ვიოლა ფონ კრამონის განცადებას მმართველ გუნდში ეხმაურებიან
გერმანიის მთავრობას საკუთარი ოფიციალური პოზიცია გააჩნია, ვიოლა ფონ კრამონი კი საკუთარი შეხედულებების შესახებ საუბრობს – ამის შესახებ საქართველოში გერმანიის ელჩმა პეტერ ფიშერმა განუცხადა, ევროპარლამენტარ ვიოლა ფონ კრამონის განცხადებასთან დაკავშირებით, რომლის თანახმად, თუ საქართველო კანდიდატის სტატუსს მიიღებს, ამას იმსახურებს ხალხი და არა მთავრობა.
როგორც ელჩმა აღნიშნა, რაც შეეხება გერმანიის პოზიციას, ის დეკემბერში გახდება ცნობილი.
„გერმანიის მთავრობას საკუთარი ოფიციალური პოზიცია გააჩნია, ვიოლა ფონ კრამონი კი საკუთარი შეხედულებების შესახებ საუბრობს, ასე, რომ როგორც ელჩს, არ შემიძლია, ვიოლა ფონ კრამონის განცხადებაზე კომენტარი გავაკეთო, რადგან, ის ევროპარლამენტის დამოუკიდებელი წევრია. მას საკუთარი მანდატი აქვს და მის პირად მოსაზრებასთან დაკავშირებით კომენტარს ვერ გავაკეთებ, რაც შეეხება გერმანიის პოზიციას, ის დეკემბერში გახდება ცნობილი“, – განაცხადა პეტერ ფიშერმა.
ვიოლა ფონ კრამონმა თავი იგრძნო პოლიტიკურ ლიდერად და ისეთ განცხადებებს აკეთებს, რაც არათუ არ შეესაბამება ჩვენს ეროვნულ ინტერესებს, არამედ სერიოზულ დარტყმას აყენებს იმ ავტორიტეტს, რაც დასავლურ ინსტიტუტებს აქვს საზოგადოებაში, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.
გია ვოლსკის კითხვა დაუსვეს კახა კალაძის განცხადებაზე, რომლის მიხედვითაც, არ გამორიცხავს, ვიოლა ფონ კრამონი „მოლოტოვის კოქტეილით“ იხილონ დედაქალაქში.
როგორც ვოლსკი ამბობს, ხალხმა ეს ნათქვამი პირდაპირი მნიშვნელობით არ უნდა გაიგოს.
„ვიოლა ფონ კრამონი აზიანებს დასავლურ ინსტიტუტებს და პრინციპებს, რაც კონსტიტუციაში ავსახეთ. ამას აკეთებს თავისი საქციელით, განცხადებებით. ადამიანებმა ირწმუნეს, რომ საზოგადოებაში რაღაცას წარმოადგენს, ასეთი რწმენა შეუქმნეს. კალაძემ თქვა, არ გაგიკვირდეთ, „მოლოტოვის კოქტეილით“ ვიხილოთო. მის პათოსს თუ გავითვალისწინებთ, რეალობისგან შორს არ არის. ეს ხატოვნად უნდა მიიღოთ და არა – პირდაპირ“, – განაცხადა გია ვოლსკიმ.
“ქართული ოცნების” წევრმა, მამუკა მდინარაძემ ევროპარლამენტარ ვიოლა ფონ კრამონთან დაკავშირებით, მერი კალაძის განცხადებებზე დასმული კითხვის საპასუხოდ თქვა, რომ ” ზოგიერთი უცხოელი კოლეგა ზედმეტად ერევა ქართულ პოლიტიკაში და ზედმეტად სუბიექტურია. როგორც ჩანს, მათ კონკრეტული ინტერესები აქვთ”
“კახა კალაძის ალეგორია ემსახურება იმას, რომ საზოგადოებამ კარგად დაინახოს, რაზე არიან წასულები ადამიანები, რომლებსაც ერთი შეხედვით, საქართველოში არაფერი ესაქმებოდათ, მაგრამ ქართულ პოლიტიკაში ისე არიან ჩარეული, შეიძლება, მართლა მაჟორიტარებად მოიაზრებენ თავს. 2024 წელს საპარლამენტო არჩევნები პროპორციულია და შესაძლოა, პროპორციული სიით ვიხილოთ, მანამდე კი საქართველოს მოქალაქეობის მიღებას შეეცადოს და გადმოეწეროს. შეიძლება, მოხვდეს „ნაცმოძრაობის“ პროპორციულ სიაში, რომელიმე მის კლასტერში ან მართლაც გამოვარდეს და პოლიციელებს „მოლოტოვის კოქტეილი“ ესროლოს, ცეცხლი წაუკიდოს და რადიკალური ოპოზიცია ვიოლა ფონ კრამონის დასაცავად გამოვიდეს. ეს ყველაფერი ხუმრობით, მაგრამ ჩვენი ზოგიერთი უცხოელი კოლეგა ზედმეტად ერევა ქართულ პოლიტიკაში და ზედმეტად სუბიექტურია. როგორც ჩანს, კონკრეტული ინტერესები აქვთ და ეს ინტერესები მათ საერთო გეგმაში კარგად ზის, რაც ქაოსში ჩართვას, ხელისუფლების ცვლილებას, მეორე ფრონტის გახსნას გულისხმობს”, – ამბობს მდინარაძე
ბუნდესტაგის დეპუტატის კონსტანტინ კულეს გერმანულ მედიაში გაკეთებულ განცხადებაზე, რომ საქართველოსა და მოლდოვას უსაფრთხო ქვეყნებად კლასიფიკაცია მყისიერად შეამცირებს გერმანიაში არალეგალურ მიგრაციას, ეხმაურება გერმანელი ევროპარლამენტარი ვიოლა ფონ კრამონი.
“ბოლო პერიოდამდე კონსტანტინ კულეს მეც დავეთანხმებოდი, მაგრამ საქართველოს მთავრობა იმდენად ახლოსაა კრემლთან, რომ რუს უფლებადამცველებს საზღვრიდან უკან აბრუნებენ, დისიდენტების ექსტრადირებაც მოსალოდნელია და აღარ ვარ დარწმუნებული.
მოლდოვა სხვა შემთხვევაა” ,- წერს კრამონი.
შეგახსენებთ, რომ მერმა კალაძემ სამთავრობო მედიის ეთერში განაცხადა, რომ არ გამორიცხავს, ევროპარლამენტარი ვიოლა ფონ კრამონი თბილისში “მოლოტოვის კოქტეილით” იხილონ.
