსაფრთხოდ დაუბრუნდებიან თავიანთ ოჯახებს”, – ნათქვამია განცხადებაში.

საქართველოში გაერთიანებული ერების ორგანიზაციის წარმომადგენლობა ღრმა მწუხარებას გამოთქვამს 3 აგვისტოს რაჭის რეგიონში მომხდარი ტრაგიკული მეწყრის შედეგად დაღუპულთა გამო.

„გულწრფელ სამძიმარს ვუცხადებთ ქართველ ხალხსა და მთავრობას, განსაკუთრებით მათ, ვინც ამ კატასტროფის შედეგად ოჯახის წევრები დაკარგა. ჩვენი ფიქრები მათთანაა, ვინც ჯერ კიდევ დაკარგულად ითვლება, ისევე როგორც მათთან, ვინც დაშავებულია და კატასტროფას გადაურჩა. ხაზს ვუსვამთ, რომ ქალები, ბავშვები და სხვა სოციალური ჯგუფები, შესაძლოა, განსაკუთრებით დაუცველები იყვნენ ასეთი კატასტროფების ზემოქმედების მიმართ.

გამოვხატავთ ჩვენს გულწრფელ პატივისცემას მაშველების, პოლიციისა და თითოეული იმ ადამიანის გმირობის მიმართ, ვინც სამაშველო და პირველადი დახმარების სამუშაოებშია ჩართული და დაუღალავად აგრძელებს მუშაობას ადგილზე, რათა ყველა დაზარალებულის უსაფრთხოება და კეთილდღეობა უზრუნველყოფილი იყოს.

გაერო სოლიდარობას უცხადებს ქართველ ხალხს ამ რთულ პერიოდში. მზად ვართ, მხარი დავუჭიროთ მთავრობას, ადგილობრივ ხელისუფლებასა და ჰუმანიტარულ პარტნიორებს კლიმატური კატასტროფების საფრთხის წინაშე მყოფი თემების მდგრადობის გაზრდის მიზნით ერთიანი ძალისხმევის კოორდინაციაში.

შოვში განვითარებული მეწყერი გამოწვეულია ინტენსიური ნალექითა და მდინარის ბუნებრივი კაშხლებით. ეს მკვეთრი შეხსენებაა კლიმატის ცვლილების მზარდი ზემოქმედების შესახებ არა მხოლოდ საქართველოსთვის, არამედ მთელი მსოფლიოსთვის. ასეთი ტრაგიკული მოვლენები ხაზს უსვამს ერთიანი გლობალური ძალისხმევის აუცილებლობას კლიმატის ცვლილების შერბილების, მდგრადობის გაძლიერებისა და კატასტროფების რისკის შემცირების მიმართ“, – აღნიშნულია საქართველოში გაერთიანებული ერების ორგანიზაციის წარმომადგენლობის სამძიმრის წერილში.

3 აგვისტოს, კურორტ შოვში, მათ შორის სასტუმრო სანსეტ შოვთან მეწყერი ჩამოწვა.

ადიდებულმა მდინარემ წაიღო სამანქანო ხიდი. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი.

ოფიციალური მონაცემებით, მეწყერს 11 ადამიანის სიცოცხლე ემსხვერპლა.

გზების გაწმენდის სამუშაოები ღამით დასრულდა და დღეს დილიდან გაგრძელდა.

სტიქიის ზონაში დაკარგულ ადამიანებს მაშველები კვლავ ეძებენ.