ავთანდილ ხურციძემ WBO-ს საჩემპიონო ქამარი მოირგო [Photo/video]
ქართველმა მოკრივე ავთანდილ ხურციძემ მსოფლიო კრივის ორგანიზაციის (WBO) ეგიდით გამართულ ბრძოლაში ამერიკელ ანტუან დუგლასს აშკარა უპირატესობით სძლია და საშუალო წონაში ინტერნაციონალური ჩემპიონის წოდება მოიპოვა.
ქართულ-ამერიკულ დაპირისპირებას აშშ-ს პენსილვანიის შტატის ქალაქმა ბეთლეჰემმა უმასპინძლა და ფავორიტად 23 წლის დუგლასი ითვლებოდა, რომელსაც გუშინდლამდე არცერთი ბრძოლა არ წაუგია – 19 გამარჯვება (13 ნოკაუტი), 1 ფრე.
დუგლასი WBO-ს ინტერნაციონალური ქამრის მოქმედი მფლობელი გახლდათ და პირველადი ვერსიით, მას კრივის საერთაშორისო ფედერაციის (IBF) ეგიდით მსოფლიოს ექს-ჩემპიონი სემ სოლიმანი უნდა შერკინებოდა, თუმცა ავსტრალიელმა მოკრივემ მუხლის ტრავმა მიიღო და ჯახიც ვეღარ შედგა.
სწორედ ამ დროს წამოტივტივდა ხურციძის სახელი, რომელსაც თავის მხრივ, გასულ კვირას ნიუ იორკში დაგეგმილი ბრძოლა ჩაეშალა. ქართველი მოკრივე IBF-ის და მსოფლიო კრივის ასოციაციის (WBA) ვერსიით, ჩემპიონობის ექს-პრეტენდენტ – დომინიკელ ჯოვანი ლორენცოს უნდა შერკინებოდა, თუმცა, ეს შეხვედრაც გაუქმდა და როგორც აღმოჩნდა, ავთანდილისთვის მოვლენათა ამგვარი განვითარება უკეთესი ყოფილა.
ხურციძის და დუგლასის 10-რაუნდიანი შერკინება სწორედ ბოლო რაუნდში ქართველის უძლიერესი შეტევის კვალად, ვადაზე ადრე შეწყდა და მანამდეც, “ტორნადოს” მეტსახელით ცნობილი, ქართველი სპორტსმენის უპირატესობა აშკარა იყო.
35 წლის ხურციძემ გაცილებით ახალგაზრდა მეტოქე ნოგდაუნში უკვე მე-3 რაუნდში გაგზავნა და მე-7 რაუნდში იგივე კიდევ ერთხელ გაიმეორა. მე-9 რაუნდში ამერიკელი ყრუ დაცვაში იდგა და გონგამდე მიღწევა მოახერხა. დასკვნით რაუნდში კი ავთანდილის შეტევებს ვეღარ გაუძლო. უფრო სწორად რომ ვთქვათ, რეფერი ბენჯი ესტევესმა ანტუანის საცოდაობას ვეღარ გაუძლო და საფინალო გონგამდე 2:30 წამით ადრე ბრძოალა დაასრულა.
ამგვარად, ხურციძემ პროფესიულ კარიერაში ორადორი მარცხის წილ 32-ე გამარჯვება (20 ნოკაუტი) იზეიმა და WBO-ს ინტერნაციონალური ქამრის მფლობელიც გახდა.
“მე ყველას ვანახე, რა შემიძლია. ძალიან ბევრს ვვარჯიშობ და მინდა, მომავალშიც რაც შეიძლება მნიშვნელოვანი ბრძოლების ჩატარების საშუალება მომცენ”, – განაცხადა ბრძოლის შემდეგ გახარებულმა ქართველმა მოკრივემ, რომელიც ამერიკულმა მედიამ მიმოხილვებში “მინი-მაიკ ტაისონად” მოიხსენია.
[inpost_gallery thumb_width=”200″ thumb_height=”200″ post_id=”30752″ thumb_margin_left=”0″ thumb_margin_bottom=”0″ thumb_border_radius=”2″ thumb_shadow=”0 1px 4px rgba(0, 0, 0, 0.2)” js_play_delay=”3000″ id=”” random=”0″ group=”0″ border=”” type=”yoxview” show_in_popup=”0″ album_cover=”” album_cover_width=”200″ album_cover_height=”200″ popup_width=”800″ popup_max_height=”600″ popup_title=”Gallery”][/inpost_gallery]
