ორბელიანების სასახლეში ქვეყნის პრეზიდენტის მიერ ორგანიზებული ღონისძიება იმართება

“ჩვენი ხმა ევროპას” – ათონელის რეზიდენციაში სალომე ზურაბიშვილის კამპანიის დასკვნითი და მასშტაბური მიღება მიმდინარეობს. ღონისძიებაზე ამ წუთებში საპატიო სტუმრები იკრიბებიან. სასახლეში მიდიან საქართველოში აკრედიტებული დიპლომატები, პოლიტიკოსები და ევროკავშირის 27 სახელმწიფოს ელჩები.

ორბელიანების სასახლეში უკვე მივიდნენ ამერიკის შეერთებული შტატების ელჩი საქართველოში, რობინ დანიგანი და ევროკავშირის ელჩი, პაველ ჰერჩინსკი.

რაც შეეხება ქართულ ოცნებას, გასულ დღეებში მმართველი პარტიის ლიდერებმა განაცხადეს, რომ მოწვევას არ იღებდნენ და ღონისძიებას არ დაესწრებოდნენ. უცნობია, მივა თუ არა ორბელიანის სასახლეში ყოფილი პრეზიდენტი, გიორგი მარგველაშვილი. მან თქვა, რომ პრეზიდენტის მიერ ინიცირებულ პეტიციას ხელს არ მოაწერდა მანამ, სანამ იქ მიხეილ სააკაშვილის ხელმოწერა არ იქნებოდა.

პარალელურად, ორბელიანის სასახლესთან შეკრებილები არიან სამოქალაქო აქტივისტები – ისინი მიხეილ სააკაშვილის გათავისუფლებას მოითხოვენ და აცხადებენ, რომ მნიშვნელოვანია, “საქართველოს არ ჰყავდეს პუტინის პირადი ტყვე”.

ცოტა ხნის წინ ცნობილი გახდა, რომ პეტიციას მიხეილ სააკაშვილმა ხელი მოაწერა. როგორც ნაციონალური მოძრაობის წევრმა, თინა ბოკუჩავამ თქვა, ის ხელმოწერას მიიტანს და ღონისძიებას დაესწრება.

ევროკავშირის ქვეყნებში მცხოვრები ქართული დიასპორის წარმომადგენლებთან ონლაინ შეხვედრის დროს პრეზიდენტმა განაცხადა, რომ ღონისძიების დახურვის ცერემონიაზე საქართველოს ხელისუფლების წარმომადგენლებიც მიიწვია, მათ შორის, მოქმედი და ყოფილი პრემიერები, მინისტრები.

2023 წლის 8 ნოემბერს პრეზიდენტმა სალომე ზურაბიშვილმა დააინიცირა პეტიცია, სახელწოდებით “ჩვენი ხმა ევროპას”. ის ევროპელ ლიდერებს მიმართავს და დეკემბრის ისტორიულ გადაწყვეტილებამდე სთხოვს, საქართველოს კანდიდატი ქვეყნის სტატუსი მიანიჭოს.