“არ ვარ წინააღმდეგი, მერაბიშვილი შემოვიდეს პოლიტიკაში”

პოლიტიკური პარტია „ემსახურე საქართველოს“ ერთ-ერთი ლიდერი მურმან დუმბაძე აცხადებს, რომ იმ შემთხვევაში, თუ ვანო მერაბიშვილი გადაწყვეტს, შეუერთდეს ოპოზიციური პარტიების გაერთინებას „ძალა ერთობაშია“, მას მხარს დაუჭრეს.

მურმან დუმბაძის თქმით, ვანო მერაბიშვილმა მოიხადა 7 წლიანი სასჯელი და სრული უფლება აქვს, პოლიტიკაში მოვიდეს.

„მე, როგორც მურმან დუმბაძე, როგორც პოლიტიკური პარტია „ემსახურე საქართველოს“ ერთ-ერთი ლიდერი, გეტყვით, რომ ეს საკითხი გადასაწყვეტია „ნაციონალურ მოძრაობაში“. იმიტომ, რომ ბატონი ვანო ამბობს, ის უფრო ასოცირდება „ნაციონალურ მოძრაობასთან“ ვიდრე მის განაყოფ პარტიასთან.
მე, ამ გაერთიანების – „ძალა ერთობაშია“-ს სუბიექტი მურმან დუმბაძე, „ემსახურე საქართველოს“ თავმჯდომარე, არ ვარ წინააღმდეგი, რომ ვანო მერაბიშვილი შემოვიდეს პოლიტიკაში. მან მოიხადა სასჯელი სრულად. 7 წლის განმავლობაში ის იყო დასჯილი და მოიხადა.

“თუ გაერთიანებულ ფორმატში დადგება საკითხი ვანო მერაბიშვილის „ძალა ერთობაშია“-სთან მიერთების, უნდა ჩათვალოს ვანო მერაბიშვილმა, რომ ჩემგან ერთი ხმა ექნება მას”. – განაცხადა მურმან დუმბაძემ გადაცემა „დიანა ტრაპაიძის დღის ამბებში“.