კონგრესმენმა ივანიშვილის შესახებ ჩანაწერზე კომენტარი გააკეთა
„რესპუბლიკელმა“ კონგრესმენმა დონ ბეიკონმა კომენტარი გააკეთა დოკუმენტზე, რომელშიც ბიძინა ივანიშვილი და ვიქტორ მედვედჩუკი რუსეთის პრეზიდენტის ახლო მოკავშირეებად არიან მოხსენიებულნი.
გადაცემა Пограничная ZONA-სთვის მიცემულ ინტერვიუში კონგრესმენმა აღნიშნა, რომ დოკუმენტის ეს ნაწილი მას არ დაუწერია და საამისოდ, ტექნიკური ექსპერტები აიყვანეს.
ჟურნალისტის კითხვას, თუ როგორ შედგა დოკუმენტი, დონ ბეიკონმა უპასუხა: „მე ამ დოკუმენტის ეს ნაწილი არ დამიწერია. ჩვენ ტექნიკური ექსპერტები ავიყვანეთ, რომლებიც დოკუმენტის შედგენაში დაგვეხმარნენ. მე ამ დოკუმენტის სტრატეგიული ნაწილით ვიყავი დაკავებული. ჩვენ საქართველოსთან ახლო ურთიერთობები გვსურს. საქართველო ჩვენი მეგობარია. ქართველი ხალხი ჩვენი მეგობარია. იგივე შემიძლია ვთქვა უკრაინაზე“.
“ლობისტების ინტენსიური, თანაც, საკმაოდ პროფესიონალური მუშაობა, ხშირ შემთხვევაში, ფარავს იმ რეალობას, რაც არსებობს. ამიტომ, ძალიან ყურადღებით უნდა ვიყოთ. კარგია, რომ კონგრესმენმა ეს განცხადება გააკეთა.” – ასე ეხმაურება საქართველოს პარლამენტის თავმჯდომარის პირველი მოადგილე, გიორგი ვოლსკი კონგრესმენ დონ ბეიკონის განცხადებას.
მისი თქმით, ამავდროულად ისიც საყურადღებოა, როგორ მოხვდა ის ერთი, კონტექსტიდან ამოღებული ფრაზა მოხსენებაში.
„იმასაც უნდა დავუკვირდეთ, რა კვლევითი ჯგუფია ასეთი, რომელიც ასეთ პირობებში, როდესაც საქართველო-ამერიკის სტრატეგიული თანამშრომლობა ასეთ სიმაღლეზეა, მით უმეტეს, ახლა სამხედრო სწავლებებზეა კიდევ ლაპარაკი, როგორ მოხვდა ის ერთი, სრულიად კონტექსტიდან ამოღებული ფრაზა ამ მოხსენებაში.” – განაცხადა გიორგი ვოლსკიმ.
პარლამენტის თავმჯდომარის პირველი მოადგილე ფიქრობს, რომ დიპლომატიურმა სამსახურმა უკეთ უნდა იმუშაოს ინფორმაციის მიღების წყაროს გამოსავლენად, იმიტომ, რომ იგი არარეალისტურია და არ შეესაბამება იმ მოხსენების სულისკვეთებას, რომელსაც ხელს 13 კონგრესმენი აწერს.
„სამწუხაროა, რომ ხშირ შემთხვევაში, ხელისუფლება, იგივე, პარტიის ლიდერი ძალიან ბევრ საკითხზე არის გადართული და მეორე მხარეს არასწორი, ფეიკ ინფორმაციის შემოცურება ხდება, თუნდაც, ისეთ სერიოზულ დოკუმენტში, როგორიც არის ანალიტიკური ცნობა. ეს არ არის ოფიციალური დოკუმენტი, მაგრამ ფაქტია, რომ ამან გარკვეული რყევები გამოიწვია ქართულ საზოგადოებაში. პოლიტიკოსები ერთმანეთს უპირისპირდებიან და ამ ფრაზებს იყენებენ, ამ დროს, კონგრესმენი გამოდის და ამბობს, რომ საერთოდაც არ იცოდა ამ წინადადების და ფორმულირების წარმომავლობის შესახებ. ანუ, ხშირ შემთხვევაში, მართლაც ხდება, როდესაც ეს ლობისტური მუშაობა მნიშვნელოვნად წინ უსწრებს ან აჭარბებს ან ზემოდან ეფარება იმ რეალობას, რაც გაგვაჩნია, თუმცა, კიდევ ერთხელ გავიმეორებ, რომ დოკუმენტის პათოსი არის ძალიან კარგი, ძალიან პოზიტიური, და რეალობაც, პრაქტიკულად, გამოხატულია ამ დოკუმენტში.” – განაცხადა გიორგი ვოლსკიმ.
შეგახსენებთ, 13-მა კონგრესმენმა ამერიკის შეერთებული შტატების რესპუბლიკელთა კვლევითი კომიტეტის ეროვნული უსაფრთხოების ანგარიშში, რუს და უკრაინელ ოლიგარქებთან ერთად სანქციების დაწესება ბიძინა ივანიშვილისთვისაც ითხოვა. “ბიძინა ივანიშვილი პუტინის ახლო მოკავშირეა და რუსეთის სასარგებლოდ საქართველოს დესტაბილიზაციაშია ჩართული.” – ნათქვამია ამერიკის შეერთებული შტატების რესპუბლიკელთა კვლევითი კომიტეტის ეროვნული უსაფრთხოების ანგარიშში. ოპოზიციაში ამბობენ, რომ ეს მოხსენება ბიძინა ივანიშვილის განაჩენის ტოლფასია.
