კობახიძესთან საუბრის შემდეგ საქართველოს ჯანდაცვის მინისტრი გადადგა

საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, ზურაბ აზარაშვილმა თანამდებობა დატოვა. ინფორმაცია გაავრცელა მთავრობის ადმინისტრაციის პრესსამსახურმა.
პრესსამსახურის ინფორმაციით, მთავრობის მეთაური ირაკლი კობახიძე ესაუბრა ჯანდაცვის მინისტრს, რის შემდეგაც ზურაბ აზარაშვილმა თანამდებობა დატოვა.

ეს არის მინისტრთა კაბინეტში პირველი საკადრო ცვლილება ირაკლი კობახიძის პრემიერ-მინისტრის თანამდებობაზე მუშაობის დროს.

“საქართველოს პრემიერ-მინისტრი, ირაკლი კობახიძე ესაუბრა ჯანდაცვის მინისტრს, რის შემდეგაც ზურაბ აზარაშვილმა თანამდებობა დატოვა”, – აცხადებენ მთავრობის ადმინისტრაციის პრესსამსახურში.
როგორც მთავრობის ადმინისტრაციაში აცხადებენ, ჯანდაცვის ახალ მინისტრს საქართველოს მთავრობის მეთაური, ირაკლი კობახიძე, უახლოეს დღეებში წარადგენს.

უფრო ადრე, 24 თებერვალს, ირაკლი ღარიბაშვილმა შეცვალა “რესპუბლიკური საავადმყოფოს​” დანგრევაზე ყოფილი პრემიერისა და ჯანდაცვის მინისტრის გადაწყვეტილება. უკავშირდება თუ არა საკადრო ცვლილება ამ საკითხს, უცნობია. მედიასთან კომენტარი არ გაუკეთებია ზურაბ აზარაშვილს. არც ჯანდაცვის სამინისტროს პრესსამსახურს არ გაუვრცელებია ინფორმაცია.

ზურაბ აზარაშვილი ჯანდაცვის მინისტრის თანამდებობაზე 2021 წლის 30 დეკემბერს დაინიშნა. ამ დროს საქართველოს პრემიერ-მინისტრი იყო ირაკლი ღარიბაშვილი. მანამდე, ღარიბაშვილის მინისტრობის დროს, 10 თვის განმავლობაში ზურაბ აზარაშვილი თავდაცვის მინისტრის მოადგილე იყო. პრემიერ-მინისტრის თანამდებობა ირაკლი ღარიბაშვილმა 29 იანვარს დატოვა. მის შემცვლელად კი პარტია “ქართულმა ოცნებამ” ირაკლი კობახიძე დაასახელა. თანამდებობაზე დამტკიცებამდეც და შემდეგაც, კობახიძე აცხადებდა, რომ მხოლოდ თავდაცვის მინისტრი ჯუანშერ ბურჭულაძე დატოვებდა თანამდებობას.