მნიშვნელოვანირეგიონისიახლეები

ჩხოროწყუს მეორე საჯარო სკოლაში მომხდარ ფაქტს მერიის შიდა აუდიტის სამსახური სწავლობს

ჩხოროწყუს მუნიციპალიტეტში, მეორე საჯარო სკოლაში 25 იანვარს მომხდარი ფაქტის  შესწავლა დაიწყო მერიის შიდა აუდიტის სამსახურმა. ამის შესახებ ადგილობრივი ოპოზიციური პარტიის წარმომადგენლებმა ჩხოროწყუს მუნიციპალიტეტის საკრებულოს თავმჯდომარესთან, კობა ჯიქიასთან შეხვედრის დასრულების შემდეგ განაცხადეს.

მათი თქმით, მოთხოვნაა ჩხოროწყუს მუნიციპალიტეტის მერის დავით გოგუას იმპიჩმენტი.

სწორედ აღნიშნული მოთხოვნით ისინი ხვალიდან ხელმოწერების შეგროვებას დაიწყებენ.

შეგახსენებთ, რომ ჩხოროწყუს მეორე საჯარო სკოლის მეშვიდე კლასის მოსწავლეებს “დასუფთავების აქციის” ფარგლებში მერიის ყოფილმა თანამშრომელმა ეთერ ჯაფარიძემ 25 იანვარს საპირფარეშო მოარეცხინა.

საქმეზე დაწყებულია გამოძიება სსკ-ის 150-ე მუხლით, რაც იძულებას გულისხმობს.

მომხდარ ფაქტს იკვლევს სახალხო დამცველის აპარატიც.

ჩხოროწყუს მერიის საპირფარეშოს დასუფთავებაში არასრულწლოვნების ჩართვის ფაქტს აღმაშფოთებელი უწოდა 1 თებერვალს, საქართველოს პრემიერ-მინისტრმა.

გიორგი გახარის სიტყვებით, ხელსუფლებას ამ საკითხზე უმკაცრესი რეაგირება ექნება.

ოპოზიციამ და სამოქალაქო აქტივისტებმა რამდენიმე დღის წინ მერიასთან აქცია გამართეს და მომხდარი ფაქტი გააპროტესტეს.

მსგავსი პოსტები

Back to top button