დევი ჭანკოტაძე პოლიტიკაში გააქტიურებას გეგმავს
გენერალი დევი ჭანკოტაძე, რომელმაც სამხედრო სამსახური 2012 წელს დატოვა, აცხადებს, რომ ის 2020 წლის საპარლამენტო არჩევნებზე პოლიტიკურ საქმიანობაში გააქტიურებას გეგმავს.
აღნიშნულის შესახებ ჭანკოტაძემ ტელეკომპანია “პირველს” განუცხადა. მისი თქმით, “ქართული ოცნების” ხელისუფლება დემოკრატიულად, არჩევნების გზით უნდა შეიცვალოს და ამისთვის ყველაფერს გააკეთებს. ჭანკოტაძე აღნიშნავს, რომ ის “ერთიანი ნაციონალური მოძრაობის” წევრია და იმ დავალებებს შეასრულებს, რომელსაც პარტიისგან მიიღებს:
“თავიდანვე, როცა მოვიდნენ [“ქართული ოცნება”] ხელისუფლებაში 2012 წელს, მოვიდნენ ტყუილი დაპირებებით. მათ გუნდში ამ პერიოდისთვის იყო ხალხი, ვისაც სჯეროდა, იყო პროდასავლური ხალხი, რომელსაც იმედი ჰქონდა, საქართველო დარჩებოდა პროდასავლურ კურსზე და გააგრელებდა წინსვლას. როგორც ვნახეთ, ეს ხალხი გამოეყო “ქართულ ოცნებას” და დარჩნენ ადამიანები, რომელთაც გეზი რუსეთისკენ აქვთ.
“ენმ-ის ყრილობაზე მე გავაკეთე განცხადება, რომ შევდივარ ერთიან ნაციონალურ მოძრაობაში. ყველაზე დიდი წოდება მაქვს, – რიგითი. როგორც იცით, რიგითი იგებს ომს. ყველაფერს გავაკეთებ, ეს რეჟიმი რომ წყნარად, დინჯად, დემოკრატიულად, არჩევნების გზით გავაცილოთ პენსიაზე. მე რა დავალებასაც მივიღებ პარტიისგან, იმას შევასრულებ. მე სამხედრო ვარ, უნდა მივიღო დავალება.” – ამბობს ჭანკოტაძე.
