ისრაელის არმიამ ჰამასის წინააღმდეგ კონტრშეტევა სახელწოდებით „რკინის ხმლები“ დაიწყო

ისრაელის არმიამ ჰამასის წინააღმდეგ კონტრშეტევა დაიწყო, – ამის შესახებ ინფორმაციას ისრაელის თავდაცვის ძალები აქვეყნებს.

ისრაელის არმიამ ღაზას სექტორში ჰამასის დაჯგუფების წინააღმდეგ ოპერაცია „რკინის ხმლები“ დაიწყო.

ისრაელის არმია აცხადებს, რომ საბრძოლო თვითმფრინავები ღაზას სექტორში ჰამასის სტრატეგიულ ობიექტებზე ახორციელებენ თავდასხმებს.

ამ დრომდე ჰამასსა და ისრაელის ჯარებს შორის საბრძოლო მოქმედებები მინიმუმ შვიდ ადგილზე მიმდინარეობს. ისრაელის მიერ გავრცელებული ინფორმაციით დღეს დილით ჰამასმა ისრაელის მიმართულებით 2200-ზე მეტი რაკეტა გაისროლა.

პალესტინური დაჯგუფების, ჰამასის მიერ თავდასხმისა და ისრაელის ტერიტორიაზე სამხედროების შესვლის შემდეგ, ისრაელის თავდაცვის მინისტრი, იოავ გალანტი აცხადებს, რომ “ამ ომს მოიგებენ”.

“დღეს დილით ჰამასმა უდიდესი შეცდომა დაუშვა და ისრაელის სახელმწიფოს წინააღმდეგ ომი დაიწყო. ისრაელის თავდაცვის ძალები მტრის წინააღმდეგ ყოველ ტერიტორიაზე იბრძვიან. ისრაელის ყველა მოქალაქეს მოვუწოდებ, უსაფრთხოების ინსტრუქციებს მიჰყვნენ. ისრაელის სახელმწიფო ამ ომს მოიგებს”, – განაცხადა მან.

დღეს ღაზას სექტორიდან ისრაელის მიმართულებით ათობით რაკეტა გაუშვეს. ქვეყნის მასშტაბით განგაშის სირენები ამოქმედდა. თავდასხმაზე პასუხისმგებლობა პალესტინურმა დაჯგუფება ჰამასმა აიღო. ისინი აცხადებენ, რომ 20 წუთში 5000 რაკეტა გაუშვეს.

გავრცელებულ შეტყობინებაში, ჰამასის სამხედრო მეთაურმა, მოჰამედ დეიფმა ამას ოპერაცია “ალ-აკსას შტორმი” უწოდა და პალესტინელებს შეერთებისკენ მოუწოდა.

ისრაელის შეიარაღებული ძალების ცნობით, ჰამასის წინააღმდეგ საპასუხო დარტყმებს ახორციელებენ – მათ სამხედროების მობილიზება დაიწყეს და “საომარი მდგომარეობის” შესახებ გაფრთხილება გამოაცხადეს.