დატოვებს თუ არა ანა დოლიძე თანამდებობას

7 არასამთავრობო ორგანიზაცია იუსტიციის უმაღლესი საბჭოს არამოსამართლე წევრს, ანა დოლიძეს მოუწოდებს, თუ ის მომავალში აქტიურ პოლიტიკურ საქმიანობას აპირებს, თანამდებობა დატოვოს.

NGO-ები აღნიშნავენ, რომ დოლიძის მხრიდან აქტიურ პოლიტიკაში ჩართვა მის მიერ ამჟამად დაკავებულ თანამდებობასთან შეუთავსებელია.

“ხელმომწერი ორგანიზაციები ეხმიანებიან საქართველოს იუსტიციის უმაღლესი საბჭოს არამოსამართლე წევრის, ანა დოლიძის მიერ სამოქალაქო მოძრაობა „ხალხისთვის” დაფუძნებას, რამაც საზოგადოების ნაწილში მოლოდინები გააჩინა მის სამომავლო პარტიულ საქმიანობასა და აქტიურ პოლიტიკაში ჩართვასთან დაკავშირებით, რაც შეუთავსებელია მის მიერ ამჟამად დაკავებულ თანამდებობასთან. ამიტომ, თუ ის უახლოეს მომავალში პოლიტიკურ საქმიანობას აპირებს, მოვუწოდებთ თავად და დროულად მიიღოს გადაწყვეტილება თანამდებობის დატოვების შესახებ. “ქართული ოცნების” ხელისუფლებაში მოსვლის შემდეგ, ხელმომწერი ორგანიზაციები აქტიურად უჭერდნენ მხარს იუსტიციის უმაღლესი საბჭოს დეპოლიტიზების საკითხს. სწორედ ამ მიზნით, 2013 წლის საკანონმდებლო ცვლილების შედეგად იუსტიციის უმაღლესი საბჭოს შემადგენლობიდან გამოყვანილ იქნენ პარლამენტის წევრები, ისინი ჩანაცვლდნენ აკადემიური და პროფესიული წრეების წარმომადგენლებით, რომლებსაც აეკრძალათ პოლიტიკური გაერთიანების წევრობა და „პოლიტიკური საქმიანობა“. ამგვარი საქმიანობის განხორციელება იუსტიციის უმაღლესი საბჭოს წევრის უფლებამოსილების შეწყვეტის წინაპირობას წარმოადგენს. კანონის მიზანია სასამართლო ხელისუფლების პოლიტიკური ნეიტრალიტეტის დაცვა და შენარჩუნება.

“აღსანიშნავია, რომ ანა დოლიძე, იუსტიციის უმაღლეს საბჭოს წევრად დანიშვნის დღიდან, აქტიურად არის ჩართული სასამართლო სისტემაში არსებული პრობლემების გამოვლენის, მათი გადაჭრის გზების ძიებისა და საზოგადოების ინფორმირების პროცესში, იგი მწვავე ოპონირებას უწევს სასამართლოში არსებულ კლანს. განსაკუთრებით ღირებული და მნიშვნელოვანია ის შრომა, რომელიც მან გასწია უზენაესი სასამართლოს დაკომპლექტების საკანონმდებლო ბაზისა და კანდიდატთა შერჩევის პროცესის სრულყოფის კუთხით.

“2020 წლის 21 მაისს, ანა დოლიძემ სამოქალაქო მოძრაობა „ხალხისთვის” დააფუძნა. მისი განცხადებით, მოძრაობის მიზანი „სუფთა ხელებით”, ახალი პოლიტიკური რეალობის შექმნაა. ამავე დღეს, ანა დოლიძემ საკუთარ ოფიციალურ ფეისბუქ გვერდზე „მანიფესტი ხალხისთვის” გამოაქვეყნა და ტელეკომპანია „პირველის“ პირდაპირ ეთერში, გადაცემა „რეაქციაში“ სტუმრობისას, ორგანიზაციის ხედვებსა და სამომავლო გეგმებზე ვრცლად ისაუბრა. ყოველივე ზემოთქმულმა, საზოგადოების ნაწილში გააჩინა მოლოდინი, მის სამომავლო პოლიტიკურ საქმიანობასთან დაკავშირებით. შესაბამისად, თუ ანა დოლიძე ახლო მომავალში აქტიურ პოლიტიკურ საქმიანობას გეგმავს, მნიშვნელოვანია მან თავად და დროულად მიიღოს გადაწყვეტილება თანამდებობის დატოვების შესახებ. ამავდროულად უნდა აღინიშნოს ისიც, რომ მოქმედი კანონმდებლობის ფარგლებში ანა დოლიძის თანამდებობიდან გადაყენების უფლებამოსილება არცერთ სახელმწიფო ორგანოს ან/და თანამდებობის პირს არ აქვს.” – ნათქვამია განცხადებაში.

განცხადებას ხელს აწერენ: საქართველოს დემოკრატიული ინიციატივა (GDI); უფლებები საქართველო; საერთაშორისო გამჭვირვალობა – საქართველო (TI); ინფორმაციის თავისუფლების განვითარების ინსტიტუტი (IDFI); სამართლიანი არჩევნებისა და დემოკრატიის საერთაშორისო საზოგადოება (ISFED); პარტნიორობა ადამიანის უფლებებისთვის (PHR); დემოკრატიისა და უსაფრთხო განვითარების ინსტიტუტი (IDSD).

არასამთავრობო ორგანიზაციების საპასუხოდ, იუსტიციის უმაღლესი საბჭოს წევრი ანა დოლიძე აცხადებს, რომ პოლიტიკური საქმიანობის დაწყების შესახებ გადაწყვეტილება ამ დრომდე არ მიუღია და თუ ამ გადაწყვეტილებას მიიღებს, იუსტიციის უმაღლეს საბჭოსთან დაკავშირებით, კანონის შესაბამისად მოიქცევა:

“გასაგებია, რომ საზოგადოებაში არის დიდი ინტერესი, მათ შორის, პოლიტიკურ პარტიებში და არასამთავრობო ორგანიზაციებში არის დიდი ინტერესი ჩემს მომავალ გეგმებთან დაკავშირებით. როგორც მე უკვე რამდენიმე კვირაა არაერთხელ განვაცხადე მთავარი ეთერებით ამ ქვეყანაში, სანამ მე ვარ იუსტიციის საბჭოს წევრი და ვახორციელებ საზოგადოებრივ საქმიანობას, ვფიქრობ, ჩემი ხმა ამ საბჭოში ძალიან მნიშვნელოვანია.

“როგორც უკვე რამდენიმე კვირაა ვსაუბრობ, როგორც კი გადავწყვეტ, პოლიტიკურ საქმიანობას შევუდგე, ამ გადაწყვეტილებას საზოგადოებას თავადვე გავაგებინებ და კანონის შესაბამისად მივიღებ გადაწყვეტილებას იუსტიციის საბჭოსთან დაკავშირებით. ეს ორგანიზაციებიც მიუთითებენ, რომ ჩემი საქმიანობა საბჭოში მნიშვნელოვანია და ვაპირებ გავაგრძელო ეს მისია, სანამ მივიღებ გადაწყვეტილებას პოლიტიკური საქმიანობის შესახებ.” – ამბობს ანა დოლიძე.