სოსო გოგაშვილის ოჯახის განცხადებით მათი ქონება დააყადაღეს
სახალმწიფო უსაფრთხოების სამსახურის ყოფილი მაღალჩინოსნის, სოსო გოგაშვილის ოჯახი აცხადებს, რომ მათი ქონება დაყადაღებულია. ამის შესახებ მათ სახელმწიფო უსაფრთხოების სამსახურის გენერალურ ინსპექციაში გამოკითხვის შემდეგ უთხრეს მედიას.
“დააყადაღეს ჩვენი ოჯახის ქონება. დეტალებზე ვერ ვსაუბრობ, რადგან გრიფით გასაიდუმლოებულია ეს საქმე. ისინი ხომ გვიწოდებენ მილიონერებს და ხალხს ცრუ ინფორმაციას აწვდიან. ხომ უნდათ საზოგადოებამ ეს დაიჯეროს, პირიქით, არ უნდა ედოს გრიფი იმისთვის, რომ საზოგადოებამ გაიგოს რამდენად კანონიერად გვაქვს ეს შეძენილი”, – თქვა ნინო გოგაშვილმა, სოსო გოგაშვილის შვილმა.
ის საქმის გასაიდუმლოების გამო ვერ საუბრობს დაყადაღებულ ქონებასთან დაკავშირებით დეტალებზე. სახელმწიფო უსაფრთხოების სამსახურის პრესსამსახურთან ამ ეტაპზე დაკავშირება ვერ მოხერხდა.
რადიო თავისუფლებამ სოსო გოგაშვილისა და მისი ოჯახის წევრების კუთვნილი ქონების შესახებ ინფორმაცია გადაამოწმა საჯარო რეესტრშიც. ამ დროისთვის [12:55 საათი] ყადაღის შესახებ ინფორმაცია ასახული არ არის.
სოსო გოგაშვილი 16 ივლისს საკუთარ სახლში დააკავეს. მას ბრალდება საქართველოს სისხლის სამართლის კოდექსის 333-ე მუხლის პირველი ნაწილით (მოხელის მიერ სამსახურებრივი უფლებამოსილების გადამეტება, რამაც სახელმწიფოს კანონიერი ინტერესის არსებითი დარღვევა გამოიწვია.), 157-ე მუხლის მე-4 ნაწილით (პერსონალური მონაცემების უკანონოდ მოპოვება, შენახვა, გავრცელება, რამაც მნიშვნელოვანი ზიანი გამოიწვია, სამსახურებრივი მდგომარეობის გამოყენებით) და 236 მუხლის მე-3 ნაწილით (ცეცხლსასროლი იარაღისა და საბრძოლო მასალის მართლსაწინააღმდეგო შეძენა და შენახვა) წარედგინა, რაც სასჯელის სახედ და ზომად ითვალისწინებს თავისუფლების აღკვეთას ვადით ოთხიდან შვიდ წლამდე.
გოგაშვილმა დაკავებამდე “ფეისბუკზე” დაწერა, რომ ფლობდა ინფორმაციას არჩევნების გაყალბებასთან დაკავშირებით. მისი სახელით “ფეისბუკზე” ასევე დაიწერა არაერთი ბრალდება მოქმედი შინაგან საქმეთა მინისტრის მიმართ, რომლის მოადგილედაც ის მუშაობდა. გოგაშვილმა ერთ-ერთ განცხადებაში ისიც თქვა, რომ უწყებიდან წამოსვლა, მტკიცებულებების მოგროვება და მხილება არჩია. მისი ოჯახის წევრები, ქონების დაყადაღებას სწორედ ამ საკითხს უკავშირებენ.
